Read gen Sirasid 41 Bible Online

Sirasid 41 - gen bible

Sirasid 41

¹Èku O èku, wò ɖo vɔ̃vɔ̃ na àmè kè lè kpoo lè yebe nyɔnawo dòmè eke ènuwo kpata zɔ̃nà sù na eye be la gbà teŋu kpɔ jìjɔɛa.

²O èku àpo kòjoɖoɖoa nyɔ na àmè kè lè èhiã mè eye ŋusɛ̃ vɔ̀ naa, àmè sĩsĩ kè ji ètamè bùbu sùgbɔ lèa, àmè jè àgla kè ŋùɖo cã bu naa.

³Èvi nyè mù gbà vɔ̃ èku ò, ɖo ŋùku àmè kèwo jè ŋùkɔ̀ na wòa ji, gbà ɖo ŋùku àmè kèwo la jè yò wò mèa

⁴Èku nyi vɔ̃vɔ̃ be ènu kè Tɔhonɔ̀ sɔ dà ɖɛ na ènuɖoɖowo kpata. Nukɛ ŋuti mi la dɔ̃ ènyà so Tɔhonɔ̀ be èjrowo ŋuti ò, ne mi nɔ̀ àgbè èpè èwo, èkàvètakpo àlo èpè èkàwivɔàtɔ̃ ŋutɔ cã, lè èkuwodea, mu ɖì ènu ɖekpe ò. Àmè vuɛ̃wo be ètodɔ̃

⁵Vuɛ̃wɔ̀tɔwo be èviwo trɔna zũ èvi jè àglawo, ekèwo dona èha ku àmè kèwo mu ɖo xɔ̀se òa ku èse ji màwɔ̀ tɔwo.

⁶Nuvuɛ̃wɔ̀tɔwo be èviwo be ècrɔ̃nuwo yìnà cɔ̃crɔ̃mè, eye woabe jìjimèviwo xɔ̀nà kpɛ̃sɛ̃ kè mu tutuna òa.

⁷Àjìtɔ kè mu lè sɛ̃sɛ̃ ɖe mè òa, èviawo la kpɔ ŋùmè na ɛ̀ ɖo woabe gbledoa so e gbɔ.

⁸Bàbà na mì, àmè kèwo crì Mawu èjihũitɔa, eye mì gbe yebe èsea.

⁹Wo jì mì na jɔ̀gbèvuɛ̃ eye ne mi gbà ku cã jɔ̀gbèvuɛ̃a gbà nɔ̀tè kpɔ mì.

¹⁰Ènu sia ènu kè to so ànyigbã mèa la gbìgbɔ̀ trɔ yì emè, vɔ̀a àmè kè crì Mawua, la jo lè jɔ̀gbèvuɛ̃ mè gɛ̃ ɖo cɔ̃crɔ̃ mè. Nyikɔ nyuɛ̃ xɔ̀xɔ

¹¹Àgbètɔ be ŋutilã mu nyi ènu ɖekpe ò, vɔ̀a èvuɛ̃wɔ̀tɔwo be nyikɔa la tutu.

¹²Jè àgbàgba ne nyikɔ nyuɛ̃ wòa ne nɔ̀ ànyi tɛ̀gbɛ̀, e nyɔ wu sìka kɔ̃ èkàwìvɔàtɔ̃.

¹³Àgbè nyuɛ̃ nɔ̀nɔa ŋùkèkè ɖewo kpò ye, vɔ̀a nyikɔ nyuɛ̃ nɔ̀nà ànyi tɛ̀gbɛ̀. Nukè la teŋu do ŋùkpɛ̃ àmè a

¹⁴Èvi nyèwo, mì lebè na kpakpla kè mì xɔ̀a lè ŋutifafa mè. Ènunyanya kè lè wawla mèa ku àdɔ̀kùnu màkpɔ màkpɔ, èvè kèawoa àlè kɛ wo la teŋu ɖè ò?

¹⁵Àmè kè sɔ yebe sùkunɔ̀ jɔ̀jɔ le wlaa, ɖo àsìxɔ̀xɔ wu àmè kè sɔ yebe ènunyanya le wla a.

¹⁶Lè tɔ̀ nyè gomèa, mù la gblɔ̃ ènu kè nyi ŋùkpɛ̃ ŋutɔ ŋutɔa na mì ɖoa mu nyɔ be woa nɔ̀ ŋùkpɛ̃wo kpata dòmè ò, eye woa kpata cã mu ɖo gɔ̃mèsèse nyuɛ̃ɖe ò.

¹⁷Ènu kèwo mè èŋù la kpɛ̃ mì lèa ye kè: mìabe àhasì wɔ̀wɔ lè mìabe àjìtɔwo be ŋùkɔ̀, àjèɖàɖa lè mìabe ŋùkɔ̀nɔ̀tɔwo be ŋùkumè.

¹⁸Lè kòjoɖotɔwo ku ènyà sòtɔwo be ŋùmè, ènu kpòtoewo be wɔ̀wɔ, lè dùkɔ̃a be ŋùkɔ̀a èse ji dàda eye lè èxlɔ̃ ku èxlɔ̃wo dòmèa àɖìkunuwɔ̀wɔ.

¹⁹Mu sɔ̀gbè be lè mìabe àxue kɔ̀tɔwo dòmèa mìa nyi fìãfì ò. Èŋù ne kpɛ̃ mì lè Mawu be nyàwo ku yebe zòdùdua be ŋùkɔ̀, mì mu gbà biɔ kpɔ̃nɔ kè mì la ɖù ò eye mì mu gbà na ènu ku èjìmè pòɖi ò.

²⁰Mì mu gbà gbe ègbè xɔ̀xɔ na àmè kèwo le do ègbè na mì ò, èŋù ne kpɛ̃ mì ne mì le le ŋùkuvi ɖo àhasìtɔ ŋutia,

²¹mù gbà ɖo vlo nɔ̀vi wò lè àmè dòmè ò, mù gbà gbĩ ènu kè nyi àmè ɖe tɔ̀a lè e si ò, mù gbà kpɔ àmèsrɔ̃ ku ŋùku vivi ò.

²²Kpɔ ɖokoe wò lè èkàdodo kè la nɔ̀ àpo èdɔsɔvi nyɔnù ku dokoe wò dòmè, mù gbà gogo yebe àba ò. Mì mu ɖo la zũ mìa xlɔ̃wo àlo la gblɔ̃ ènyà veve na wo lè àmè dòmè ò, ŋùku mu gbà nɔ̀ ènu kè mì naa yomè ò.