Read gen Sirasid 36 Bible Online

Sirasid 36 - gen bible

Sirasid 36

¹Kuefã ɖo Mawu be dùkɔ̃a ta Ku ŋuzĩzĩ na mi xixe kplògòdòa be Mawu

²eye ɖè àpo Mawu nyinyia fiɔ dùkɔ̃wo kpata.

³Àpo àsi sɛ̃sɛ̃a ne sitè ɖo àmèjrowo be dùkɔ̃wo ŋuti ne woa do è jèsi be èwò ye nyi àpetɔa

⁴sìgbè àlekè wò ɖè àpo kɔ̀kɔɛ nyinyia fiɔ lè mia dòmèa, nèneake wòa ɖè àpo gã nyinyia fiɔ lè woa dòmè.

⁵Ne woa jèsi wò sìgbè àlekè mi nya wò be tovò lè ŋuti wòa, Mawu bu mu gbà lè ò.

⁶Gbà wɔ̀ jèsì kèwo mu ɖo gɔ̃mè sèse òa eye wòa gbà wɔ̀ ŋùdãŋùdonuwo.

⁷Ɖè zɔ̃ eye wòa na ŋuti kɔ̀kɔɛ àpo ɖùsi lɔa.

⁸Ɖè àdã wòa fiɔ eye àpo àdɔ̀mèzea ne kɔ̀ ɖo woa ji

⁹Ne wòa crɔ̃ miabe kɛ̃tɔwo eye wòa gbã àmè kèwo sitè ɖo mia ŋutia wo do.

¹⁰Na gàmè memlɛ̃a ne sù kaba eye wòa ɖo ŋùku hùenu kè wò cã ne woa ɖèha àpo ènujɔ̀asu wɔ̀wɔwo.

¹¹Àpo àdɔ̀mèze be èzòa ne crɔ̃ àmè kèwo ye ci àgbèa, eye àmè kèwo le do àyà na àpo dùkɔ̃a ne kpɔ cɔ̃crɔ̃ lè woabe èmɔ ji.

¹²Kãkã kɛ̃tɔwo be ŋùkɔ̀nɔ̀tɔwo be èta, kèwo ye gblɔ̃nà be àmè ɖekpe mu sɔ̀ ku mi ò.

¹³Bɔ̀ Yakɔb be kɔ̀tawo kpata ɖodu.

¹⁶eye wòa trɔ wɔ̀wo sìgbè àlekè wo nɔ̀ xoxoa nène.

¹⁷Tɔhonɔ̀ ku ŋuzĩzĩ na àpo dùkɔ̃ kè ji wò dà àpo nyikɔ ɖoa. Ku ŋuzĩzĩ na Izràɛl kè wò sɔ na sìgbè àpo ŋùkɔ̀ gbevia nène.

¹⁸Ku ŋuzĩzĩ na àpo èdù kɔ̀kɔɛ kè mè àpo vɔsakpea lèa, Yeruzàlɛm àpo jɛ̃gbɔ̃pea.

¹⁹Ziɔ̀n ne ɖɔ ku àmè kèwo sumɔna wòa, eye àpo nɔ̀pea ne ɖɔ ku àpo gogo.

²⁰Ɖù ɖase so Izràɛl àpo dùkɔ̃ kè wò ɖo so gɔ̃mè jèjea ŋuti, eye àpo ènyàgblɔ̃ɖɛwo ne va emè lè àpo nyikɔ mè.

²¹Na àjɔ̀gbè kè wò fìã na àmè kèwo dojì ɖo ŋuti wòa, eye àpo ènyàgblɔ̃ɖɛtɔwo la nyi ànùkuamɛwo.

²²Tɔhonɔ̀ sè àpo sumɔviwo be kuefã, èwò kè nyi àdɔ̀mèfaatɔ ne àpo dùkɔ̃a, àleke be lè ànyigbã kpata jia, dùkɔ̃wo la do è jèsi be èwò ye nyi Mawu so màvɔ sɔ yì màvɔ Jèsìdodo ènunyuɛ̃

²³Àdɔ̀gbo xɔ̀nà nuɖùɖu ɖekpekpe, vɔ̀a nuɖùɖuwo tovò lè woa nɔ̀nɔwo ŋuti.

²⁴sìgbè àlekè àɖe nyana èlãwo be vivia, nèneake èjì nyanua cã jènàsi àjè be ènyàwo.

²⁵Àmè kè be susu mu lè jɔ̀jɔɛ òa hɛ̃nà ènugɔ̃mèmàse vana vɔ̀a àmè kè ɖo nunyanya jɔ̀na ɛ̀. Èsrɔ̃ nyɔnù be cãcã

²⁶Nyɔnù ɖekpekpe la lɔ̃ ɖè ŋusù kè wo sɔ na ɛ̀a, vɔ̀a lè tùgbɛ̀jɛwo dòmèa èɖewo nyɔna wu èbuwo.

²⁷Nyɔnù be nyɔnyɔ dona jìjɔɛ na èsrɔ̃a, eye mu gbà hiãna ènu bu wu eŋua ò.

²⁸Gbà wua, ne e nya nupo pòpo, ku àmè hɛ̃hɛ̃ blɛ̀wùa, àmè ɖekpe mu la sɔ̀ ku èsrɔ̃a ò.

²⁹Àmè kè ɖè nyɔnùa, nyɔnawo be gɔ̃mèjèje kplɔ̀ ɛ̀ do, e ɖo kpeɖoŋutɔ kè sɔ̀ ku ìa, e nyi sɔti kè ŋuti be la gba ɖoa.

³⁰Àfi kè èkpa mu lè òa, nyi fìãfìwo be nɔ̀pe. Ŋusù kè mu ɖè èsrɔ̃ òa, nɔ̀nà èsàɖìɖi ji yì nà kpò, kè mu nyana àfi kè be le yìa ò, e nyina ŋuzĩzĩmɛ.

³¹Àmè kɛ la dojì ɖo àjòglasu bibi ɖe ŋuti ò? Kè tìnàkpo jè fi yè ku funuo? Nèneake e nyi na ŋusù màɖo nɔ̀pe, àmè kè mlɔ̃na àfi kè èzã tù ì lèa.