Read gen Sirasid 43 Bible Online

Sirasid 43 - gen bible

Sirasid 43

¹Tɔhonɔ̀ wɔ̀ ènuwo keŋu Àcɔ ɖoɖo kɛ le nyi jiŋùkusi be kɔ̀kɔ tèpewo si! Ènu nya kpɔkpɔ kɛ nyi jiŋùkusi ne wo le kpɔ yebe gogoa ò!

²Èwè kè le ɖè ye ɖokoe fiɔ, lè yebe zɛ̃zɛ̃ mèa, le ɖè ŋùdãnu kè lè Jihũitɔa be wɔ̀na fiɔ.

³Lè gà woèvè mèa, e puna ànyigbã, àmè kɛ la teŋu nɔ̀te lè yebe zòzo nu ò?

⁴Èzò gbɛ̀dɛa pònà èzò na èdɔ kè be le wɔ̀a, vɔ̀a èwè kè bìnà ètowoa nana wo zòzo ŋua be tèpe ètɔ̃ sɔ̃ŋu. E ɖènà yebe zòzo fiɔ̃nuwo to, eye e dànà yebe àlɔ̀zɛ̃wo, e titɔna ŋùkuviwo ŋutɔ cã.

⁵Tɔhonɔ̀ kè ɖo èa lòlò; to yebe ènyàwo jia, e jɔ̀nà èmɔ̃ na yebe èdù sisia.

⁶Wètria cã, lè yebe àzã jia, e ɖènà hùènuwo be jèsìdowo ku gàmè be dosia fiɔ.

⁷Wètri gbɔ ye àzã ɖùɖu be dosia sona, Yebe kèke mè ɖènà kpɔ̀tɔ̀ lè vɔ̀vɔ nu.

⁸E ye mè ye àzã be wètri xɔ̀nà yebe nyikɔ lè; e sĩnà ŋùdãŋudotɔ̀ lè yebe nɔ̀nɔmè tɔtrɔ mè, e xɔ̀nà ŋùkɔ̀ na wètriviwo lè èjihũi, klɛ̃na ŋutɔ ku yebe kɔ̀kɔa.

⁹Jiŋùkusi be nyɔnyɔa ye nyi ènukɛ̃klɛ̃wo be gogoa, àcɔɖoɖo kɛ̃klɛ̃tɔ̀ lè Tɔhonɔ̀ be èji bowo.

¹⁰To Tɔhonɔ̀a be ènyà jia, wo nɔ̀nàtè zɔ̃ ɖo yebe ègbèɖèɖe ji, àgbɔ̃ mu kpena wo lè woabe èzãŋùtè nɔ̀nɔa mè ò.

¹¹Kpɔ ànyiɖohùɛɖo ɖa eye pòɖɛ̀ na àmè kè wɔ̀ ɛ̀a, e nya kpɔkpɔ ŋutɔ lè yebe nyiɖìɖia mè.

¹²E trènà gogo be èflì klòbòtò ɖo jiŋùkusi, Jihũitɔa be àsiwo ye kèkènà wo.

¹³To yebe ègbèɖèɖe mèa, e tuna èsìwɔ, e dànà bìɖàwo ɖoɖa sìgbè yebe ènyàsòso be kpòvitɔwo nène.

¹⁴Ekèa ŋuti ye èsìwo nu hũnà, eye lilikpowo zrònà sìgbè xeviwo nène.

¹⁵Lè yebe gãnyinyi mèa, e na lilikpowo trìnà, wo srènà trɔna èsìkpeviwo.

¹⁷Yebe hɛ̀bìɛsò be ègbèɖèɖe wɔ̀nà be ànyigbã lena kua, ne ètowo kpɔ ɛ̀a, wo hũhũna. Lè yebe èjro mèa, ye àpùgo be àya pònà, àvego be àya vùdù ku àya totro cã. Sìgbè xèvi kèwo le ɖiɖi va gɔ̃mè nènea, e kãkãnà èsìwɔa, sìgbè hùesuvi kè va xana ènu nènea, e gɛ̃na.

¹⁸Yebe ɣeɣe be nyɔnyɔa wɔ̀nà ŋùmè yàa, eye ne e le gɛ̃a, èjì jɔ̀nà àmè.

¹⁹Sìgbè èjè nènea e ɖùɖùnà èsìwɔa ɖo ànyigbã ji, eye e trɔna sìgbè àŋùja piɖoewo nène.

²⁰Àvego be àya fafa pònà eye àvìvɔsu wɔ̀nà èsìkpe lè èsì be ŋùkɔ̀. E ɖo àba ɖo ètɔ̀ sia ètɔ̀ be ŋùkɔ̀, eye e cɔ̃ ɛ̀ sìgbè àkɔtacɔ̃nu ɖe nène.

²¹E mìnà ètowo eye e fiɔ̃na zògbe, e bìnà ègbewo sìgbè èzò nène.

²²Vɔ̀a àhũjàja pòsì hɛ̃nà èdɔ̀dàda vana. eye àhũ kè jànà lè èzã yomèa, gbà hɛ̃nà jìjɔɛ vana.

²³Sɔ zɔ̃ ɖo yebe ɖoɖoa jia, Tɔhonɔ̀ ɖù àpùwo ji eye e li ètɔ̀dòmèkɔ̃ɛwo ɖo e ji.

²⁴Àmè kèwo zɔ̃nà àpù jia, le pò nupo so yebe àfɔ̀kuwo ŋuti, eye mi mu xɔ̀nà ènu kè mi sèa ji sè ò.

²⁵Funua ènu ɖoɖo jiŋɔwo ku ŋùdãtɔ̀wo lè, èlã be èhasòso vòvòvowo kudo àpùmè be nukpekpewo be kɔ̀ta lè.

²⁶To e jia, yebe àŋɛ̀dotɔa kpena ènu ji, eye to yebe ènyà jia, ènu ɖekpekpe zɔ̃nà sù.

²⁷Mi teŋu gbà gblɔ̃ ènyàwo fuu, vɔ̀a mi mu la ɖo vɔ̀vɔnu ò; miabe nupowo be tètɔpe yekè: E nyi e kpata.

²⁸Fikɛ wo la kpɔ ŋusɛ̃ so la sɔ kafu ì ò? Ɖoa e ye nyi Gã, e wugã yebe èdɔwo kpata.

²⁹Tɔhonɔ̀ jiŋɔ eye e gbà le gã ɖù blibo eye yebe hɔ̃hlɔ̃a wɔ̀ ŋùdã.

³⁰Ne mia kafu Tɔhonɔ̀a, mì do è ɖo ji kaka kè mì teŋua, e la gbà wugã kpò e. Ne mia sɔ kafu ìa, mì zã mìabe ŋusɛ̃ sùgbɔ, ènu mu gbà tìkɔ̀ na mì ò, ɖoa mì mu la ɖo sɛ̃pea ò.

³¹Àmè kɛ ye kpɔ̀ ɛ̀ ne bèa teŋu pònu so e ŋuti ò? Àmè kɛ sù la kafu ì sɔ kù ɖo ènu kè be nyia ŋuti ò?

³²Ènu sùgbɔ fuu gbà lè wawla lè ekèawo ŋuti, ɖoa yebe wɔ̀nawo be viɖe kpò mi kpɔ.

³³Ɛ̃ɛ nyàwo, Tɔhonɔ̀ ye wɔ̀ ènuwo keŋu, eye e sɔ ànyasã na àmè kèwo le jia.