Read gen Sirasid 45 Bible Online

Sirasid 45 - gen bible

Sirasid 45

¹Mosè ku Arɔ̀n Mawu kudo àgbètɔwo ye lɔ̃ Mosè. Ne mi le ɖoŋùku ìa, mi dona àkpe na Mawu.

²E na ɛ̀ gogo ɖe kè sɔ̀ ku àtikplɔtɔwo tɔ̀ eye e wɔ̀ ɛ̀ gãaɖe to vɔ̃vɔ̃ kè be ɖo na kɛ̃tɔwoa mè.

³To yebe ènyàwo mèa e na ŋùdãnuwo ɖùɖù jàjàjà, e na ɛ̀ kafu lè èfìɔwo be ŋùkɔ̀, e sɔ èsewo na ɛ̀ ɖo yebe dùkɔ̃a ŋuti eye e ɖè yebe gogoa be ɖe fiɔ ɛ̀.

⁴Xà ɖo yebe ègbè ji nɔ̀nɔ ku yebe xòmèfà ŋutia, e sì àmì na ɛ̀, e cã ɛ̀ lè ènu ɖoɖo ŋutilãmètɔ̀wo kpata dòmè.

⁵E na e sè yebe ègbè eye e sɔ ɛ̀ ɖo lilikpoa mè. Ŋùkumè ku ŋùkumèa, e sɔ ègbèdoàsiwo na ɛ̀, èse kè nana àgbè ku nunyanya a, ne bèa sɔ zòɖùɖua fiɔ Yakɔb eye èsedodowo na Izràɛl. Arɔ̀n

⁶E kɔ Arɔ̀n ɖo ji, àmè kè kɔ̀ sìgbè Mosè nènea, yebe nɔ̀via, kè so Levì be kɔ̀taa mè.

⁷E ɖo è to ɖòɖo màtrɔ gbèɖea ji eye e sɔ hũbonɔ ɖùɖu ɖo dùkɔ̃a ji na ɛ̀. E sɔ acɔ̃ɖowu àdodoewo tusì na ɛ̀ eye e sɔ gogo be àwù vlàyà do na ɛ̀.

⁸E sɔ àcɔɖonu huɛ̃yitɔ̀ ɖèka do na ɛ̀ e sɔ yebe hɔ̃hlɔ̃ be jèsìwo cɔ̃ èta na ɛ̀, vɛ̃ŋùtɛ, àwù lɔ̀bɔ̀ ku àkɔtacɔ̃nu.

⁹E sɔ sìka be yòvobòɖàwo ku àyroloe sùgbɔ fuuwo trɔ do è rìɖìɖì, le ɖègbè lè yebe àfɔ̀ɖèɖe ɖe sia ɖe mè woabe ègbèɖìɖia lè ɖì lè mawuxɔa mè, le ɖoŋùku Tɔhonɔ̀ be dùkɔ̃a dòmè nɔ̀nɔ na Izràɛlviwo kpata.

¹⁰Arɔ̀n dona èɖɛ̀-wu kɔ̀kɔɛ, kè wo lɔ̃ ku èkà sìkatɔ̀ àyòŋùklɛ ku èkà jɛ̃. Wu ekèa, e gbà dona àɖàŋù be àkɔtaɖovɔ ku nyàwo be ènumègbe,

¹¹Èkà jɛ̃ totro ye wo sɔ lɔ̃ àkɔtaɖovɔ kèa. Wo sɔ èkpe xɔ̀ciwo do àcã na ɛ̀. Wo ta ènu ɖo woa ji sìgbè nujitùnu nène, woa tre wo ɖo sìka be èkpo ji, jònukpàtɔ be àɖàŋù-dɔ, wo ŋlɔ̀ ènyà tɛ ɖo e ji na ŋùɖo, sɔ zɔ̃ ɖo Izràɛl be kɔ̀tawo be hɛ̃hlɛ̃mè ji.

¹²Sìka be àcɔɖonu lè Arɔ̀n be ŋùgoblanua ji, wo ŋlɔ̀ ènyà kèa ɖo e ji be: “Ɖè ɖo vò na Tɔhonɔ̀”. Bùbu be jèsì, huɛ̃yi be èdɔ, wo nya kpɔkpɔ ŋutɔ na ŋùkuviwo gbà nyi àcɔnu ɖù blibo.

¹³Jè ŋùkɔ̀ na ɛ̀a, ènu ɖekpe mu lè kè nya kpɔkpɔ nènea kpɔ ò, gbèɖe gbèɖe àmèjro ɖe mu do wo kpɔ ò, vɔ̀a èviawo ku yebe jìjimèviwo ɖèɖe kpò.

¹⁴Vɔsa kèwo be wɔ̀nà zè èvè gbè ɖèkaa, la nyi vɔsa mɛ̀mɛ blibo kaka sɔ yì màvɔ.

¹⁵Mosè ye sɔ èdɔa do àsi na ɛ̀ eye e kɔ̀ àmì kɔ̀kɔɛ ɖo èta na ɛ̀. E nyi nubabla tɛ̀gbɛ̀dò na ɛ̀, nèneake na yebe jìjimèviwo, ku ŋùkèkèwo kpata kaka kè jiŋùkusi gbe lè kpòa, be woa wɔ̀ èkɔ̀nuwo eye lè gà ŋua mè cã woa wɔ̀ Hũbonɔ be èdɔa eye woa tusì na dùkɔ̃a to Nyikɔa ji.

¹⁶E cã ɛ̀ lè ènu àgbèàgbèwo kpata dòmè ne bèa sɔ numɛ̀mɛ vɔsa na Tɔhonɔ̀, lifi ku àmì hɔ̃ɛ̃ titi lè ŋùɖo mè, la sɔ wɔ̀ vuɛ̃ ɖèɖe jo lè dùkɔ̃a ji be kɔ̀nu.

¹⁷Lè yebe èsedodowo mèa e sɔ àcɛ̀ na ɛ̀ lè ɖoɖo jɔ̀jɔɛa be èdɔdoàsiwo ji, sɔ kpla Yakɔb yebe ɖoɖowo, eye bèa kɔ̀ ŋùmè na Izràɛl to yebe èsea ji.

¹⁸Àmèjroviwo sitè ɖo e ŋuti lè zògbèa ji to ŋuhuã mè. Datàn ku Abiràm be àmèwo ku Korè be èhasòsoa lè àdɔ̀mèze àdãtɔ̀ mè.

¹⁹Tɔhonɔ̀a kpɔ ɛ̀ eye e bijì ŋutɔ, wo crɔ̃ to yebe àdɔ̀mèze be ànyrãwɔ̀wɔ mè, e wɔ̀ nuklìsuwo ɖo woa ŋuti, be fiɔ̃ wo to yebe èzò be àɖewo ji.

²⁰E na Arɔ̀n gogo ɖo e ji kpe è, e sɔ ècrɔ̃nu na ɛ̀ e ma àtikusɛ̃sɛ̃ cucugbãtɔ̀awo be ènuta ɖèɖe na ɛ̀, eye jè ŋùkɔ̀a, e gbà na ènuɖùɖu sù e si,

²¹ɖoa Tɔhonɔ̀ be vɔsanuwo nyi nuɖùɖu na wo; e sɔ wo na ɛ̀ ku yebe jìjimèviwo cã.

²²Tovò na eŋua, ècrɔ̃nu mu lè na ɛ̀ lè dùkɔ̃a be ànyigbã ji ò eye gomè ɖekpe mu lè na ɛ̀ lè dùkɔ̃a dòmè ò, ɖo nyè ŋutɔ ye nyi àpo gomè ku àpo ècrɔ̃nu. Pinàs

²³Pinàs, Eleazàr be èvia ye nyi àmè ètɔ̃gɔ̃a lè kafu mè ɖo yebe vevedonu ɖo Tɔhonɔ be gãnyinyi ŋuti ku yebe jìdodo gobi sɔ sitè ɖo dùkɔ̃a be àgla jèje ŋuti nènea ye e xɔ̀ sɔsɔkè na Izràɛl.

²⁴Ye ŋuti ye Tɔhonɔ̀ wɔ̀ ŋutifafa be zòɖùɖu ɖe kudo è: e la va nyi kɔ̀kɔɛpea be èga ku dùkɔ̃a ji kpɔtɔ. Nènea ye Tɔhonɔ̀ sɔ hũbonɔ gã be èdɔa do àsi na Pinàs ku yebe jìjimèviwo so màvɔ yì màvɔ.

²⁵Wo wɔ̀ zòɖùɖua kudo David, Yesè be èvi kè so Yudà be kɔ̀ta mèa cã; e fìã be èfìɔzìkpea la nyi yebe jìjimèvi ɖèka tɔ̀ kpò vɔ̀a Arɔ̀n tɔ̀a ya la nyi yebe jìjimèviwo kpata tɔ̀.

²⁶Tɔhonɔ̀ ne sɔ ànyasã ɖo mìabe èjìmè ne mìa sɔ ɖo kòjo na dùkɔ̃a ku jɔ̀jɔɛnyinyi, àleke be woabe ɖàgbèa mu gbà bu vĩĩ ò, ne woabe gogoa cã ne nɔ àkɔwo kpata mè.