Read gen Sirasid 39 Bible Online

Sirasid 39 - gen bible

Sirasid 39

¹Ènu kèwo la dɔ̃ èsefiɔtɔ jia Wo kplanu so àmègãxowo be nunyanya ŋuti, eye wo ɖè woa ɖokoewo do vò na ènyàgblɔ̃dɛwo be sèse.

²E lena bè na àmè dìnyiwo be ŋutinyawo eye be ɖona èlododowo be nunyanya mè.

³E kplana ènu so èlododowo ku àlòbalòwo ŋuti, yebe àgbèa kpata mèa, e kùnà ènu mè so ènu wawlawo be gɔ̃mèsèse ŋuti.

⁴Lè àmègãwo dòmèa, èdɔdoàsi lè esi eye àmègãwo lɔ̃nà yebe ènyà-gbɔ, wo dɔ̃na ɛ̀ ɖoɖa èdù buwo mè, ɖo wo nya be e nya ènu sùgbɔ so ènyuɛ̃ ku èvuɛ̃ ŋuti lè àgbètɔwo dòmè.

⁵E jènà àgbàgba be so ŋùdekɛ̃nyɛ fùtùa e yìnà Tɔhonɔ̀ yebe ɖotɔa gbɔ, eye lè Èjihũitɔa be ŋùkumèa e fãnàkue, ɖènà kuku ɖo yebe nuwuɛ̃wo ta.

⁶E blìbɔ̀ na Tɔhonɔ̀, Mawu gã ne bèa ɖɔ ɛ̀ ku ènunyanya kudo ènyàxɔ̀asìwo, eye lè yebe kuefã mèa, e la nɔ kafu Tɔhonɔ̀.

⁷Ènunyatɔa ɖènà èmɔ̃ na yebe nunyanya ku jɔ̀jɔɛsòso ne bèa sɔ jɔ̀ yebe èmɔ̃, bèa ɖèsusu so Tɔhonɔ̀ be àmlìmànuwo ŋuti.

⁸Ènunyatɔa ɖènà kpakpla kè be xɔ̀a fiɔ eye lè zòɖùɖu be èsea mèa, e ɖènà yebe ègòyiyia fiɔ.

⁹Àmè sùgbɔ la nɔ pòmlã yebe nunyanya eye yebe susu mu la tutu gbèɖe ò eye wo mu la ŋlɔ̀be cã ò yebe nyikɔ la nɔ̀ ànyi tɛ̀gbɛ̀ kaka sɔyì.

¹⁰Dùkɔ̃wo kpata la pò nupo so yebe nunyanya ŋuti eye èhabɔ̀bɔa la nɔ kafu ì.

¹¹Ne e nɔ̀ àgbè dìdia yebe nyikɔ la ɖìnyi wu àmè àkpe ɖèka tɔ̀, vɔ̀a e yomèa e la ku bɔ̀bɔɛɖe. Mawu be kàfùkafu ku yebe èdɔwo

¹²Wàlɛbɛ kè mù bù ètamè vɔ̀a mù gbà jro la pò nupo, ɖo mù lè sìgbè wètri kè ɖɔ pɔpɔpɔa nène.

¹³Èvi nyè vevewo mì ɖoto mù, ne mìa sĩ sìgbè Rozà kè mìɔ̃nà ɖo ètɔ̀ toa nène.

¹⁴Mì nɔ̀ sìgbè lifi be hɔ̃huɛ̃ tititi nène eye mì pòse sìgbè lilà nène mì kɔ ègbè yì ji ne mìa jìhà ɖodu, mì tusì na Tɔhonɔ̀a ɖo yebe èdɔwo kpata ta.

¹⁵Mì mlã Tɔhonɔ̀ be nyikɔ, mì gblɔ̃ yebe gãnyinyi, mì jì jìjɔɛhawo, mì po èhàjìnuwo, eye mìa do àkpe gblɔ̃ be:

¹⁶Nusianu kè Tɔhonɔ̀ wɔ̀a nyɔ ŋutɔ eye yebe ɖoɖo lè gàmè ji tututu.

¹⁷Ènyà biɔse ɖe mu la teŋu gblɔ̃ be: “Nukɛ yà ò? Nukɛ ŋuti ò?” ɖo ènu kè ŋutia ènyà biɔse dekpekpe la ɖo gɔ̃mèsèse kè Tɔhonɔ̀ be gàmè, kè Mawu pò nupoa, èsìwo bɔ̀ ɖodu, eye ke ènyà viɖe gbà toso ye numea èsìdowo ɖɔ.

¹⁸Lè yebe ègbèɖèɖe mèa, ènu sia ènu vana emè eye àmè ɖe mu lè, la tɔtè yebe hlùɛ̃ga be èdɔ ò.

¹⁹Àgbètɔwo be dɔwɔ̀nawo kpata lè yebe ŋùkuwo me, ɖekpe mu la bu do è ò.

²⁰So kaka gɔ̃mèjèje kea, e nya ènu kèwo jɔ̀ va yì ku ènu kèwo la va jɔ̀a eye ènu ɖekpe mu wɔ̀nà ŋùdã na ɛ̀ ò.

²¹Mu jè be woa biɔsè be: “Nukɛ yà ò? Nukɛ ŋuti ò?” ɖo ènu sia ènu kè be ɖoa, ɖo yebe àsìxɔ̀xɔ.

²²Yebe sìtua lè sìgbè ètɔ̀ɖɔɖɔ nène kè nana fafa ànyigbãa

²³Dùkɔ̃wo kpata la kpɔ yebe àdɔ̀mèzea, e la nɔ̀ sìgbè lekè be trɔ èsì sɔ wɔ̀ zògbè vejèa nène.

²⁴Na àmèjɔ̀jɔɛwoa, èmɔ̃ kè be ta na woa jɔ̀ tututu, vɔ̀a na èvuɛ̃ wɔ̀tɔwoa, e dɔ ku èmɔ̃ xenuwo.

²⁵So gɔ̃mèjèjea Tɔhonɔ̀ ɖo ènuyuɛ̃wo na àmèjɔ̀jɔɛwo, vɔ̀a na àmè màɖo xɔ̀se ku màwɔ̀ èse woa, ènugbegble lètè kpɔ wo.

²⁶Àgbètɔ be nuzãzã vevetɔwo lè àgbè kèa mèa wo nyi: èsì, èzò, gàkpo, èjè, èwɔ, nyìnɔsi, vɛ̃, àmì, ènudodo

²⁷Ne àmè kɔ̀kɔɛwoa ènu kèawo kpata nyi ènunyuɛ̃, vɔ̀a ne èvuɛ̃wɔ̀tɔwo wo trɔna zũ àfɔ̀kunu.

²⁸Àya ɖewo nyi àya gblènu eye wo ɖo wo ɖo ènugbegble ŋuti, gà ɖewo mèa wo pònà ku àdã eye wo kɔna ènuwo. Lè kòjoɖoɖo zãgbèa, wo gbà pònà sɛ̃sɛ̃ɖe eye wo fana àkɔ na ɖotɔa.

²⁹Èzò, èsìkpe, àdɔ̀toto, èku, ènu kèawo kpata wo ɖo wo ne woa sɔ dɔ̃to na mi.

³⁰Èlã wɔ̀adãwo be àɖuwo, àkeklewo, jàkpàtàwo èwi ènuvèwo kèwo crɔ̃na vuɛ̃wɔ̀towoa.

³¹Wo kpɔna jìjɔɛ ɖo wo wɔ̀ woabe èdɔ. Lè ànyigbã jia, wo nɔ̀nà gbèsɔ̀sɔɛ ne woa yì woabe èdɔwo ji. Ne gàmè sùa wo mu gbena èdɔ gbède ò.

³²So gɔ̃mèjèje kè ènu sia ènu mè kɔ̀ eye kè mù bù ètamèa, mù ŋlɔ̀ wo ɖɛ:

³³“Ènu sia ènu kè Tɔhonɔ̀ wɔ̀a, nyɔ, ne èɖe mu sù òa, e jrànà ɛ̀ ɖo.

³⁴Mì mu gbà nɔ gblɔ̃ be ènukea nyrã wu eŋua ò, ɖo ne gàmèa sùa wo la gblɔ̃ be ènuwo kpata nyɔ.

³⁵Fifìa mì wo ku jìjɔɛ mì kè ènu, jì èhà eye mìa tusì na Tɔhonɔ̀ be nyikɔ!”