Read gen Sirasid 42 Bible Online

Sirasid 42 - gen bible

Sirasid 42

¹Lè ènu, ne mù gbà nɔ jra ènyà kè wò sèa ò, ne mù gbà ɖè ènyà kè wo wlaa, sia ò. Èkèa be wɔ̀wɔ ne nyi ŋùkpɛ̃ na wò eye àmè ɖekpekpe la kpɔ wò ku ŋùku nyuɛ̃. Ènu kè mu nyi ŋùkpɛ̃ òa Vɔ̀a mù gbà ɖo ŋùkpɛ̃ ɖo ènu kèawo ŋuti ò eye mù gbà xà ɖo woa ŋuti ne wòa wɔ̀ ènuvuɛ̃ ò.

²Mù gbà kpɛ̃ŋù ɖo Jihũitɔa be Èse ku zòɖùɖua ŋuti ò, kaka jè ènyàsòso kè le ɖè kunù na àmè kè crì Tɔhonɔ̀a ŋuti ò.

³Mù gbà kpɛ̃ŋù ɖo àgbã kè wò la bù ku èmɔ̃ zɔ̃xlɔ̃ ku èmɔ̃ zɔ̃tɔwoa ŋuti ò, kaka jè ècrɔ̃nu kè wò la ma ku àmè buwoa ji.

⁴Èŋù mu gbà kpɛ̃ wò ɖo ènudànu ku èkpedànuwo be gbèjinɔ̀nɔa ŋuti ò, àlo ne wòa xɔ̀ àlè viɖe àlo sùgbɔ ò,

⁵àlo ɖo àlè kè àjɔdotɔwo kpɔna so ènusàsa mèa ŋuti ò, Èŋù mu gbà kpɛ̃ wò ne wòa hɛ̃ èto na èvi wòwo eji eji ò, àlo wòa pò àmègbɔnɔ̀vi wò ɖe be àxàdamè kaka bèa sò èhũ ò.

⁶Ne wò ɖè nyɔnù ŋùkudrɛ̃tɔa, ènutunua nyi ènu ɖè àlè, eye fikè àlɔ̀wo sùgbɔ lèa, nɔ tu èhɔ̃ do àpo ènuwo.

⁷Ènu kè wò pòtɛ ɖɛa, na woa hlɛ̃ ɛ̀ eye woa dà ɛ̀. Ènu kè wòle na, àlo kè wò le xɔ̀a, na woa ŋlɔ̀ e kpata dà ɖɛ.

⁸Èŋù mu gbà kpɛ̃ wò ne wòa hɛ̃ èto na bòmècitɔ àlo hɔ̃vi ò, àlo àmè sĩsĩ kè ŋuti wo le gblɔ̃ àhasì wɔ̀wɔ be ènyà so ò. Nènea, wò la ɖèfiɔ be yè xɔ̀ kpakpla nyàwo eye àmèwo kpata la xɔ̀ wò. Ètɔ be susu ɖo èvia nyɔnù ŋuti

⁹Nyɔnùvi jìji nyina flima cici na ètɔa, ènuxàxa kè be hɛ̃nà va, kãnà àlɔ̃: ɖo lè yebe tùgbɛ̀jɛ mèa, e teŋu bu ègbè ji nɔ̀nɔ jè ŋùkɔ̀, eye ne e va ɖèsrɔ̃ vɔ̀a, èsrɔ̃a teŋu va crì ì fàa.

¹⁰Wàlɛbɛ kè be nyi tùgbɛ̀jɛ lè àlɔ̀jia, wo teŋu gble è eye e la fɔfu lè ètɔa be àxomè; Kè e wɔ̀ ɖèka ku èsrɔ̃a ŋusù vɔ̀a, e teŋu va trɔ ègbè ji mànɔ̀tɔ, eye lè èsrɔ̃a be àxomè coa, e la teŋu ci èkònɔ̀.

¹¹Lè èvi nyɔnù màɖù ye ɖokoe jia ŋutia, na àmèɖiaɖia wòa ne sɛ̃ŋu kpe è ne mu gbà sɔ wò wɔ̀ gbɔɖìnu lè kɛ̃tɔ wòwo gbɔ ò, èhàmèlo lè èdùa mè ku àmèha gbɔ ò eye èŋù bèa kpɛ̃ wò lè yebe ènyà ɖe be wɔ̀wɔ mè lè àmè dòmè ò.

¹²Èvi wò nyɔnùvia mu gbà le ŋùku ɖo ŋusù ɖe be nyɔnyɔ ŋuti ò eye mu gbà nɔ̀ ànyi ɖo nyɔnùwo dòmè ò.

¹³Ɖo sìgbè lekè bìbìviwo tona so àwùwo mèa nènea ye èkunyànyrã tona so nyɔnùwo mèa yeŋu.

¹⁴Ŋusù be àkpɛ̃nyɛa nyɔ wu nyɔnù be àdɔ̀mènyuɛ̃! Nyɔnù ye hɛ̃nà ŋùkpɛ̃ ku èzũ vana. ÈNUFIƆFIƆ ÀKPA ÀTƆ̃GƆ̃A Mawu be gogoa

¹⁵Mù le jro fifì be ma ɖo ŋùku Tɔhonɔ̀ be èdɔwo ji, ne ma kã ènu kè mù kpɔa, be àseŋu. To Tɔhonɔ̀ be ènyàwo jia, yebe ènuɖoɖowo kpata lè. Ènu kè be ɖoa, le sè ègbè na ɛ̀.

¹⁶Èwè kè klɛ̃naa, le kpɔ ènuwo keŋu eye Tɔhonɔ̀ be wɔ̀na ɖɔ ku yebe gogo.

¹⁷Tɔhonɔ be àtikplɔtɔwo ŋutɔ mu la teŋu gblɔ̃ yebe ŋùdãnuwo kpata ò, kèwo Tɔhonɔ̀ àhùadù Mawua li dà ɖɛ goŋu, ne xixe kplògòdòa ne kpɔ ŋusɛ̃ lè yebe gogoa mè.

¹⁸E jrònà ègũ glòbòa ku èjìwo mè kpɔ, e ŋɔna woabe àyèmènuwo mè jè gàglàgbè, ɖoa Jihũitɔa ɖo nyanya ɖekpekpe, e le ŋùku ɖo hùenuwo be jèsìdowo ŋuti.

¹⁹E ɖènà àvɔ lè èsɔ̀ kè va yìa ku èsɔ̀ kè gbãnàa ŋuti eye e ɖènà ènu wawlawo be dosiawo fiɔ.

²⁰Susu ɖekpe mu bè do è ò, ènyà ɖèka tètè mu nɔ̀nà wawla mè na ɛ̀ ò.

²¹E ɖo yebe ànyasã be wɔ̀na jɔ̀asuwo kudo ɖoɖo, ɖoa e ya lè, jè ŋùkɔ̀ tɛ̀gbɛ̀dò kaka sɔyì màvɔ. Wo mu sɔ ènu ɖe tɛ ò, wo mu la ɖè ènu ɖe lè e ŋuti ò, eye mu hiã ètopòɖotɔ ɖe ò.

²²Oò, Tɔhonɔ̀ be wɔ̀nawo keŋu nya kpɔ, kaka va jè èzòklɛ̃vi tukui kè wo teŋu glò kpɔa ji!

²³Ènu ŋuawo keŋu lè àgbè eye wo lè tɛ̀gbɛ̀ na hiãhiãwo kpata eye ènuwo keŋu le sètonu.

²⁴Ènuwo kpata le zɔ̃ èvè èvè, èɖe kpãŋùkɔ̀ ɖetɔa eye ɖekpe mu lè ci àkãna ò.

²⁵Èɖe dona ŋusɛ̃ èbu be nyɔnyɔa. Àmè kɛ teŋu ɖɔpò lè yebe gogoa be kpɔkpɔ mè ò?