Read gen Sirasid 24 Bible Online

Sirasid 24 - gen bible

Sirasid 24

¹Ànyasã be kàfù kafu Ànyasã ɖènà ye ŋutɔ be kàfùkafu fiɔna eye yebe dùkɔ̃a mè be kpɔ̀na jìjɔɛ lè.

²E xɔ̀nà ènyà lè Èjihũitɔa be èhabɔ̀bɔa mè eye e ɖènà yebe gogoa fiɔna lè yebe ŋusɛ̃a be ŋùkɔ̀.

³Mù to lè Tɔhonɔ̀ be ènu mè eye sìgbè yezo nènea, mù cɔ̃ ànyigbã kpata ji.

⁴Mù ɖo àpe nɔ̀pewo ɖo èji hũi eye mù sɔ àpe fìɔzìkpea nɔ̀ ànyi ɖo lilikpowo ji.

⁵mù ɖìsà to jiŋùkusi be nukpòpewo eye mù ɖiɖi yì àpù be gòglopewo.

⁶Àpe àcɛ̀kpàkpa le wɔ̀dɔ lè àpùsrɔ̀kewo kudo ànyigbã bliboa ji eye mù ɖù àgbètɔwo kudo dùkɔ̃wo kpata ji.

⁷Lè woawo keŋu mèa, mù ji àpe jɛ̃gbɔ̃pe dokpò: eye ànyigbã kɛ ji ye mù la teŋu ɖo è ɖo ò?

⁸E yomèa ènuwo kpata be ɖotɔa sɔ ègbè doàsi ɖe na mù eye àmè kè ɖo mùa fiɔ àsi tèpe nyèa na mù. Eye be gblɔ̃ na mù be: 'ɖo nɔ̀pe wòa ɖo Yakɔb be èviwo dòmè eye wòa ɖo mamã lè Izràɛlviwo dòmè'.

⁹Gbɔ̀xue ye hùenua la jè e gɔ̃mèa, e ɖo mù xoxo vɔ̀ eye so jìjimè yì jìjimèa, nyè mu la dokpò ànyinɔ̀nɔ ò.

¹⁰Lè kɔ̀kɔ̀ɛpea mèa mù wɔ̀ èdɔ lè yebe ŋùkumè, eye nènea ye mù yì li nɔ̀pe nyèa ɖo Ziɔ̀n.

¹¹E na mù gbɔ̃jɛ̃ lè èdù nyuɛ̃a mè, eye mù ɖo àcɛ̀kpàkpa nyèa ɖo Yeruzàlɛm.

¹²Mù ɖo èkè lè dùkɔ̃ xɔ̀ nyikɔ ɖe mè eye Tɔhonɔ̀ be tèpea mèa ye àpe màmaa lè.

¹³Mù sĩ lè emè sìgbè Libàn be sedàti nène eye sìgbè àtigã ɖe nène lè hɛrmɔ̀n be ètowo ji.

¹⁴Mù sĩ sìgbè En-gèdi be deti ɖe nène àlo sìgbè lorìa be èsepòpo nène lè Yerikò, eye sìgbè àmìti nyuɛ̃ɖe nène lè gbàjàa ji eye sìgbè platanà kè le sĩ yì jia nène.

¹⁵Mù na be àpe àmìa huɛ̃ kaka sìgbè kanelà, àmì xɔ̀zò kè huɛ̃na nyuɛ̃ɖea kudo àmì huɛ̃ titi nène, sìgbè galbanɔ̀n, oniks kudo storàs eye sìgbè lifi be yezo nène lè nɔ̀pea mè.

¹⁶Mù lè sìgbè àti vùdù kè vlũ yebe àlɔ̀zɛ̃awo nène, àlɔ̀zɛ̃ kèwo ye nya kpɔ̀kpɔ eye wo nyɔ nyuɛ̃ɖe.

¹⁷Mù lè sìgbè vɛ̃gble kè le na ènuku àdodoewo nène eye ekè be sepòpo kèwo le ɖè kusɛ̃sɛ̃ nyuɛ̃ kè la to so woa mèa fiɔ.

¹⁹Mì va gbɔ nyè, mì àmè kèwo le lɔ̃ ènyà nyè gbɔa eye mì ɖù àpe kusɛ̃sɛ̃wo ne mìa ɖɔpò.

²⁰Ɖo woa nɔ ɖo ŋùku ji nyèa nyi ènu kè vivi wu ànyisi eye ne wo ɖo mùa, e nyi jìjɔɛ gãɖe wu ne woa nù ànyisi viɖe.

²¹Àmè kèwo ɖùnà mùa àdɔ̀ gbà wùnà wo eye àmè kèwo la nù mùa sìkɔ la gbà tì wo.

²²Àmè kè do bùbù ŋuti nyèa, mu la ɖù ŋùkpɛ̃ ò àmè kè le wɔ̀ èdɔ̀ kudo mùa, mu la wɔ̀ ènu gbegble gbèɖe ò. Ànyasã kudo Èsea

²³Ènu kèwo kpata mi hlɛ̃ fifìa, le nyi ènyà kè lè zòɖùɖu be xoma a mè kè ye le bla mi ɖo Tɔhonɔ̀ ŋuti, e ye le nyi Mosè be èse kè be nlɔ̀ na Yakɔb be jìjimèviwo lè woabe èhabɔ̀bɔa mè.

²⁵Èsea ɖona ŋusɛ̃ to ànyasã ji eye be gbãnà go sìgbè ètɔ̀ sàsra nène eye be ɖìnà Picɔ̀n àlo tigrà nène lè hùe kè nu ye èsepòpoawo tona lè nyuɛ̃ɖea.

²⁶E nana ènu nyanya gbãnà go sìgbè Efratà be ètɔ̀ sàsra lè gà kè mè yebe èsì ɖɔɖɔa gbãnà go nène, àlo sìgbè Jɔrdàn be èsì lè nuku yàya hùenu nène.

²⁷E ɖùɖùnà ènufiɔfiɔ kɔ̀ ɖɛ sìgbè Nil be ètɔ̀ sàsra gbãgo nène àlo gihɔ̀n lè nuku ɖèɖe be gàmè nène.

²⁸Àmè cucugbãtɔ̀a mu nya ɛ̀ kaka ye àmè kpɔ̀tɛa la va ŋɔjè e mè ò.

²⁹Nunya be sùsuwo kèkè wu àpù eye yebe ètopòɖowo gòglò wu ègũ tito.

³⁰Tɔ̀ nyè gomèa, mù lè sìgbè èsì-mɔ ɖe kè ɖènà tope sàsra nène, yì kɔ̀nà ɖo àbɔ mè.

³¹Ènyè ya mù gblɔ̃ be: mù la wusì àbɔ nyèa eye mù la na èkpo nyèwo la nɔ̀ mɔ̀nyɔ̀ mɔ̀nyɔ̀. Eye kpɔɖa àpe èmɔ̃ ɖèɖea trɔ ètɔ̀ zè ɖèka eye èsìa gbãgo sìgbè àpù nène.

³²Mù la gbà na ènufiɔfiɔ nyèa la gbà klɛ̃ sìgbè ŋùdekɛ̃nyɛ be dɔ̃ŋùkusu nène eye yebe àlɔ̀zɛ̃a be kɛ̃klɛ̃a, la yì dìdìpe boo.

³³Mù la gbà kãkã ènufiɔfiɔa sìgbè ènyà gblɔ̃ɖɛ nène eye mù la jrà ɛ̀ ɖo dàɖɛ na jìjimè kèwo la ɖɛ vaa.

³⁴Kpɔɖa mu nyi nyè ŋutɔ ɖèka ŋuti kpò mù hà ɖo ò, vɔ̀a na àmè kèwo kpata le ji ànyasã a.