Read gen Sirasid 40 Bible Online

Sirasid 40 - gen bible

Sirasid 40

¹Àgbètɔ ɖekpekpe kè Tɔhonɔ̀ ɖoa ɖo àgbã kpɛ̃kpɛ̃ ɖe kaka la ɖro. So wàlɛbɛ kè àgbètɔ lè ènɔa be àdɔ̀mè kpòa, be la gbà trɔ yì ànyigbã be ètù mea tùkaɖawo lè eji.

²Ènu kè xɔ̀nà woabe susuwoa eye be ɖona vɔ̃vɔ̃ na woa ye nyi èku kè la va tù wo lè ŋùkèkè kpɔ̀tɛa mè.

³Àgbètɔwo kpata ɖoɖo ɖèka ye lètè kpɔ wo, àmè kè nɔ̀ ànyi lè fìɔzìkpe ji ku bùbu gãɖea gbàkudo àmè kè lè ŋùkpɛ̃ mè nɔ̀ ànyi ɖo àfi mèa.

⁴So àmè kè do àvɔ biɖibiɖi be àwù ku fìɔkuku lè èta na a, kaka jè àmè kè do ènumàɖìnu ɖea ji.

⁵Àdɔ̀mèze, ŋuhuã, jìbibi, èku be vɔ̃vɔ̃ eye wàlɛbɛ kè wo mlɔ̃ ànyi lè èzã mèa woabe susuwo titɔna.

⁶Jɛ̃gbɔ̃gbɔ̃ viɖe kpò wo kpɔna eye èdrɔ̃ kukuwo titɔna wo eye wo kpɔna àvìmènuwo cã lè woabe èjì mè, wo nɔ̀nà sìgbè àmè kèwo si so àhuàgbe jia nène.

⁷Eye ne wo fɔ̃ gbàdà e wɔ̀nà ŋùdã do wo be ènu viɖe kpòe do vɔ̃vɔ̃ na yèwo.

⁸Jɔ̀gbèvuɛ̃ le ènuɖoɖowo kpata yomè so àgbètɔwo ji yì èlãwo ji, vɔ̀a na àgɔ̀jètɔwo e la nyrã na wo wu zè adrɛ̃

⁹èku àlo èhlɔ̃ dãdã, tìtɔ̀titɔ, àhùa, gbledo gã, ènu kèawo keŋu ye la kpe wo.

¹⁰Jɔ̀gbèvuɛ̃ kèawo kpata lè na àmè màwɔ̀ èsewo, eye ètodɔ̃dɔ̃a xɔ̀ ànyigba kpata ji, ɖo woabe tonumàsea ŋuti.

¹¹Ènu sia ènu kè to so ànyigbã mèa la trɔ yì emè, eye ènu sia ènu kè to so èsì mèa, la trɔ va àpù mè. Màjɔ̀màjɔ nyinyi be nuwuwu

¹²Ènunana sɔ tu ènu lè àmè kudo màjɔ̀màjɔ ɖekpekpe nu la va yì, vɔ̀a ègbèjinɔ̀nɔ ya la nɔ̀ ànyi tɛ̀gbɛ̀.

¹³Àdɔ̀kùnu kè vuɛ̃wɔ̀tɔwo cãna bɔ̀a puna sìgbè ètɔ̀ sàsra nène, eye woa nu la va yì sìgbè èji be ègbèɖèɖe nène.

¹⁴Èdɔ nyuɛ̃wɔ̀tɔ la teŋu kpɔ jìjɔɛ vɔ̀a àmè màwɔ̀ ɖo èse jia la kpɔ cɔ̃crɔ̃.

¹⁵Àmè kèawo be jìjimèviwo la sùgbɔ sìgbè debàyàwo nène, vɔ̀a woabe èkèwo la mìɔ̃ ɖo èkpewo ji.

¹⁶Èzò pluti kè mìɔ̃nà ɖo ètɔ̀ toa, wo ɖènà ɛ̀ jo kaba gbɔ̀xue va ɖènà ègbe kpɔ̀tɛawo jo.

¹⁷Àdɔ̀mènyuɛ̃ wɔ̀wɔa lè sìgbè pàradisò nène, eye wɔ̀amènɔ̀ be àlɔ̀do mu la sò gbède ò. Ènunyuɛ̃ ku àdodoea

¹⁸Woa sù na àmè ɖokoea nyi ènu nyuɛ̃ɖe eye ne wo sɔ èdɔwɔ̀wɔ kpea, àgbèa nɔ̀nà bɔ̀kɔ̀, vɔ̀a ne wo kè ɖo àdɔ̀kùnu ŋutia e gbà nyɔ wu.

¹⁹Èvi sùgbɔ nɔ̀ àmè si teŋu sɔ sò èdùa nana nyikɔ nyuɛ̃, vɔ̀a nyɔnù àdodoe kè ŋuti kpɔ gblɔ̃ ɖe mu lè òa nyɔ wu.

²⁰Vɛ̃ ku èhàviviwo dona jìjɔɛ na àmè be èjì, vɔ̀a wu ekèa woa ɖo lɔ̃lɔ̃ na ènunya a gbà nyɔ wu.

²¹Èzè ku kàsãŋùguwo nana èhàgbè viviwo, vɔ̀a ènyà nyuɛ̃ gbɔ̃gblɔ̃a gbà nyɔ wu.

²²Màje ku nyɔnyɔa jɔ̀nàjì na ŋùkuvi, vɔ̀a àgblè do àmàwo nyɔ wu.

²³Èxlɔ̃ ku xlɔ̃wo jina woa nɔ̀nɔwo kpɔ, vɔ̀a àsu ku àsì nyɔ wu.

²⁴Nɔ̀viwo kudo àlɔ̀dotɔwo la kpe ɖo ŋuti wò lè gàpòpo sɛ̃ŋuwo mè, vɔ̀a àlɔ̀do ne wɔ̀amènɔ̀ nyɔ wu.

²⁵Sìka ku klòsalò nana jìdopò, vɔ̀a ètopòɖo nyuɛ̃ nyɔ wu woa kpata.

²⁶Àdɔ̀kùnu ku ŋusɛ̃ nana àgbɔ̃jèpò, vɔ̀a Mawu vɔ̃vɔ̃ nyɔ wu woa kpata ɖo Mawu be vɔ̃vɔ̃ mè ye àlɔ̀do sona.

²⁷Tɔhonɔ̀ vɔ̃vɔ̃ lè sìgbè pàradisò nène eye yebe gogoa cɔ̃na àmè ji. Mì mu gbà nɔ̀ ènubiɔtɔ be àgbè ò

²⁸Èvi nyè mù gbà nɔ̀ àgbè ɖo ènu biɔbiɔ ŋuti kpò ò, ɖo ne wò kua e nyɔ wu ne wòa nyi ènubiɔtɔ

²⁹Àmè kè le bìaŋù nɔ̀via be ènuɖùɖua, be àgbèa mu ɖì àgbè ò. E le pòɖi ye dokoe ku ènuɖùɖu kè mu hlɔ̃ na òa. Àmè kè nyi ènunyatɔa, gbena nu lè ènuwo ŋuti.

³⁰Ènu kè èŋùmàkpɛ̃tɔ wiwea, vivina na ɛ̀, vɔ̀a e va trɔ na zũ èzò hɛ̀hɛ̀ lè yebe àdɔ̀mè.