Read gen Sirasid 47 Bible Online

Sirasid 47 - gen bible

Sirasid 47

¹Natàn ku David E yomèa, Natàn sitè ne bèa gblɔ̃ ènyà ɖɛ lè David be ŋùkèkewo ji.

²Lè ègbèkpli be vɔsawo mèa, wo ɖènà tèpe doàmìwo ɖɛ, nènea ye wo ɖè David ɖo vò lè Izràɛlviwo dòmèa yeŋu.

³E sɔ jãŋùtawo wɔ̀ gbegblènu sìgbè gbɔgbɔɛwo ke nène sisiblìsiwo sìgbè àlɛ̃viwo nène.

⁴Lè yebe ɖèvi mèa, e wù àmèjɔ̀asu eye e gũ èta na dùkɔ̃a be ŋùkpɛ̃a gà kè mè e sɔ rɔbàtu dà èkpe ɖèka eye e ɖiki Gòliat be jajraa?

⁵Ɖoa e fã yɔ Tɔhonɔ̀, Jihũitɔ, kè sɔ ŋusɛ̃ ɖo yebe ɖùsilɔ mè ne bèa gũ èta na ŋusù àhùamèsuka eye bèa do yebe dùkɔ̃a be ŋusɛ̃ ɖo ji.

⁶Ye ŋuti wo na ɛ̀ àmè hotu àtɔ̃ (10000) be kafu, wo mlã ɛ̀ lè Tɔhonɔ̀ be eɖɛ̀pòpowo mè kè wo cɔ̃ fìɔkuku na ɛ̀a.

⁷Ɖoa e crɔ̃ kɛ̃tɔwo pòhla trɔ do, e gũ Fìlistìtɔwo kèwo sitè ɖo e ŋutia, e gbã woabe hɔ̃hlɔ̃a kaka va na egbè.

⁸Lè yebe èdɔwo keŋu mèa, e do bùbu Kɔ̀kɔ̀ɛtɔ Jihũitɔa ŋuti to kàfù kafu be ènyàwo mè, ku yebe èjì bliboa, e jì àyosòhawo eye e ɖo lɔ̃lɔ̃ na àmè kè ɖo èa.

⁹E ɖo èhàjìtɔwo ɖo vɔsakpea be ŋùkɔ̀ fikè woabe èhàgbè viviwo ɖinà lè.

¹⁰E ɖo àcɔ na xɔ̀se be àzã, wɔ̀ ɖoɖo tɔ̀xɛ ɖo woa ŋuti ne woa teŋu sɛ̃ Tɔhonɔ̀ ɖèka kpò eye so fɔ̃fɔ̃mè kèa, èhà ku zĩzĩ ne nɔ ɖì lè tèpe kɔ̀kɔ̀ɛa.

¹¹Tɔhonɔ̀ sɔ yebe àgɔ̀wo kè è eye e kɔ yebe hɔ̃hlɔ̃a ɖo ji wè sia wè, e na ɛ̀ èfìɔ be zòɖùɖu ku fìɔzìkpe trìakɔ ɖèka lè Izràɛl.

¹²E yomèa, èvia ŋusùvi ɖèka ɖɔ ku nunyaa va, àmè kè nɔ̀ àgbè lè vòvo fɛ̀ɖɛ̀ mè, ɖo ètɔa ŋuti.

¹³Salomɔ̀n ɖùfìɔ lè ŋutifafa be hùènu, Mawu na ɛ̀ jɛ̃gbɔ̃gbɔ̃ pòxla ne bèa teŋu tù mawuxɔ ɖèka jo na yebe nyikɔa eye bèa jrà kɔ̀kɔ̀ɛpe ɖe ɖɛ tɛ̀gbɛ̀.

¹⁴Wò ɖo ànyasã sùsui lè àpo ɖàkajɛ mè gbà ɖɔ ku nunya sìgbè ètɔ̀ sàsra nène.

¹⁵Àpo gbɔ̃gbɔ̃a cɔ̃ ànyigbã ji, wò ɖɔ ɛ̀ ku èlododo ku àjòwo,

¹⁶àpo nyikɔ ɖì yì kaka ètɔ̀dòmèkɔ̃ɛ màsɔɛwo ji eye àmèwo lɔ̃ wò ɖo àpo ŋutifafa ŋuti.

¹⁷Àpo èhàwo, èlododowo, ènyàwo ku woabe ɖoŋutiwo wɔ̀ ŋùdã na xixea.

¹⁸Lè Tɔhonɔ̀ be nyikɔ mè, kè wo yɔna be Izràɛl be Mawua be nyikɔ mèa, wò bɔ̀ sìka ɖɛ sìgbè sũŋubui ɣe nène, eye wò pòtɛ klòsalò ɖɛ sìgbè sũŋubui ke nène.

¹⁹Wò gble àpo àhàdawo mè ɖɛ na nyɔnùwo, wò trɔ zũ kluvi lè àpo ŋutilã mè.

²⁰Wò ɖo èɖi na àpo gogoa, wò ɖùkɔ̀ na àpo kɔ̀ta kaka wò hɛ̃ àdɔ̀mèze kɔ̀ ɖo èvi wòwo ji eye wo crì àpo àɖàhùa jèjea.

²¹Nyàwoa, fìɔɖu wòa ma ɖo èvè eye fìɔdu sĩkã ɖe hɔ̃ so Efrayìm.

²²Vɔ̀a Tɔhonɔ̀ ya, mu ɖè àsi lè yebe ŋuzĩzĩkuku a ŋuti ò eye mu na be yebe ènyàwo be ɖekpe ne bu ò, eye mu tutu yebe àmè cãcã be jìjimèviwo jo ò eye mu gũ èta na àmè kè lɔ̃ ɛ̀a be jìjimè ò, e sɔ nuku kè kpɔ̀tɔ̀a na Yakɔb eye èkè kè to so e mèa na David.

²³E yomèa, Salomɔ̀n yì gbɔ̃jɛ̃ lè tɔgbeawo gbɔ eye e gble yebe xòmètɔ ɖe ɖo ye tèpe; dùkɔ̃a sɔ ɛ̀ àɖàhùatɔ wu ènunyatɔ. Nyàwoa, Robòam wɔ̀ ɖoɖo ɖe kè na dùkɔ̃a sitè ɖo e ŋutia. Yerobòam, Nevàt be èvia na Izràɛl wɔ̀ nuvuɛ̃ eye e fiɔ nuvuɛ̃ be èmɔ̃ a Efrayìm be fìɔdua cã.

²⁴Eŋua woabe nuvuɛ̃wo va sùgbɔ ɖo e ji kaka be wo ɖè wo jo lè woabe ànyigbã ji.

²⁵Wo jo woa ɖokoe na ènudrã ɖekpekpe kaka va na Mawu be ètodɔ̃a.