Read gen Sirasid 4 Bible Online

Sirasid 4 - gen bible

Sirasid 4

¹Amèlɔ̃dɔwo Èvi nyè, mù gbà tè wɔàmènɔ̀, ènu kè la na be la nɔ̀ àgbè ò. Mù gbà na, àmè kè lè èhìã mè a ne kpɔ àsi wò nu, kaka ŋùkuviwo ne yrɔ̀ lè èta ŋuti na ɛ̀ ò.

²Mù gbà ɖè àsi lè àmè kè àdɔ̀ le wù a ŋuti, ne ɖù àyà ò; eye mù gbà do àdɔ̀mèze na àmè kè jè àkui a ò.

³Mù gbà do àyà, àyà ji, na èjì kè lè vevesèse mè a ò; mù gbà dɔ̃ gàmè, gbɔ̀xue wò a na ènu, àmè kè le hiã ɛ̀, so gbɔ wò a ò.

⁴Mù gbà tù àsi, àmè kè le blìbɔ̀, le le àfɔ̀ na wò a ɖoɖa ò; mù gbà ɖè àpo ŋùmè jo, lè wɔ̀amènɔ̀ gbɔ ò.

⁵Mù gbà trɔ àpo ŋùkuviwo jo lè èhìãtɔ gbɔ ò; mù gbà na ɛ̀ èmɔ̃nu, ne be a sɛ̃kpɛ̃ na wò ò.

⁶Ɖoa ne e sɛ̃kpɛ̃ na wò, lè yebe èkla be vevesèse mè a, yebe Ɖotɔ la ɖo èto yebe kùefã.

⁷Wɔ̀, ne àpo ènu ne jè ŋùmè na àgũ a; nɔ bɔ̀bɔ̀ èta, lè àmègãxowo be ŋùkɔ̀.

⁸Bi èto ɖoɖa wɔàmènɔ̀ gbɔ, ne wò a sɔ jìgbɔ̃ɖɛ be ègbè blɛ̀wù, ɖo ènyà ŋuti na ɛ̀.

⁹Hluɛ̃ àmè kè wo le do àyà na a, jo lè àmè kè le do àyà na ɛ̀ a simè. Mù gbà wɔ̀ àlɔ̀ gblɔ̀dɔ̀, lè èvè dòmè, wàlɛbɛ kè wò le sò kòjo a ò.

¹⁰Nyi ètɔ na ètɔ-cɔ̀ɛviwo, eye nyi èsrɔ̃ na woa nɔ̀wo: ne wò wɔ̀ ekè a a, wò la nɔ̀ sìgbè Èjihuĩtɔ a be èvi nène, eye be la ɖo lɔ̃lɔ̃ na wò, wu ènɔ̀ wò.

¹¹Ènunyã dona èviawo ɖo èji; e lena bè na àmè kèwo jina ɛ̀ a.

¹²Ènunyã be lɔlɔ̃ a, àgbè be lɔlɔ̃ ye be nyi, eye àmè kèwo fɔ̃na ŋùɖekɛ̃nyɛ̃ fùtùu, yì ɖona gò è a ɖɔna ku jìjɔ̀ɛ gã ɖe.

¹³Àmè kè si be sù a la xɔ̀ ŋutikɔ̀kɔ̀ɛ, sɔ ɖùcrɔ̃, àleke be tèpe ɖekpekpe kè be le yì a, Tɔhonɔ̀ tuna sì na ɛ̀.

¹⁴Àmè kèwo sumɔ̃na ènunyã a sumɔ̃na Mawu Kɔ̀kɔ̀ɛ a, eye àmè kèwo lɔ̃nà ènunyã a, Tɔhonɔ̀ lɔ̃na wo.

¹⁵Àmè kè ɖona èto è a la nɔ̀ ɖo kòjo jɔ̀jɔ̀ɛ. Àmè kè tɛna ɖo e ŋuti a la teŋu nɔ̀ ànyi kè mu la vɔ̃ xaxa ɖekpe ò a.

¹⁶Ne e dojì ɖo e ŋuti a, e la xɔ̀ ɛ̀, sɔ ɖùcrɔ̃, eye yebe jìjìmèviwo la le è ɖùɖu ɖo àsi.

¹⁷E la kplɔ̀ ɛ̀ cucugbɔ̃ a, to èmɔ̃ gɔ̃glɔ̃wo, e la hɛ̃ àɖìka so àmè ku vɔ̃vɔ̃ va e ji, e la nɔ̀ do tùkaɖa na ɛ̀, to yebe àmèhɛ̃hɛ̃ mè, kaka sɔ na gà kè mè e la dojì ɖo e ŋuti a, e la do è kpɔ, to yebe ɖoɖowo mè.

¹⁸E yomè a, e la trɔ gbɔ̀ va e gbɔ tututu, eye be la do jìjɔ̀ɛ na ɛ̀, la ɖè yebe ènuwawlawo fiɔ ɛ̀.

¹⁹Vɔ̀ a, ne àmè a trã èmɔ̃ a, ènunyã a la gble è ɖɛ, eye be la ɖè àsi lè e ŋuti, la jo, na yebe cɔ̃crɔ̃.

²⁰Nɔ le ŋùku ɖo hùenuwo ŋuti, eye zɛ̃ na èvùɛ̃ wɔ̀wɔ, èŋù mu gbà kpɛ̃ wò ɖo ɖokoe ŋuti ò.

²¹Ɖo a, ŋùkpɛ̃ ɖe lè kè kplɔ̀nà àmè yìnà èvùɛ̃ mè, eye èbu gbà lè kè nyi ŋutikɔ̀kɔ̀ɛ ku ɖàgbè a.

²²Mù gbà nɔ wɔ̀ àkpɛ̃nyɛ̃ do ɖokoe wò ò, èŋù mu gbà kpɛ̃ wò, kaka ne wò a jè ànyi ò.

²³Mù gbà gbe nupo pòpo, gà kè mè bòhũ be hiã a ò;

²⁴Nupo pòpo mè ye wo jènàsi nunyã lè, eye àɖe ji ye ènufiɔfiɔ zena lè.

²⁵Mù gbà dɔ̃ ènyà, sɔ do èta gũ na nyàwo ò, eye, èŋù ne kpɛ̃ wò ɖo àpo ènu mà-nyã ŋuti.

²⁶Mù gbà ku ŋùkpɛ̃ku na àpo èvùɛ̃ mè huhũ ò, eye, mù gbà susu be yè la kpe àkɔ ku ètɔ̀ sàsra ò.

²⁷Mù gbà bɔ̀bɔ̀ ɖokoe wò na bòmècitɔ ò, eye mù gbà ɖè èmɔ̃ be ŋusɛ̃tɔ ɖe ne do ŋùklɛ̃ na wò o.

²⁸Pò àvũ kaka yì èku mè, ɖo nyàwo ta, eye Tɔhonɔ̀ la wɔ̀ àvũ ɖo èta wò.

²⁹Mù gbà nyi àdãkãtɔ, lè nupo pòpo mè, vɔ̀ a, wò a jo nyi kuviɔ̃tɔ ku èdɔvetɔ lè wɔ̀na mè ò.

³⁰Mù gbà nyi jàŋùta, lè àpo àxomè, vɔ̀ a, wò a jo nyi ɖɔ̀ɖɔ̀ɛnɔ̀, lè àpo sumɔ̃viwo dòmè ò.

³¹Àpo àlɔ̀ mu gbà nɔ kè, nè wò la xɔ̀ ènu a, vɔ̀ a, be a nɔ miɔ̃, ne wò la trɔ ènu a na ò.