Read gen Sirasid 30 Bible Online

Sirasid 30 - gen bible

Sirasid 30

¹Àjìviwo hɛ̃hɛ̃ Àmè kè lɔ̃nà èvia a dɔ̃nà èto na ɛ̀ ku èba, ne bèa teŋu kpɔ jìjɔɛ so e ŋuti èsɔ̀.

²Àmè kè kpla èvia nyuɛ̃ ɖea kpɔna àgbɔ̃jèpò lè e ŋuti, eye, ne e lè yebe àmè nyanyawo dòmèa, èjì jɔ̀nà ɛ̀ ɖo e ŋuti.

³Àmè kè fiɔ ènu èvia a, la na, yebe kɛ̃tɔwo la hùãŋu, eye, lè yebe èxlɔ̃awo be ŋùkɔ̀a, e la nɔ̀ jìjɔɛ mè[8] so e ŋuti.

⁴Ne èvi-tɔa ku cã a, e nɔ̀nà sìgbè mu ku ò nène, ɖoa, e jrà yebe ŋùgbedòmèa ɖo, wàlɛbɛ kè be gble àmè ɖe ɖo ŋùgbe kè sɔ̀ ku ìa.

⁵Lè yebe àgbè-nɔ̀ ŋùkèkèwo mèa, èjì jɔ̀nà ɛ̀, ne e lè kpɔ ɛ̀a, eye wàlɛbɛ kè be la kua, mu la xànu ɖekpe ò.

⁶E le gble àmè ɖe ɖɛ kè la biɔ èhlɔ̃, yebe kɛ̃tɔwo, eye bè la sɔ àkpe kè jè na yebe èxlɔ̃woa ɖo woabe jènawo tèpe na wo.

⁷Àmè kè gblena èvia, ɖo la bla yebe àbìwo, eye, ne e gbe do àpa kpòa, yebe àdɔ̀kãviwo mè la blù.

⁸Èsɔ kè wo mu kpla òa, wo mu teŋu kpena e ji ò, eye, èvi kè ŋuti wo ɖè àsi lè ɖɛ na ye ɖokoea, trɔna zũ jìmà-kpla.

⁹Ne wò kebe èvi wòa, e la do wò ŋùkpɛ̃; nɔ gble ku ì, eye be la na, wò la ci ènu xàxa mè.

¹⁰Mù gbà nɔ kònu ku ì egbè, ne mù gbà va ɖù àyà ku ì ò, e la va ve na wò èsɔ̀.

¹¹Mù gbà na ɛ̀ vòvo kpɔkpɔ, lè yebe ɖèkajɛ mè ò.

¹²Tɛ̃ ŋùkuvi do è, wàlɛbɛ kè ye be kpɔ̀tɔ̀ lè vifɛ̃ mèa; ne mu nyi nène òa, ne e sĩ vi ɖea, mu la gbà bù wò ò.

¹³Kpla èvi wò, eye wɔ̀ ènu kè wò la teŋu wɔ̀, la sɔ hɛ̃ ɛ̀a, ne wò mu gbà va ɖù ŋùkpɛ̃, lè yebe àgbè kpòtoe nɔ̀nɔ mè ò. Lãmèsɛ̃

¹⁴È nyɔ be wòa nyi wɔ̀amènɔ̀, lè lãmèsɛ̃ mè, wòa nɔ̀ nyuɛ̃ ɖe, ne wòa sɛ̃ŋu, sɔ wu be wòa nyi ècitɔ kè be èjì mu lè nyuɛ̃ ɖe òa.

¹⁵Lãmèsɛ̃ kè mè wo sɛ̃ŋu lè nyuɛ̃ ɖea nyɔ wu xixea mè be sìkawo kpata, eye susu sɛ̃ŋu nɔ̀ àmè sia, nyɔ wu àdɔ̀kùnu gã ɖe.

¹⁶Àdɔ̀kùnu ɖekpe mu sɔ̀ ku lãmèsɛ̃ mè nɔ̀nɔ ò, eye ènu jè e ji ɖekpe mu sɔ̀ ku èjì kè le kpɔ jìjɔɛ ò.

¹⁷Èku nyɔ wu àgbè kè ɖɔ ku ènuxàxa a, eye jɛ̃gbɔ̃gbɔ̃ fɛ̀ɖɛ̀ nyɔ wu èdɔ̀ mà-vɔ̀ gbèɖe.

¹⁸Ènuɖùɖu àdodoewo lè àkɔ mè na èdɔ̀nɔ̀a lè sìgbè ènuɖùɖu be ènunanawo, lè àkɔ mè na legba nène.

¹⁹Èbò kɛ nu, vɔsa kè wo wɔ̀nà na legba a lè na ɛ̀, kè e tɔ̀ be mu la teŋu ɖùnu, àlo, la teŋu nùnu ò? Nènea ye be nyi na àmè kè Tɔhonɔ̀ le do àyà naa.

²⁰E le kpɔ ènuɖùɖua ku yebe ŋùkuviwo eye be sò hũũ, sìgbè lekè kobonɔ̀ sònà hũũ, ne e kpla àsi èkɔ̀ na tùgbɛ̀jɛ lè àlɔ̀ jia nène.

²¹Mù gbà ɖè àsi lè èkla wò ŋuti, ɖo ènuxàxa mè ò; eye mù gbà caka susu na ɖokoe wò ò.

²²Èjì kè lè jìjɔɛ mèa nana àmè nɔ̀nà àgbè, eye ènukòko nana àmè be ŋùkèkèwo yìnà ŋùkɔ̀.

²³Do jìjɔ̀ɛ na àpo èkla, do ŋusɛ̃ àpo èjì, na àsà ŋuzĩzĩ, ɖoa, ŋuzĩzĩ mè nɔ̀nɔa kplɔ̀ àmè sùgbɔ yì cɔ̃crɔ̃ mè, eye wo mu la kpɔ àlè ɖekpe lè e mè ò.

²⁴Ŋuhuã ku àdɔ̀mèze ɖènà àgbè zã ji kpɔ̀tɔ̀, eye ètamè bùbu nana wo kuna àmègã kaba.

²⁵Èjì kè mè fòa, ɖùnà ènu nyuɛ̃ ɖe, e lena ŋùku nyuɛ̃ ɖe ɖo ènu kè be le ɖùa ŋuti, eye be sènà vivi na ɛ̀.