Read gen Sirasid 26 Bible Online

Sirasid 26 - gen bible

Sirasid 26

¹Ŋusù kè ɖè èsrɔ̃ nyuɛ̃a be nyɔna Sìtumɛ ye nyi ŋusù kè kpɔ èsrɔ̃ nyuɛ̃a yebe àgbè-zãwo la jì ɖo eji zè èvè.

²Nyɔnù bibi dona jìjɔɛ na èsrɔ̃a ɖo e ye ŋuti e nɔ̀nà ŋutifafa mè lè yebe àgbè-zã kpata mè.

³Jɔ̀gbè nyuɛ̃ kɛ be nyi ne ŋusù kè ɖè èsrɔ̃ nyuɛ̃a, Tɔhonɔ̀ be ènunana ye, e ye ke jèsi yebe àcɛ̀kpàkpa.

⁴Mu kã lekè be lè ò, ècitɔ àlo wɔ̀amènɔ̀, yebe èjì nɔ̀nà jìjɔɛ mè eye yebe ŋùkumè zena jìjɔɛ tɔ̀ lè ègo ɖekpekpe mè. Jè àyè na nyɔnù

⁵Àpe èjì le sàvò ɖo ènu ètɔ̃ ŋuti eye ènɛ̀gɔ̃a le ɖo vɔ̃vɔ̃ na mù: wo nyi èkpadòmè be ènyàwo, àmèhawo be bɔ̀bɔ. Ènyà kpà ɖo àmè ŋuti. Ekèawo kpata sɛ̃ŋu wu èku.

⁶Vɔ̀a àyàɖùɖu sɛ̃ŋua ye nyi be wòa kpɔ nyɔnù kè le hùãŋu ɖo yebe àsusìa ŋuti eye e ɖo àɖe bàɖà.

⁷Nyɔnù vuɛ̃ɖì gbena ènu sùgbɔ wù ènyìsu kè wo do kɔ̀kùti na eye ne wo ji be woa jɔ̀ ɛ̀a lè sìgbè wo le àkekle nène.

⁸Nyɔnù kè muna àhà nyi àfɔ̀klɛ̃ eye mu gbà teŋu wlana ènu kè nyi yebe ŋùkpɛ̃ ò.

⁹Lè nyɔnù be àzìã ŋùku nukpɔkpɔ mèa wo nyana zè ɖèka be mu nɔ̀nà àgbè nyuɛ̃ɖe ò eye wo jènàsi ì to yebe àɖàbà fuwo mè.

¹⁰Ne tùgbɛ̀jɛvi ɖe mu ɖo nɔ̀nɔmè nyuɛ̃ɖe òa, e lè be wòa bìaŋùkuvi do è ne mu nyi nène òa e la trã ɖo eji to àpo gbɔ̀jɔ̀ gbɔjɔ mè.

¹¹Lè yebe ŋùkpɛ̃ màɖo be nɔ̀nɔmè mèa, le ŋùku ɖo e ŋuti eye mu gbà wɔ̀ ŋùdã na wò ne be le blè wò ò.

¹²Sìgbè èmɔzɔ̃tɔ kè ye sìkɔ le tì hũnà ènu nùnà èsì cucugbã-tɔ̀ kè be kpɔa nèneake ye cã sɔna ye ɖokoe nana yeŋu eye be hũnà àkpòa na àŋùti ɖekpekpe. Nyɔnù èsrɔ̃tɔ nyuɛ̃ be kafu

¹³Nyɔnù be nyɔnyɔa dona jìjɔɛ na èsrɔ̃a eye yebe ènu nya wɔ̀wɔa hɛ̃nà ɖàgbè va na.

¹⁴Nyɔnù kè mu pònà nupo sùgbɔ òa, nyi ènunana so Mawu gbɔ eye nyɔnù kè xɔ̀ kpakpla a nyi àmè kè wo mu la teŋu do àsì na ò.

¹⁵Nyɔnù xɔ̀asì nyi màje ɖo màje ji eye nyɔnù kè ɖùnà ye ɖokoe jia, xɔ̀asì wu ènu ɖekpekpe.

¹⁶Lè àxue kèwo lebè na nyuɛ̃ɖea mèa, nyɔnù nyanua be àsìxɔ̀xɔ klɛ̃na sìgbè dɔ̃ŋùkusu jàse nène.

¹⁷Ŋùkumè kè nya kpɔkpɔ lè ŋutilã nyuɛ̃ be èta ŋutia, lè sìgbè kãligbɛ̃ kè le klɛ̃ lè Mawuxɔ mè be kãligbɛ̃ti jia nène.

¹⁸Àta nyuɛ̃ kèwo likè ɖo àfɔ̀kpoji sɛ̃ŋu jia lè sìgbè sìka be sɔti kèwo likè ɖo klòsalò be gɔ̃mèɖonuwo jia nène. Ŋuzĩzĩ be nɔ̀nɔmè ètɔ̃

²⁸Ènu èvè wɔ̀na ŋuzĩzĩ na mù, eye ètɔ̃gɔ̃a dona àdɔ̀mèze na mù: gbãdãgbã kè ci èhiã mèa, ènunyatɔ kèwo àmèwo crìa, vɔ̀a, vevetɔa, àmè kè ɖènà àsi lè ènyuɛ̃ wɔ̀wɔ ŋuti, na èvuɛ̃ wɔ̀wɔa ɖoa Tɔhonɔ̀ ɖo è be yè la crɔ̃ ɛ̀ ku èwui. Àsìsàsa be tètèkpɔwo

²⁹E la sɛ̃ŋu ŋutɔ, ne àsìsàtɔ ne dokpò àgɔ̀jèje, nènea kea, ènusàtɔ mu la dokpò èvuɛ̃ wɔ̀wɔ ò.