Read gen Sirasid 38 Bible Online

Sirasid 38 - gen bible

Sirasid 38

¹Èdɔ̀dàtɔ ku èdɔ̀ Bù èdɔ̀dàtɔ, ɖoa èdɔsɔvi be nyi, ɖo ye cã nyi Tɔhonɔ̀ be ènuɖoɖo.

²Ɖo Tɔhonɔ̀ èjihũitɔa gbɔye be xɔ̀ èdɔ̀dàda be ŋusɛ̃a so sìgbè ènunana xɔ̀xɔ nène so èfìɔ gbɔ.

³Èdɔ̀dàtɔ be nunyanya nana e kɔna èta yì ji, eye àmègãwo nana ɛ̀ kafu.

⁴So kaka ànyigbã be ètùmè ye Tɔhonɔ̀a ɖè àtikèwo to lè, eye àmè nyanu mu gbena wo ò.

⁵Mi nya ɛ̀ be: ku àti gbalo ye Mosè ɖè Mawu be ŋutikɔ̀kɔɛa fiɔ to èsì kɔ̀kɔɛ be nana mè[9], àleke be woa jèsi Tɔhonɔ̀ Mawua be gãnyinyi.

⁶Tɔhonɔ̀ na àmègbetɔ ènunyanya ne woa teŋu kafu ì to yebe ŋùdãnuwo wɔ̀wɔ mè.

⁷To e jia, vevesèsewo kpata fana wàlɛbɛ kè;

⁸àtikèwɔ̀tɔa cakana ènuwoa, kè nana yebe èdɔwɔ̀nawo mu va yìnà ò, eye e nana lãmèsɛ̃ tona so ànyigbã mè.

⁹Èvi nyè ne wò jè èdɔ̀a mù gbà gble ku ì ò, fã yɔ Tɔhonɔ̀ ne bèa dà èdɔ̀a na wò.

¹⁰Sè veve ɖo àpo nuvuɛ̃wo ta, eye wɔ̀ ènu jɔ̀jɔɛ, sɔ jrà àpo èjìmè ɖo.

¹¹Ne ŋutete lè àsi wòa, kù èwɔ àlɔ̀ gògoe ɖe ku lifi kudo àmì hɔ̃huɛ̃ titi, sɔ wɔ̀ vɔsa na Tɔhonɔ̀,

¹²lè ekèa yomèa, yɔ èdɔ̀dàtɔ, ɖo e cã nyi Tɔhonɔ̀ be ènuɖoɖo, ne mu gbà nɔ̀ àzɔ̀ge lè ŋuti wò ò, ɖo wò hiã ɛ̀.

¹³Ɖo èdɔ̀dàtɔwo ɖo ŋutete la teŋu sɔ dà èdɔ̀ ɖewo lè nɔ̀nɔmè ɖewo mè,

¹⁴Ɖo woawo cã wo biɔna ne bèa teŋu do àlɔ̀ wo ne woa kpeɖo èdɔ̀nɔ̀wo ŋuti la dàdɔ̀ na wo, eye woa xɔ̀ wo ɖo àgbè.

¹⁵Ne àmè ɖe jè àgɔ̀ lè Tɔhonɔ̀ jia, ne jè èdɔ̀dàtɔ be àsi mè! Nɔ̀nɔmè kè mè wo la nɔ̀ sɔ wɔ̀ ècɔa

¹⁶Èvi nyè, fã àmè kè kua, sìgbè àmè kè ji vevesèse gãɖe lèa to ŋuzĩzĩ be èhà, jrà àmèkukua ɖo, eye mù gbà ŋlɔ̀be èyɔ̀do kè mè wo ɖì ì ɖo ò.

¹⁷Sè veve, làmɔɛ̃, fã àvi, sɔ ècɔa veveɖe, ŋùkèkè ɖèka àlo èvèa sɔ fã àmè kè yìnugbea, e yomèa ɖè èfũlòvɔa dàɖɛ.

¹⁸Ɖo veve sèse hɛ̃nà èku vana, eye èjì gbãgbã hɛ̃nà gbɔ̀jɔ̀ gbɔjɔ vana.

¹⁹Ŋuzĩzĩmè nɔ̀nɔ sùgbɔa, hɛ̃nà veve sèse kaɖikaɖi vana, eye wo cina sìgbè wɔ̀amènɔ̀ nène.

²⁰Mù gbà na veve sèsea bèa ɖùji wò ò, ɖè tamè bùbu ɖɛ eye kpɔ ŋùkɔ̀gbea.

²¹Mù gbà ŋlɔ̀be be: àmè kè yìnugbea mu gbà trɔ gbɔ̀nà ò; eye àpo vevesèse kaɖi kaɖia la gble ènu lè ŋuti wò.

²²Ɖoŋùku be ènu kè jɔ̀ ɖo e jia, la va jɔ̀ ɖo èwò cã ji, èsɔ̀a e ye, egbèa èwò ye.

²³Ne àmè kua ɖè susu jo lè e ji; ne yebe gbɔ̃gbɔ̃a gbe tɔtè kpòa, ɖoàsi àkɔ na ɖokoe wò. Àlɔ̀nudɔwo be àsìxɔ̀xɔ

²⁴Ènuŋlɔ̀tɔ be nunyanya vana emè to vòvo kpɔkpɔ ji, àmè kè mu ɖo èdɔdoàsi sùgbɔ òa, la teŋu ɖo nunyanya.

²⁵Leke àgblèdàtɔ la teŋu ɖo nunyanya wàlɛbɛ kè ne yebe gòyiyia kpò ye nyi be yèa dà àgblè ku àgblèdèkèkea, eye ènyìwo ne dɔ̃ ɛ̀, eye yebe susu kpò ye nyi be yèa pò nupo ku ènyìsuviwo ò?

²⁶Susu ɖèka kpò ye nɔ̀nà e si. Yèa kù èkpo ɖo àgblèwo mè, eye sɔ kpea yèa nɔ̀ èzã ji na nuɖùɖu ènyìnɔ-viwo.

²⁷Àlɔ̀nu dɔwɔ̀tɔ ɖekpekpe ɖènà àɖàŋù so yebe èdɔ ŋuti lè èzã ku ŋùkèkèa, àtikpàtɔa le kpà ɛ̀; ègàtùtɔa cã le ɖè susu, eye ènuwo zɔ̃nà ɖo jèsìdo ɖe ji, eye lè èzã mèa, àɖàŋùɖèɖe jrànà ènu wo ɖo.

²⁸Gbɛ̀dɛ kè nɔ̀ ànyi ɖo yebe èzũkpe gbɔa, le ɖè susu so yebe èdɔ ŋutia, zòzo kè le to so èkpozoa mèa, hãmà kè le ɖègbè ɖo èto mè na ɛ̀a, yebe ŋùkuvi kèwo le kpɔ àɖàŋù ɖèɖea, woa kpata le dojì trɔ àsi so e ŋuti kaka na gà kè mè èdɔa la sɔ̀gbè pɛpɛpɛa.

²⁹Nènea ke èzemètɔ kè nɔ̀ ànyi ɖo yebe èdɔa kɔ̀, eye be le tro ènuwo ku yebe àfɔ̀a, yebe jiji kpò ye nyi be ènuwo ne zɔ̃ sùu. Eye yebe èdɔwɔ̀nawo kpata nyi ènu hɛ̃hlɛ̃.

³⁰Ku yebe àlɔ̀woa e fãnà baba, yebe àfɔ̀wo nana ɛ̀ dɛ̃dɛ̃, eye be ɖènà susu sɔ jrànà ɛ̀ ɖo, eye lè èzã ŋùtèa, e jrànà èkpoa cã ɖo.

³¹àmè ŋuawo kpata dona jì ɖo woabe àlɔ̀nudɔwo ŋuti, eye àmè sia àmè bina lè yebe èdɔwɔ̀wɔ mè.

³²Ne woa tɔ̀ dɛ̃ lè emèa èdù mu la nyi tùtu ò eye wo mu la teŋu nɔ̀ emè cã ò, wo mu la kpɔ èmɔ̃ cã zɔ̃ lè emè ò, vɔ̀a ne dùmèmègãwo cã bɔ̀a wo mu biɔna wo ènyà ɖe sè ò.

³³Lè bɔ̀bɔ̀pewo wo mu jènàsi wo ŋutɔ cã ò, èzò mu blè wo ne woa nɔ̀ ànyi ɖo kòjoɖotɔwo be àzìkpe ji ò. Wo mu nya ènu ɖe so èsea ŋuti ò eye woabe nunyanya kù ɖo èse kè le kplɔ̀ èdùa, vòvòtoto lè emè. Wo mu kpɔna wo le èlododowo kɔ̀ ŋutɔ cã ò.

³⁴Vɔ̀a wo kùnà ɖo woabe àɖàŋù ɖèɖe ŋuti ètèmàtɔ, eye woabe kuefã kpò ye nyi be yèwoa wɔ̀ yèwo be èdɔa nyuɛ̃ɖe. Vɔ̀a mu lè nène na àmè kèwo bùnà tamè so èjihũitɔa be èsea ŋuti ò.