Read gen Sirasid 37 Bible Online

Sirasid 37 - gen bible

Sirasid 37

¹Èxlɔ̃ lè èxlɔ̃wo mè Èxlɔ̃ ɖekpekpe gblɔ̃nà be: 'Mù nyi èxlɔ̃ wò, nyè cã èxlɔ̃ wò mù nyi!', vɔ̀a èxlɔ̃ kèa be jèjè mèa, àmè ɖewo nyi ì lè nyikɔ tɔ̀tɔ mè kpò.

²Èku be vevesèse kɛ nyi ne àpo èxlɔ̃ vevea va trɔ zũ àpo kɛ̃tɔ!

³Oò èwò kè trɔ kpàtàa, fikɛ wò to so, dɔ ànyigbã kpata ku àmè bèble ò?

⁴Lè jìjɔɛ be hùenua wo la kpɔ èxlɔ̃ kèa lè nɔ̀via ŋuti, vɔ̀a lè vevesèse gã mèa, e trɔna ɖo e ŋuti.

⁵Ne e ɖo nuɖùɖu jia èxlɔ̃ wòa nɔ̀nà ŋuti wò, vɔ̀a ne e ɖo àvũ wɔ̀wɔ be gàmèa, e sɔna yebe àkpoxɔ̀nua.

⁶Ɖoŋùku èxlɔ̃ wò wàlɛbɛ kè wò lè àhùagbe jia, eye gbà ɖo ŋùku ì wàlɛbɛ kè nyɔnawo sù àsi wòa. Ètopòɖotɔ nyuɛ̃ ku vuɛ̃a

⁷Ètopòɖotɔ ɖekpekpe gblɔ̃nà ènu kè be susua, vɔ̀a e jina ye ŋutɔ be gomè kpɔkpɔ.

⁸Jè àyè na àmè kè le pòtoɖo na wòa, jè àgbàgba ne wòa nya ènu kè be le jia ɖo yebe àlèɖùɖu ŋuti ye. Mu nyi nène òa, e la gbe ènu lè ŋuti wò.

⁹Mu gbà gblɔ̃ na wo be: “àfɔ̀ɖèɖe wòa nyɔ”, vɔ̀a la nɔ̀ àzɔ̀ge kpɔ ènu kè la va tù wòa ò.

¹⁰Mù gbà biɔ ètopòɖo àmè kè le fĩkpɔ wòa ò. Eye wla ɖoɖo wòwo do àmè kèwo le hùãŋu wòa.

¹¹Mù gbà biɔ nyɔnù ɖe be ètopòɖo yebe àsusì ò, mù gbà biɔ vɔ̃vɔ̃nɔ̀tɔ ɖe ènyà so àhùa ŋuti ò, mù gbà biɔ ènusàtɔ ɖe ènyà so àjɔdodo ŋuti ò, mù gbà biɔ ènuplètɔ ɖe ènyà so ènupèple ŋuti ò, mù gba biɔ àmè xàtɔ ɖe ènyà so nyàwo ŋuti ò, mù gbà biɔ ènyà àmè nyrãku so lɔ̃lɔ̃ ŋuti ò, mù gbà biɔ èdɔwɔ̀wɔ be ènyà kuviɔ̃tɔ ò, mù gbà biɔ ɛ̀ ènyà sè so èdɔ gãɖe ŋuti ò; àmè kèawo kpata mù gbà biɔ wo ètopòɖo be ènyà ɖekpe ò, mù gbà dojì ɖo woa ŋuti ò.

¹²Vɔ̀a doha ku àmè jɔ̀jɔɛ kè wò jèsia ne wòa teŋu wɔ̀ ɖo èseawo ji, àmè kè be nɔ̀nɔmè la sɔ̀ ku tɔ̀ wòa eye ne wò jè ànyia bèa teŋu le wò sitè.

¹³Ɖoto ènu kè àpo èjì le gblɔ̃ na wòa, ɖo àmè bu ɖe mu lè kè ŋuti wò la dojì ɖo sɔ wu ì ò.

¹⁴Àgbètɔ be jìjigbè sìana ɛ̀ wu ɖìatɔ adrɛ̃ kèwo lè èto ji le sãŋùku ŋutɔa.

¹⁵Vevetɔa e nyi be wòa biɔ èjihũitɔa ne bèa kplɔ̀ wò to èmɔ̃ nyuɛ̃a ji. Nunyanya ɖo la kpeɖo àmè buwo ŋuti

¹⁶Èdɔ ɖekpekpe be gɔ̃mèjèjea bìɔbiɔ nɔ̀nà e ŋuti jè ŋùkɔ̀, e yomèa susu ɖèɖe.

¹⁷Susu ɖekpekpea èjìmè be sona,

¹⁸e ɖènà àlɔ̀zɛ̃ ènɛ̀ to, ènyuɛ̃ ku èvuɛ̃, àgbè kudo èku eye ekè wo zãna eji ejia ye nyi àɖe.

¹⁹Àmè bibi ɖewo nyi ènufiɔtɔ na àmè sùgbɔ, vɔ̀a lè woa ŋutɔ tɔ̀ gomèa wo mu teŋu wɔ̀nà ènu ɖe ò.

²⁰Àmè kè pòna nupo sùgbɔa, wo crìnà yebe ènyà-gbɔ, eye wo tènà ɛ̀ nuɖùɖu ŋutɔ cã.

²¹Ɖo mu xɔ̀ Tɔhonɔ̀ be nunana ɖekpe ò, eye ènunyanya cã hùe do è.

²²Ènunyatɔ ɖewo nyi ì na woa dokoe, eye ènu kè wo ɖènà lè woabe nunyanya mèa ɖènà àlè na woawo ŋutɔ.

²³Ènunyatɔ fiɔna ènu yebe dùkɔ̃ eye ènu kè wo ɖènà lè woabe nunyanya mèa, nyina ènu àdodoewo.

²⁴Ènunyatɔ ɖɔna ku màje, eye àmè kèwo kpɔna ɛ̀a yɔna ɛ̀ sìtumɛ.

²⁵Wo la teŋu hlɛ̃ àgbètɔwo be àgbèzãwo, vɔ̀a Izràɛl be ŋùkèkèawo sùgbɔ gbɛ̀lu.

²⁶Ènunyatɔ la sɔ ŋutikɔ̀kɔɛ sɔ ɖùcrɔ̃ lè yebe dùkɔ̃a mè, eye yebe nyikɔa la nɔ̀ ànyi tɛ̀gbɛ̀. Ènuwɔ̀wɔ ɖo àsi ŋuti

²⁷Èvi nyè jèsi ɖokoe wò lè àpo àgbèzãwo mè, do jèsì nuvuɛ̃ eye wòa na ɛ̀ àsà.

²⁸Ɖo mu nyi ènu sia ènu ye jɔ̀nàjì na àmè ò, eye àmè sia àmè mu kpɔna jìjɔɛ lè ènuwo kpata mè ò.

²⁹Ènuwo mu gbà do ŋùklɛ̃ na wò ò eye mù gbà hlà nuɖùɖu ò,

³⁰ɖo nusuɖùɖua dona èdɔ̀ àmè, eye be hɛ̃nà tutru vana.

³¹Àmè sùgbɔ ku ɖo nusuɖùɖu ŋuti; vɔ̀a àmè kè lena ye ɖokoea nɔ̀nà àgbè dìdi.