Read gen Sirasid 44 Bible Online

Sirasid 44 - gen bible

Sirasid 44

¹Ètɔwo be kafunya Mì na mia gblɔ̃ kafunya so àmè ɖìnyiwo ŋuti, so miabe ètɔwo lè woabe jìjimèwo mè ŋuti.

²Tɔhonɔ̀ ɖo ŋutikɔ̀kɔɛ sùsui, yebe gãnyinyi lè so xoxo xòxò;

³àgbètɔ ɖewo ɖù èga lè woabe fìɔduwo mè, nyi àmè ɖìnyiwo ɖo woabe hɔ̃hlɔ̃a ŋuti, ètopòɖotɔwo ɖo woabe nunyanya ŋuti, ènyàgblɔ̃ɖɛwo be àŋɛ̀dotɔwo,

⁴dùkɔ̃wo be kplɔ̀tɔ ɖo woabe ètopòɖowo ŋuti, ɖo woabe nunyanya lè dùkɔ̃ kpakpla ŋuti kudo woabe nufiɔàmè be ànyasã be ènyàwo ŋuti.

⁵Wo kpà èhà viviwo, wo ŋlɔ̀ àɖàŋù be àseŋuwo.

⁶Àmè àdɔ̀kùnɔ̀wo, wo ɖɔ ku hɔ̃hlɔ̃, wo nɔ̀ àgbè lè ŋutifafa mè lè woabe nɔ̀pewo.

⁷Àmè kèawo kpata xɔ̀ kafu so woabe hùènumɛwo gbɔ eye kè wo gbe lè àgbè kpòa, wo le kafu wo.

⁸Àmè ɖewo lè woa dòmèa gble nyikɔ ɖɛ kè wo la sɔ nɔ gblɔ̃ woabe mamlãwo.

⁹Ɖewo cã nɔ̀ ànyi kèwo mu gble ŋùɖo ɖe ɖɛ ò, wo crɔ̃ sìgbè wo mu jɔ̀ kpɔ ò nène, wo lè sìgbè wo mu nɔ̀ ànyi kpɔ ò nène, nèneake be lè na woabe èviwo lè woa yomè.

¹⁰Vɔ̀a kpɔ ènyuɛ̃mɛ ŋuawo ɖa wo mu ŋlɔ̀be woabe èdɔ nyuɛ̃wo ò.

¹¹Woabe àdɔ̀kùnuwo le yì na woabe jìjimèviwo, woabe ècrɔ̃nua jè woabe àlìmèviwo simè.

¹²Woabe jìjimèviwo le wɔ̀ ɖo èdɔ-doàsiwo ji eye woabe èviwo cã le wɔ̀ ɛ̀ to woa ji.

¹³Woabe jìjimèviwo la nɔ̀ ànyi tɛ̀gbɛ̀ eye woabe ŋutikɔ̀kɔɛa mu la bu vĩĩ ò.

¹⁴Wo ɖì woabe ŋutilã lè ŋutifafa mè eye woabe nyikɔ gbà lè àgbè na jìjimèwo kpata kpata.

¹⁵Dùkɔ̃wo la gblɔ̃ ènyà so woabe ànyasã ŋuti eye àmèha la ɖèha woabe kàfùkafua. Henɔ̀k

¹⁶Henɔ̀k be ènu jè ŋùmè na Tɔhonɔ̀ eye wo ɖɔ̀lì tèpe na ɛ̀; e nyi dɛ̃ɖɔ̀li be kpɔwɔɛ na jìjimèwo. Nɔà

¹⁷Nɔà, jɔ̀jɔɛtɔ, wo kpɔ yebe bliboɖùɖua; lè àdɔ̀mèze be hùènua, e va trɔ zũ èkètoto yeye. Xà ɖo eya ŋutia, nuku kpɔ̀tɔ̀ nɔ̀ ànyi lè ànyigbã ji gà kè mè èsì ɖɔɖɔ dùgbàjàa va.

¹⁸Tɔhonɔ̀ wɔ̀ zòɖùɖu kòkòɖàbì kudo è àleke be ènuɖoɖo ŋutilã mètɔ̀ ɖekpekpe mu gbà crɔ̃ to èsì ɖɔɖɔ gã mè ke ò. Abràham

¹⁹Àmègã ŋua Abràham, dùkɔ̃ sùgbɔwo be tɔgbea, àmè ɖekpe mu sɔ̀ ku ì lè gogo mè ò.

²⁰E wɔ̀ ɖo Jihũitɔa be Èsea ji eye e ɖo zòɖùɖua mè kudo è. Yebe ŋutilã mè ye e li zòɖùɖua ɖo eye lè tètèkpɔ mèa, e kpɔ yebe ègbèjinɔ̀nɔa.

²¹Ye ŋuti ye Mawu fìã àjɔ̀gbè na ɛ̀ to ènutàta mè, be dùkɔ̃wo la kpɔ sìtu lè yebe jìjimèviwo mè, be yè lana e la sùgbɔ sìgbè ànyigbã be èkɔkuiwo nène, be yè la kɔ yebe jìjimèviwo ɖo ji sìgbè wètriviwo nène, eye yebe kɔ̀ta la kèkè ta so àpù ɖe to yì àpù bu to eye so Ètɔ̀ sàsra to yì ànyigbã be nukpòpewo. Izak ku Yakɔb

²²E na kãkãɖoji ŋua pɛpɛ Izak xà ɖo ètɔa Abràham ŋuti. Àmègbètɔwo kpata be sìtu kudo zòɖùdu ŋua,

²³e kɔ wo ɖo Yakɔb be èta ji. E kã ɖo e ji na ɛ̀ lè yebe sìtutuwo mè eye e sɔ èdùa na ɛ̀ bèa nyi ècrɔ̃nu kè be la ma dɛnu dɛnu eye e ma ɛ̀ ɖo kɔ̀ta woèvèawo nu.