Read gen Sirasid 33 Bible Online

Sirasid 33 - gen bible

Sirasid 33

¹Àmè kè vɔ̃na Tɔhonɔ̀a nanasà jɔ̀gbèvuɛ̃ vɔ̀a lè tètèkpɔ be gàmèa e kpɔna gãgã.

²Nunyatɔ xɔ̀nà èsea ku jìjɔɛ lè àyèmènuwɔ̀tɔ gbɔa e lè sìgbè ètɔ̀jihũ kè le dã lè èsì jia nène.

³Nunyatɔ dona èjì ɖo ènyà ŋuti, eye e nana àsìxɔ̀xɔ èsea sìgbè ènyàgblɔ̃ɖɛ nène. Ènumànyatɔ ku Àmèkòtɔ

⁴Ne wò ji be woa ɖoto yèa, jrà ènyà kè wò ji la gblɔ̃a ɖo nyuɛ̃ɖe, eye bɔ̀ ènunyanya woawo e yomèa wò la ɖo ènyà ŋuti.

⁵Ènumànyatɔ be sèse lè lãmèwo lè sìgbè kèkevi be àfɔ̀ku kèwo le troa nène eye yebe susuɖèɖewo cã lè nèneake.

⁶Èxlɔ̃ kè kònà àmèa lè sìgbè èsɔ kè dona àpa wàlɛbɛ kè àmè ɖekpekpe lia ejia nène. Mawu do vòvòtoto ènuwo dòmè

⁷Nukɛ ŋuti ŋùkèkè ɖe tonavò lè èɖe ŋuti ò? Vɔ̀a ŋùkèkèwo kpata lè èpèa mèa xɔ̀nà kɛ̃klɛ̃ so Tɔhonɔ̀ gbɔ ɛ!

⁸Ɖo ènu kè ŋutia Tɔhonɔ̀ ŋutɔ do vòvòtoto woa dòmè eye e ɖo hùenuwo ku àzãgbèwo.

⁹E na àsìxɔ̀xɔ ku ŋutikɔ̀kɔ èɖewo, eye èbuwoa e ɖo wo woa nyi ŋùkèkèwo kpò.

¹⁰Nènea àmèwo keŋu xɔ̀ ŋutilã to èkɔ mè, Adàm cã èkɔ mè wo ɖè è to lè sìgbè àmèwo ke nène.

¹¹Co gãkea Tɔhonɔ̀ ku yebe nunya do vòvòtoto woa dòmè, eye be sɔ wo ɖo èmɔ̃ vòvòwo ji.

¹²E tusì na àmè ɖewo kɔ wo yì ji. E cã èɖewo ne woa tɛ ɖo e ŋuti, e sɛ̃kpɛ̃ na èɖewo eye be ɖiɖi wo, eye e kãkã èbuwo.

¹³Sìgbè bàba lè èzemètɔ be àsiwo mè, eye be zãnà ɛ̀ àlekè be jro èa, nèneake àgbètɔwo cã lè yebe ɖotɔ be àsiwo mèa yeŋu. E trɔna wo sɔ zɔ̃ ɖo yebe èjro ji.

¹⁴Kpã ŋùkɔ̀ èvuɛ̃a, ènyuɛ̃ ye lè, lè èku be ŋùkɔ̀a, àgbè ye. Lè àmè kɔ̀kɔɛ be ŋùkɔ̀a, èvuɛ̃wɔ̀tɔ ye lè.

¹⁵Nènea ye Tɔhonɔ̀ be nuɖoɖowo lèa yeŋu. Wo zɔ̃nà èvè èvè, vɔ̀a tonavò lè woa nɔ̀nɔwo ŋuti. Ɖotɔa le dèŋùgblè so yebe èdɔa ŋuti

¹⁶Lè tɔ̀ nyè gomèa, mù nyi àmè kpɔ̀tɛ kè va le yì èdɔa ji sìgbè àmè kè va le sã vɛ̃tiawo ji be wo ŋlɔ̀be èkusɛ̃sɛ̃ ɖe màa.

¹⁷Vɔ̀a ɖo Tɔhonɔ̀ be sìtu kè be na mùa ŋutia mù xe àmè kpɔ̀tɛawo eye nyè cã àpe vɛ̃ fiɔ̃nua ɖɔ.

¹⁸Mì nya ɛ̀ nyuɛ̃ɖe be mu nyi nyè ɖèka àpe gomè kpò mù le jè àgbàgba ɖo ò. Vɔ̀a ne àmè kèwo kpata le ji ènunyanya ŋuti ye. Àxue ku ènunɔ̀amèsiwo be zãzã

¹⁹Mì ɖo èto mù mìa èdùnyagblɔ̃ha be àmègãwo eye mìa nɔ̀ àyè ji, mìa, bɔ̀bɔwo be kplɔ̀tɔwo.

²⁰Lè àpo àgbè zãwo mè, mù gbà trɔ nyi àgbã na èvi wò àlo èsro wò, nɔ̀vi wò ŋusù, èxlɔ̃ wò ò, mù gbà sɔ àpo nunɔ̀amèsiwo do àsi na wo ò. Ɖo ne e va gble do wò eye wò be yèa trɔ xɔ̀a, wo la sè veve.

²¹Wàlɛbɛ kè wò lè àgbè lè e gbɔa, mù gbà ɖè èmɔ̃ ne àmè ɖeti ne ɖù èji wò ò.

²²E la nyi ènunyuɛ̃ɖe be èvi wòwo ne hiã wò wu ne wòa nyi àgbã na wo.

²³Lè àpo èdɔdoàsiwo keŋu mèa, jè àgbàgba ne wòa nyi àpetɔ eye mù gbà pòɖi àpo àmè nyinyi ò.

²⁴Ne wò kpɔ be yebe àgbèzãwo le ɖo vɔ̀vɔnua, ma àdɔ̀kùnu wòwo. Kluviwo be zãzã

²⁵Ègbe, èkpo, àgbã kpɛ̃kpɛ̃ dodo na èsɔ-àkɛtɛ, vɔ̀a ne kluvia kpɔ̃nɔ, ètodɔ̃ ku èdɔ wɔ̀wɔ.

²⁶Ne wò le ɖo èdɔ ɖo ɖoɖonu na kluvi wòa, wò la vò, vɔ̀a ne wò tàsi ì be bèa wɔ̀ yebe èjronua, e la ji sisi be èmɔ̃.

²⁷Àtikpo ku èlãba nana be ènyìwo bɔ̀bɔ̀nà woa ɖokoe, vɔ̀a kluvi màsè ètonua, èba ye jè na ɛ̀.

²⁸Ɖo èdɔ na kluvi wòa ne mu gbà nɔ̀ ànyi èdɔ ɖe màwɔ ò;

²⁹ɖo èdɔ ɖe màwɔa, hɛ̃nà susu vuɛ̃wo vana.

³⁰Na ne bèa wɔ̀ èdɔ kèwo jèa, eye ne e gbea, do ègà àfɔ̀ na ɛ̀, vɔ̀a mù gbà wɔ̀ ɛ̀ ku àdɔ̀mèvuɛ̃ ò eye mù gba wɔ̀ ènu ɖekpekpe tovò na jɔ̀jɔɛnyinyi ò.

³¹Ne kluvi ɖèka kpò ye lè àsi wòa, lebè na ɛ̀, ɖo lè vevesèse mè ye wò ɖo è lè. Ne ye ɖèka kpò ye lè àsi wòa, sɔ ɛ̀ sìgbè nɔ̀vi wò nène, ɖo e lè veveɖe sìgbè èkla wò ke nène.

³²Ne wò le do àyà na ɛ̀, e ye be sia,

³³èmɔ̃ kɛ ji wò la yì ji to ò?