Read gen Sirasid 32 Bible Online

Sirasid 32 - gen bible

Sirasid 32

¹Nɔ̀nɔmè kè wò la nɔ̀ yì àzãɖùpea Ne wo cã wò be wòa nɔ̀ ŋùkɔ̀ ne àzã ɖea, mù gbà wɔ̀ gãglo, wɔ̀ sìgbè àmè kpɔ̀tɛwo kpò nène. Na wo èmɔ̃ e yomèa va yì nɔ̀ ànyi.

²Ne wò wɔ̀ èdɔdoàsi wòwo keŋu vɔ̀a wòa nɔ̀ ànyi lè jìjɔɛ kpɔkpɔ mè eye wò ŋutɔ cã àpo nɔ̀nɔmèa ne kɔ̀.

³Ne wò nyi àmèsĩsĩa, pò nupo ɖo e jè na wò. Gblɔ̃ ènu kè wò nya pɛpɛ eye mù gba tɔtè èhàa be ji yìyi ò.

⁴Ne àmèwo le ɖoto èhàa, mù gbà nɔ pò nupo ɖo e mè ò, eye mù gbà ɖè àpo nunyanya fiɔ lè wàlɛbɛ ŋua ò.

⁵Èhà jìji lè àzãɖùpea nyi àcɔɖoɖo sìgbè èkpe xɔ̀asì kè nya kpɔkpɔa nène.

⁶Èhà jìji lè àzãɖùpea kè do vɛ̃ nyuɛ̃ kpàsàa, lè sìgbè sìka kɔ̃ lè èkpe xɔ̀asì ɖe ji nène.

⁷Ne wò nyi ɖèkajɛa, mù gbà pò nupo ne mu hiã ò. Vɔ̀a ne e zĩ ji wòa, gblɔ̃ ènyà èvè kpò.

⁸Ne wò la pò nupoa, mù gbà gblɔ̃ ènyà sùgbɔ ò, vɔ̀a viɖe kpò. Nɔ̀ sìgbè àmè kè nya ènyà sùgbɔ vɔ̀a mu pònà nupo òa nène.

⁹Lè àmègãwo dòmèa, mù gbà ji be yèa ze ò. Lè àmèsĩsĩwo dòmèa mù gbà pò nupo kpò ètamè màbu ò.

¹⁰Sìgbè àlekè èjikèzò jènà ŋùkɔ̀ na èjiɖègbèa, nèneke ye màje jènà ŋùkɔ̀ na àmè kè jènàsi ye ɖokoea.

¹¹Ne gàmèa sùa, sitè eye mù gbà ci ŋùgbe ò, pudù yì àxomè eye mù gbà gble lè èmɔ̃ a ji ò.

¹²Lè funua wò teŋu jròwoe, kã àseŋu vɔ̀a mù gbà wɔ̀ ɛ̀ lè nupo pòpo sùgbɔ mè ò.

¹³Lè ènu kèawo keŋu mèa tusì na ɖotɔ wòa, ekè na wò ènuwo lè gbɔsùsu mèa. Do jèsì Mawu be hɔ̃hlɔ̃a

¹⁴Àmè kè jèsì Mawu be gãnyinyia xɔ̀nà nunyanya, eye àmè kèwo fɔ̃nazã jina ɛ̀a, kpɔna yebe ŋuzĩzĩkuku.

¹⁵Àmè kè ɖona èto yebe èsea la ɖɔpò, vɔ̀a àmè kè wɔ̀nà ènubàɖa ku èsea la jè èmɔ̃ tetre mè.

¹⁶Àmè kèwo vɔ̃na Tɔhonɔ̀a, la kpɔ yebe jɔ̀jɔɛ sòso, eye woabe èdɔ nyuɛ̃wo la klɛ̃ sìgbè èzò gãɖe nène.

¹⁷Nuvuɛ̃wɔ̀tɔ mu lɔ̃nà be woa gbe ènyà na yè ò, eye be ɖènà èsea gɔ̃mè lekè be jro ɖoa.

¹⁸Àmè kè le ŋùzɔ̃a mu donakpò ètamè bùbu ò. Àmè nyrãku kudo ègòyitɔa mu vɔ̃na ènu ɖekpekpe ò.

¹⁹Keŋu gbɔ̀xue wò la wɔ̀ ènu ɖekpekpea, bù ètamè so e ŋuti, eye ne wò wɔ̀ ɛ̀ àpo èjì mu la do hùɛ do wò ò.

²⁰Mù gbà sɔ àfɔ̀ku be èmɔ̃ wo ne mù gbà va yì klɛ̃ èkpe ò.

²¹Èmɔ kè ji zìɔ̃a ne ɖo vɔ̃vɔ̃ na wò,

²²lè èvi wòwo dòmè ŋutɔ cã, nɔ̀ àyè ji.

²³Wɔ̀ ànùkua lè ènu sia ènu kè wò le wɔ̀a mè.

²⁴Àmè kè gba ɖo èse ŋutia, wɔ̀nà ɖo eji, eye àmè kè dojì ɖo Tɔhonɔ̀ ŋutia, mu flùnà gbèɖe ò.