Read gen Sirasid 35 Bible Online

Sirasid 35 - gen bible

Sirasid 35

¹Àmèhavi ku sɛ̃sɛ̃a Èsea ji kpɔkpɔa ye le nyi vɔsa sùgbɔ wɔ̀wɔ,

²yebe èseawo ŋuti kùkù ɖoa ye le nyi hlùɛ̃gã be vɔsa wɔ̀wɔ.

³Ènunyuɛ̃ wɔ̀ na àmèa lè sìgbè vɔsa àdodoe kè wo wɔ̀ ku èwɔ mɛmɛ nène,

⁴àdɔ̀mènyuɛ̃ be nunana lè sìgbè kàfùkafu be vɔsa nène.

⁵Ènu kè dona jìjɔɛ na Tɔhonɔ̀a ye nyi be woa na àsà èvuɛ̃ ekèa gbà nyɔ wu vɔsa kè klɔna nuvuɛ̃a.

⁶Mù gbà va Tɔhonɔ̀a gbɔ ku àsi gbalo ò,

⁷wɔ̀ vɔsawo kpata, ɖo e nyi Tɔhonɔ̀ be èjro.

⁸Àmè jɔ̀jɔɛ be ènunana nyi vɔsa àdodoe eye yebe hɔ̃huɛ̃a yìnà Èjihũitɔa gbɔ.

⁹Àmè jɔ̀jɔɛ be vɔsa jènà ŋùmè na Tɔhonɔ̀ eye wo mu ŋlɔ̀nàbe ò.

¹⁰Kafu Tɔhonɔ̀ ku àdɔ̀mèfà eye mù gbà dokpò àpo àgblènukuwo be kusɛ̃sɛ̃ cucugbãtɔ̀awo be vɔsa wɔ̀wɔ na ɛ̀ ò.

¹¹Lè àpo vɔsa ɖekpekpe mèa, nɔ̀ jìjɔɛ mè eye ɖè ènunana àkpa èwogɔ̃a ɖovò.

¹²Na ènu Tɔhonɔ̀ sɔ zɔ̃ ɖo àlekè be na wòa ji ku àdɔ̀mè fàa.

¹³Ɖo Tɔhonɔ̀ mu nyi àkpe màdo tɔ ò eye e ɖona e tèpe zè gbɔ̀ zè adrɛ̃. Jɔ̀jɔɛsòso kè so Mawu gbɔa

¹⁴Mù gbà blè Tɔhonɔ̀ ku àpo nunana ò. Mu la xɔ̀ wo ò.

¹⁵Mù gbà kãɖo vɔsa màjɔ̀màjɔ ji ò ɖo Tɔhonɔ̀ nyi kòjoɖotɔ. Eye mu kpɔna àmè ŋùkumè ò.

¹⁶Mu ɖènà wɔ̀amènɔ̀ ɖo vò ò, e ɖonato àmè kè wo le sò màjɔ̀màjɔ na be kuefã.

¹⁷E ɖonato cɔɛvi be àlenana eye mu gbena àhòsì be àpadodo ò.

¹⁸Vɔ̀a e kpɔna yebe àɖàsìwo kèwo srànà to yebe àlɔgo jia

¹⁹eye yebe àpadodoa mu dona hùɛ do àmè kè le do àyà na ɛ̀a?

²⁰Àmè kè le sumɔ Tɔhonɔ̀ sɔ zɔ̃ ɖo yebe èjro jia e ɖonato è eye yebe bìɔbiɔwo yìnà ji boo.

²¹Àmè bɔ̀bɔ̀ ye ɖokoe be kuefã tona jiŋùkusi dò eye gbɔ̀xue e la nɔ̀tèa, e ɖo la kpɔ jiɖùɖu, eye Èjihũitɔa ɖo la xɔ̀ ɛ̀,

²²eye kaka be la sò jɔ̀jɔɛ na àmè kèwo lè jɔ̀jɔɛawo, Tɔhonɔ̀ mu la ci ŋùgbe ò eye mu la gbɔ̃jɛ̃ kaka bèa gli àlĩ na àmè kèwo mu kuna ŋuzĩzĩ ne àmè ò.

²³Yebe àdɔ̀mèzea la blù ɖo dùkɔ̃wo ŋuti kaka na wàlɛbɛ kè be la gbã àmèha mànyanuwo do, eye be la gbã woabe ŋusɛ̃ màjɔ̀màjɔa,

²⁴E la tufɛ̃ na àmèwo sɔ zɔ̃ ɖo woabe èdɔwɔ̀nawo ji, eye e la do e tèpe na wo sɔ zɔ̃ ɖo woabe susuwo ji.

²⁵Mɛmlɛ̃nua e la na ŋùjèje yebe dùkɔ̃a eye be la ne jìjɔɛ to yebe ŋuzĩzĩkukua ji.

²⁶Lè vevesèse be hùenua yebe ŋuzĩzĩkukua nyina nyɔna kè vana sìgbè lekè zòzo be gàmèa, lilikpo kèwo jènà ŋùkɔ̀ na èjijàjaa, va na nène.