Read gen Sirasid 25 Bible Online

Sirasid 25 - gen bible

Sirasid 25

¹Ènu ètɔ̃ kèwo jɔ̀nàjì na mù eye Tɔhonɔ̀ ku àgbètɔwo cã lɔ̃nà, ye kè: nɔ̀visi lele, èxlɔ̃-kàdodo nyuɛ̃ kudo lɔ̃lɔ̃ kè blana ŋusù ku nyɔnù ɖodua.

²Àmèhasòso ètɔ̃ kèwo be ènyà-gbɔ nyè mu lɔ̃nà òa kudo kèwo fɔ̃na àpe àdɔ̀mèze eji ejia ye nyi: wɔ̀amènɔ̀ jàgla, ècitɔ àjèɖàtɔ kudo àmègãxo àhasìtɔ mà bù ètamè.

³Ne wò mu teŋu jrà ènu ɖe ɖo ɖɛ lè àpo ɖèkajɛ mè òa, nukɛ wò la teŋu va kpɔ lè àpo àmègã kuku mè ò?

⁴Sìgbè àlekè kòjoɖoɖo jènà àmè kèwo fũ èwà be ŋùku mèa, nèneake àmèsĩsĩ cã la pòtoɖoa yeŋu.

⁵Sìgbè àlekè ye ànyasã jènà na àmègãhowoa, nèneake ye ènumèɖèɖe kudo ètopòɖoa jènà àmè ɖìnyiwo.

⁶Àmèsĩsĩwo be jègbà ye nyi ènumètòto sùgbɔ eye Tɔhonɔ̀ be vɔ̃vɔ̃a ye wo sɔ tùnà èglo.

⁷Mù ɖo kpɔwɔɛ àsiɖèkɛ lè èjì nyè mè eye mù la ɖokpe èwogɔ̃a ji: ŋusù kè kpɔna jìjɔɛ lè èviawo mè, àmè kè la teŋu kpɔ yebe kɛ̃tɔwo be ànyijèje lè yebe àgbènɔ̀-zã mè.

⁸Sìtuɖèɖe ye nyi àmè kè kpɔ nyɔnù ènunyatɔ lè yebe àhàda mèa, àmè kè yebe àɖe mu na be jè ànyi kpò kudo àmè kè mu sumɔ ènufiɔtɔ kè mu jè na ɛ̀ òa.

⁹Sìtu na àmè kè kpɔ mɔnu nyuɛ̃ kudo àmè kè teŋu pònà nupo eye wo ɖona èto èa.

¹⁰Àmè gã ye nyi àmè kè ɖo ànyasãa, vɔ̀a àmè ɖekpekpe tɔ̀ mu wu gã àmè kè vɔ̃na Tɔhonɔ̀a, tɔ̀ ò.

¹¹Tɔhonɔ̀ be vɔ̃vɔ̃a pòta na ènuwo kpata eye àmè kè si be lèa, nukɛ wo la sɔ sɔ̀ku ì ò? Nyɔnù vuɛ̃ɖì

¹³Àbì hɔ̃huɛ̃ ɖekpe mu ve àmè wu èjì be àbì ò, eye èkunyànyrã ɖekpe mu sɛ̃ŋu wu nyɔnù vuɛ̃ɖì tɔ̀ ò.

¹⁴Nuzĩzĩ mè nɔ̀nɔ ɖekpe mu sɛ̃ŋu wu ekè ye àmè cìcri hɛ̃nà vana ò eye èhlɔ̃ biɔbiɔ ɖekpe mu sɔ̀ku kɛ̃tɔwo tɔ̀.

¹⁵Àɖi sìamè ɖekpe mu sɔ̀ ku èdã be àɖi ò, nèneake nyɔnù be èjìbibia mu teŋu sɔ̀ kudo èjìbibi ɖekpe ò.

¹⁶E nyɔ be wòa nɔ èxɔ̀ ɖèka mè kudo jãŋùta àlo èhɔ̃drìbà sɔ wu be woa nɔ̀ èxɔ̀ ɖèka mè kudo nyɔnù nyrãku.

¹⁷Nyɔnù be vuɛ̃ɖì vuɛ̃ɖia nyrãnà yebe nɔ̀nɔmè eye mu kpɔ èmɔ̃ cã la gblɔ̃ ènyà ɖekpe ò.

¹⁸Èsrɔ̃a ŋusùa yì ɖùnà ènu lè yebe èxlɔ̃sawo gbɔ eye mu kpɔ èmɔ̃ cã la gblɔ̃ ènyà ɖekpe ò.

¹⁹Ènuhàha ɖekpe mu wu gã ekè nyɔnù dona na àmè ò. Eŋuã ɖe leke ye àmè màɖo xɔ̀se ku èsea be àgbèmè la nɔ̀ ɖo ò?

²⁰Ŋusù fafa kè ɖè nyɔnù tùkaɖa mɛa lè sìgbè àmèsĩsĩ kè le lia èkɔgùdu be èkpo nène.

²¹Mù gbà na nyɔnù be nyɔnyɔa bèa gbã ŋùku na wò ò, eye mù gbà lɔ̃ ɛ̀ ɖo yebe èci kpɔkpɔ ŋuti ò.

²²Ŋusù kè ji ye èsrɔ̃a nyɔnù le kpɔa, ne kpɔ èmɔ̃ na èzũ, ŋùkpɛ̃ kudo àmè màbu be nɔ̀nɔmè.

²³Èjì gbãgbã, ŋùkumè sãkɔ̃ kudo èjì xɔ̀ àbìa wo ye le nyi nyɔnù vuɛ̃ɖì be èdɔ do àsi. Eye àbɔ kuku ku àfɔ̀ kplibɔa ye nyi nɔ̀nɔmè kè nɔ̀nà ŋusù kè ye èsrɔ̃a mu dona jìjɔɛ na òa si.

²⁴Nyɔnù ye nyi èvuɛ̃ be jɔ̀sope eye to e jia mia kpata mi la ku.

²⁵Mù gbà ɖèmɔ̃ na èsì ne vɔ̀ lè èsìdo wòa mè ò nèneake mù gbà ɖèmɔ̃ na nyɔnù vuɛ̃ɖìa bèa nɔ pò nupo kaba kaba ò.

²⁶Ne mu teŋu le zɔ̃ ɖo ègbèɖèɖe wòa ji òa, na ɛ̀ àsà ne wòa nyà ɛ̀.