Read gen Sirasid 29 Bible Online

Sirasid 29 - gen bible

Sirasid 29

¹Ègàdodo Àmè kè dona ènu na yebe èhavi a wɔ̀nà àkɔfafa be èdɔ, eye àmè kè kpe ɖo e ŋuti a wɔ̀ ɖo Tɔhonɔ̀ be èsea ji.

²Do ènu na èhawòvi, gà kè mè be lè èhiã mèa, vɔ̀, trɔ ènu kè wò doa, yì na èhawòvi a ɖo gàmèa ji.

³Wɔ̀ ɖo ènyà kè wò gblɔ̃a ji, ne wòa wɔ̀ ànùkua; e la na be gà sia gàmèa, ènu sia ènu kè wò la hiã a la sù àsi wò.

⁴Àmè sùgbɔ sɔna ɛ̀ be ènu kè wo do na yèwoa, èci kpɔkpɔ be èmɔ̃ nu be nyi na yèwo, eye wo sɔna àmè kè kpe ɖo woa ŋutia dona tùkaɖa mè.

⁵Gbɔ̀xue wo la do ènua, wo bɔ̀bɔ̀nà ègbè, wo bɔ̀bɔ̀nà àmè ɖokoe. Vɔ̀a, ne wo xɔ̀ ɛ̀ vɔ̀a, wo trɔna nɔ̀nɔmè. Ne ènua be tutu gbè ɖoa, wo jina ènudotɔa dokpò. wo kpɔna vevesèse be ènyàtiwo ɖo èfɛ̃tua tèpe, eye wo kpɔna be hùenuawo mu le nyɔ ò.

⁶Ne e va va e mè be wo la tu èfɛ̃a, wo tuna àkãna, lè e ŋuti, eye, ne mu gũ na ɛ̀ keŋu òa, kpɔ̀tɛa be xɔ̀xɔ va nyina èzũ ku kpɛ̃sɛ̃, na àmè kè do àlɔ̀ àmèa, eye be trɔna zũ kɛ̃tɔ, ɖo àkpedodo kè be ɖo la xɔ̀a tèpe.

⁷Àmè sùgbɔ mu gbà lɔ̃nà be yèa do ènu ò, mu nyi to àdɔ̀mèze mè ò, vɔ̀a, to àyè jèje mè, be yè mu gbà va ci àmã, àgɔ̀ ɖe mà-jè ò. Ènu nana wɔ̀amènɔ̀wo

⁸Co gãke hɛ̃ àdòdò ku wɔ̀amènɔ̀, eye mù gbà na, ne bèa sè veve, ɖo ènu kè wò na ɛ̀a ŋuti ò.

⁹Ɖo Tɔhonɔ̀ be èsea ŋutia, kpe ɖo ènuwɔ̀donɔ̀ ŋuti, ɖoa, kè ènu veve ɖe lè hiã ɛ̀a, mù gbà nyà ɛ̀ ɖoɖa, àsigba àlɔ̀gba ò.

¹⁰Nɔ̀ gbèsɔ̀sɔ̀ɛ, ne wòa gble ègà, ɖo nɔ̀vi ɖe, àlo èxlɔ̃ ɖe ŋuti, sɔ wu be wòa gble è ɖɛ, ne àkaɖa ne va ɖù ì.

¹¹Zã àpo ènu nɔ̀ àmè si, sɔ zɔ̃ ɖo Tɔhonɔ̀ be ɖoɖo nu, e ɖè àlè wu, ne wòa bɔ̀ sìka ɖɛ.

¹²Bɔ̀ ènyuɛ̃ wɔ̀wɔ ɖɛ, na wɔ̀amènɔ̀wo, e la va ɖè wò to lè jɔ̀gbèvuɛ̃wo keŋu mè.

¹³E la na wò jiɖùɖu, ɖo kɛ̃tɔ wò ji, wu àkpoxɔ̀nu sɛ̃ŋu kè kpɛ̃ wu èhuã a. Àmè kèwo ji wo ɖo la kã ɖoa

¹⁴Àmè kè ŋuti bùbu lèa nɔ̀nà ŋùgbedòmè na yebe èhavi, vɔ̀a àmè kè mu ɖo kpɛ̃kpɛ̃ mè ɖekpe òa, ɖènà èkɔ̀ lè e ŋuti.

¹⁵Mù gbà ŋlɔ̀be àmè kè wɔ̀ ènyuɛ̃ na wò, eye be nɔ̀ ŋùgbedòmè na wòa ò. ɖo èwò ŋuti ye be sɔ ye ɖokoe sɔ sia ɖo.

¹⁶Èvuɛ̃wɔ̀tɔ kpò ye gũna àmè kè nɔ̀ ŋùgbedòmè na ɛ̀a be èci,

¹⁷eye àkpemàdotɔ kpò ye ɖènà èkɔ̀, lè àmè kè hlùɛ̃ ɛ̀ gã a ŋuti.

¹⁸Ŋùgbedòmè nɔ̀nɔ na àmè, gble àmè ɖìnyi sùgbɔ dòmè, eye, kè woabe ènu nɔ̀ àmèsiwo gũa, wo va ci sìgbè àpù be àsrɔ̀kewo nène. E zĩ ècitɔ ɖìnyi sùgbɔ ji, wo hũ jo lè woabe èdù mè, yì le dã sìgbè àmè mà-ɖo nɔ̀pewo nène, lè àmèjrowo be èdù mè.

¹⁹Ne èvuɛ̃wɔ̀tɔ ɖe ci ji, be yèa nɔ̀ ŋùgbedòmè na àmè, ne yèa ɖù àlè gã ɖea, e sɔna ye ɖokoe dona kòjoɖoɖo mè.

²⁰Kpe ɖo èhawòvi ŋuti, ku èmɔ̃nukpɔkpɔ kè lè àsi wòa, vɔ̀a, kpɔ ɖokoe wò ji, ne mù gbà jè ègà-mɔa mè ò.

²¹Àgbè mè be èhiã cucugbãtɔ̀awo ye nyi: èsì, ènuɖùɖu ku àwùdodo, kudo àxue kè mè wò la nɔ̀, la sɔ wla ɖokoe wò do àmèwo be ŋùkuviwo.

²²Àgbènɔ̀nɔ wɔ̀amènɔ̀ tɔ̀, lè àmè ŋutɔ be èbè-xɔ mè, nyɔ boo wu àgɔɖùɖu viviwo lè àmè bu be àxomè.

²³Ne ènu viɖe, àlo ènu sùgbɔ lè àsi wòa, kpɔ jìjɔɛ so e ŋuti; e la na be wò mu la sè èzũ ɖo èto mè, be wò nyi àmèjro ò.

²⁴Èvlo do àmè be àgbè ɖe ye be nyi, be woa nɔ dã, so àxue ɖe mè, yì àxue bu mè, eye wò mu gbà teŋu va kè ènu ŋutɔ cã ò, ɖoa, wò nyi àmèjro.

²⁵Wò le na ènu ɖùɖu, wo le ɖù; wò le na ènu nùnu, wo le nù; co gãke, wò mu le xɔ̀ àkpe ɖekpekpe ò; eye, sɔ bɔ̀ ɖo e ŋutia, wò ɖo la nɔ sè ènyà veve kaɖi-kaɖiwo sɔ kpe è be:

²⁶“Kpɔɖa, èwò àmèjro, va fikèa! Ɖo èkplɔ̃a! Ne wò ɖo ènu ɖea, sɔ ɛ̀ va na mù, ne ma ɖù!

²⁷Kpɔɖa, àmèjro, na èmɔ̃ àmè kè xɔ̀ àsì wu wòa! Nɔ̀vi nyè va zɛ̃ gbɔ nyè, ye ŋutia, mù hiã àxue nyèa.”

²⁸Ènu sɛ̃ŋu ɖe ŋutɔ be nyi na àmè kè be susu mè kɔ̀a be woa kpɔ ɛ̀ be e nyi àmèjro, eye, ne woa ɖèfũ na ɛ̀, sìgbè àmè kè ŋuti èfɛ̃ lèa nène.