Read gen Sirasid 31 Bible Online

Sirasid 31 - gen bible

Sirasid 31

¹So àdɔ̀kùnuwo ŋuti Àlɔ̃ mà-dɔ̃ kè ècikpɔkpɔ hɛ̃nà va a nana be àmè ɖìnàkù keŋu keŋu, eye ètamè bùbu kè be nana a nyànà àlɔ̃dɔ̃dɔ̃ jo.

²Ètamè bùbu ɖo èsɔ̀ ŋutia xena èmɔ na èkɔ̀lɔ̃ dɔ̃dɔ̃ ŋutɔ cã, eye, sìgbè èdɔ̀ sɛ̃sɛ̃ ɖe nènea, e nyànà àlɔ̃ jo.

³Ècitɔ hlɔ̃na be yèa bɔ̀ àdɔ̀kùnuwo ɖɛ, eye ne yè va gbɔ̃jɛ̃a, yèa teŋu ɖɔpò ku àgɔ ɖùɖu.

⁴Wɔ̀amènɔ̀ hlɔ̃na be yè cã yèa kɔ̀, wàlɛbɛ kè ènu viɖe kpò ye sù e sia; vɔ̀a, ne e ɖo jɛ̀gbɔ̃gbɔ̃ be hùenua, e gbà gɛ̃na ɖo èhiã mè.

⁵Àmè kè lɔ̃nà sìka a, mu la teŋu dokpò àgɔ̀ jèje ò, eye àmè kè jè àlèɖùɖu yomèa, ɖènà àsi lè ye ɖokoe ŋuti, be trɔ va ɖùnà e ji.

⁶Àmè sùgbɔ jè cɔ̃crɔ̃ mè, ɖo sìka ŋuti, eye woabe gbledoa va jè woa ji.

⁷Èmɔ̀tetre ye be nyi na àmè kèwo be bla ɖɛa, eye ènu mànyãtɔwo kpata ɖènà àsi lè woa ɖokoe ŋuti, be trɔ lena wo.

⁸Sìtumɛ ye nyi ècitɔ kè ŋuti àgɔ̀jèje ɖe mu lè ò, ekè mu pudù jè sìka yomè òa.

⁹Àmè kɛ ye be nyi, ne mia kafu ì ò? Ɖo, e nɔ̀ àgbè ŋùdãtɔ̀, lè yebe dùkãa dòmè.

¹⁰Àmè kɛ ye to leke be tètèkpɔ mè, eye be to e mè, nyuɛ̃ɖe ò? E ɖo èmɔ̃nu kpɔkpɔ ne bèa sɔ go. Àmè kɛ ye kpɔ èse ji dàda be èmɔ̃nu kpɔ, eye mu dà e ji, ne bèa wɔ̀ ènuvuɛ̃, eye mu wɔ̀ ɛ̀ ò?

¹¹Eŋua, wo la gbà ɖo èkpe, nènemɛa be ènunɔ̀amèsiwo ji, eye èsewɔ̀pea la hlɛ̃ ènu nyuɛ̃ kèwo be wɔ̀a. So àzãɖùɖuwo ŋuti

¹²Ne wò lè ènuɖùkplɔɔ̃ gã ɖe ŋutia, mù gbà ɖè ɖokoe wò nu ne wòa kè ènu, gblɔ̃ so e ŋuti be: “Oò, èkplɔ̃ wò ji nyɔ ŋutɔ!” ò.

¹³Ɖo ŋùku e ji be èvuɛ̃ ye be nyi, be ŋùku gã ne nɔ̀ èta ŋuti na àmè; ènu kɛ ye nyrã lè ènuɖoɖowo mè, sìgbè ŋùkuvi nène ò? Ènu kèa ŋuti ye be fãnà àɖàsì wè sia wè ɖo.

¹⁴Mù gbà drɛ̃ àlɔ̀ ɖoɖa èlã-kɔ̃ kè àmè bu cã kpɔ dàɖɛ, jè ŋukɔ̀ na wòa gbɔ ò; ne mu nyi nène òa, mì àmè èvèa be àlɔ̀ la va yì kpe lè àgbãa mè.

¹⁵Ɖè susu lè ɖokoe wò mè, so ènu kè la jɔ̀jì na èhawòvia ŋuti, ne wòa nyã lekè wò la wɔ̀ yì e gbɔa.

¹⁶Ɖù ènu kè wo sɔ ɖo àkɔ mè na wòa, sìgbè àmè kè xɔ̀ kpakpla nyuɛ̃ ɖea nène, eye mù gbà na, woa nyã be ènusuɖùtɔ ye wò nyi ò.

¹⁷Nyi àmè cucugbã kè la ɖo àlɔ̀ tèa, ɖo kpakpla nyuɛ̃ kè wò xɔ̀a ŋuti, eye mù gbà ɖè èmɔ̃ be woa kpɔ wò, sìgbè àmè kè mu ɖùnà ènu, ɖɔna pòa nène ò.

¹⁸Ne àmè sùgbɔ lè èkplɔ̃ ŋuti ku wòa, ɖè èmɔ̃ na wo, be woa jè ènuɖùdua kùku, jè ŋùkɔ̀ na wò.

¹⁹Aà! Kpɔ lekè àmè nyanu kè xɔ̀ kpakplaa, kpɔna jìjɔɛ lè ènu vi ɖe mè ɖa! Ne e va yì mlɔ̃ ànyi ɖo àbàti ji vɔ̀a, gbɔ̃gbɔ̃ mu cina pò na ɛ̀ ò. E dɔ̃na àlɔ̃ bɔ̀kɔ̀.

²⁰Àmè kè ɖùnà ènu, ɖo èjrɛ mèa, dɔ̃na àlɔ̃ nyuɛ̃ ɖe; e fɔ̃na ŋùdekɛ̃nyɛ mè kaba, eye be nɔ̀nà lãmèsɛ̃ mè nyuɛ̃ ɖe. Ne àlɔ̃ gbe àmè ɖea, kpɔɖa àdɔ̀mè ɖù àmè ku tutru ye nyina ènusuɖùtɔ be kùxewo.

²¹Ne wo zĩ ji wò be wòa ɖùnu sùgbɔa, yì xixenu, ne wòa tru ì, eye wò la kpɔ vòvo, la fò.

²²Èvi nyè, ɖo èto mù, eye mù gbà crì mù ò, ɖoa, lè vɔ̀vɔ nua, wò la va sè ènyà nyèwo gɔ̃mè. Lè ènu sia ènu kè wò le wɔ̀a mèa, kpɔ e gbɔ, be yèa wɔ̀ ɛ̀ ku susu, eye èdɔ̀lele ɖekpe mu la gogo wò ò.

²³Ne àmè ɖe kpe àmèwo, na ènuɖùɖu tɔ̀xɛa, àmèwo kpata kafuna ɛ̀, ɖoa, ekèa nyi ènyuɛ̃ wɔ̀wɔ be jèsì.

²⁴Vɔ̀a, ne àmè ɖe tènàgbĩ ɖo yebe ènuɖùɖu ŋuti a, èdùa kpata la le è ɖo ènu, ɖoa, wo kã ɖo yebe àŋɔ̀kukua ji. Àhànùnu

²⁵Mù gbà sɔ vɛ̃ nɔ yigò, be yè sɛ̃ŋu ò, ɖo àgbètɔ kèwo vɛ̃ crɔ̃a, sùgbɔ.

²⁶Èkpo be èzò xɔ̀xɔ ɖènà lekè gbɛ̀dɛ tù ègàyìbɔ nyuɛ̃ ɖe ɖoa, fiɔ, vɛ̃ cã ɖènà ègòyitɔwo be nɔ̀nɔmè ŋutɔ ŋutɔa, fiɔ, wàlɛbɛ kè wo le wɔ̀ àjrèa

²⁷Lè àgbètɔwo gbɔa, vɛ̃ ye nyi àgbè be jèsì, ne wo le nù ì lè èjrɛ mèa. Àgbè kɛ ye mi nɔ̀nà, ne vɛ̃ hùetè ɖo mi ò? Lè xixea be gɔ̃mèjèje mèa, Mawu ɖo vɛ̃, ne bèa sɔ nɔ do jìjɔɛ na àgbètɔwo be èjì.

²⁸Vɛ̃ hɛ̃nà jìjɔɛ kpɔkpɔ va, na èjì ku àwuyaya va, na èkla, ne wò le nù ì ɖo èjrɛ mè ku àmè ɖokoe jèsìa.

²⁹Vɛ̃ nùnu sùgbɔa dona vevesèse na èkla, e nana àjrè wɔ̀wɔ ku èkɔ̃ dàda.

³⁰Àhà nù-mu nana be sùkunɔ̀ be àdɔ̀mèze dodo yìnà e ji, kaka hɛ̃nà àjrè va, e gbɔjɔna ɛ̀, eye e pònà ɛ̀ sùgbɔ.

³¹Lè àzãɖù-kplɔ̃ ŋuti, àfi kè vɛ̃ nùnu bɔ lèa, mù gbà kã ŋùmè na nɔ̀vi wò ò; mù gbà do è ŋùkpɛ̃, ne wò kpɔ ɛ̀ lè jìjɔɛ mè ò; mù gbà gblɔ̃ ènyà kè la vea na ɛ̀ ò, eye mù gbà ɖèfũ na ɛ̀ cã, be ne tu èfɛ̃ kè be ɖù ɖo yèa ò.