Read gen Sirasid 48 Bible Online

Sirasid 48 - gen bible

Sirasid 48

¹Gblɔ̃ɖɛtɔ Eliyà E yomèa, gblɔ̃ɖɛtɔ Eliyà va sìgbè èzò ɖe nène eye yebe ènyà bì sìgbè èzòti nène.

²E na àdɔ̀ to lè Izràɛl eye to yebe vevedonu mèa e na wo trɔ àmè kuivè ɖewo kpò.

³To Tɔhonɔ̀ be ènyà jia, e tu jiŋùkusi eye e gbà na èzo ɖì so èji zè ètɔ̃ sɔ̃ŋu.

⁴Oò Eliyà, wò va trɔ àmè ɖìnyi to àpo ŋùdãdɔwo mè! Àmè kɛ la yigò be yè sɔ̀ ku wò ò?

⁵To Jihũitɔa be ègbè ɖèɖe jia, wò fɔ̃ àmè ɖe so èku, so kaka èkuwode ke,

⁶wò tùtù èfìɔwo ɖo cɔ̃crɔ̃ mè ku àmè kɔsùwo jo lè woabe dɔ̃pe,

⁷wò sè ŋùmèkãnyawo lè Sinaì ku todɔ̃ be ènyàsòsowo lè Horɛb.

⁸Wò do àmì èta na èfìɔwo ne woa biɔhlɔ̃ gbà ɖo gblɔ̃ɖɛtɔwo ne woa yì èdɔ wòa ji.

⁹Wo kɔ wò jo yì jiŋùkusi lè èzò be babla kɔ̀tɔ̀ ɖe mè lè àhùakèke kè èzò be èsɔwo le dɔ̃a mè.

¹⁰Wo cã wò ɖɛ, lè ŋùmèkãnya kè la vaa mè, la sɔ fa Tɔhonɔ̀ be àdɔ̀mèzea nu gbɔ̀xue bèa hɔ̃, ne wòa kplɔ̀ ètɔ be èjì va èvia gbɔ eye wòa gbìgbɔ̀ fɔ̃ Yakob be kɔ̀tawo.

¹¹Sìtumɛ ye nyi àmè kèwo kpɔ wòa, ku kèwo dɔ̃ àlɔ̃ lè lɔ̃lɔ̃ mèa, ɖoa miawo cã mi la nɔ̀ àgbè godoo.

¹²Wàlɛbɛ kè wo sɔ Eliyà wla ɖo èzò bablakɔ̀tɔ̀a mèa, Elize ɖɔ ku yebe gbɔ̃gbɔ̃a. Lè yebe àgbèzãwo mèa, èga ɖekpe mu do ŋùklɛ̃ na ɛ̀ ò eye àmè ɖekpe cã mu gla ɖo e ji ò.

¹³Ènu ɖekpe mu sɛ̃ŋu do è ò, lè èku be àlɔ̃dɔ̃dɔ̃ mè ŋutɔ cã yebe ŋutilã gblɔ̃ nya ɖɛ.

¹⁴Lè yebe àgbènɔ̀nɔ mèa, e wɔ̀ ŋùdãnuwo, lè yebe èku yomè ŋutɔ cã yebe èdɔwo gbà kpɔ̀tɔ̀ wɔ̀ ŋùɖã.

¹⁵Co gãkea, dùkɔ̃a mu trɔ èjìmè ò, wo mu trɔ lè woabe nuvuɛ̃wo yomè ò, kaka na woabe ègàtɔnugbe yìyi kãkã ɖo ànyigbã bliboa ji ò. Dùkɔ̃ vitukui ŋutɔ ɖe ye kpɔ̀tɔ̀ ci ànyi kudo èga ɖe so David be àxomè.

¹⁶Àmè ɖewo lè woa dòmè wɔ̀ ènu kè jè ŋùmè na Mawu, vɔ̀a èbuwo ya jè àgɔ̀ ɖo e ji kpe è.

¹⁷Ezekìas tù àgbògbò trɔdo yebe èdùa eye e hɛ̃ èsì va e mè. E sɔ gàkpo kù àkpã eye e ɖè èsìdowo ɖɛ na èsì.

¹⁸Lè yebe hùènu ye Sènakerìb to va, e dɔ̃ Rabsakè ɖoɖa; àmè kèa yì eye e ɖe àlɔ̀ ɖo Ziɔ̀n ji, e jra lè yebe gòyiyi mè.

¹⁹Eŋua woabe èjì ku àlɔ̀wo hũhũ eye wo sè veve sìgbè nyɔnù kè le kua nène.

²⁰Wo fã yɔ Tɔhonɔ̀, Ŋuzĩzĩkukutɔa, wo drɛ̃ woabe àlɔ̀wo ɖoɖa ɛ̀, eye so èjia, Mawu kɔ̀kɔ̀ɛa xɔ̀ ègbè na wo trolo, e hlùɛ̃ wo to Ezaya be àsi mè.

²¹E xa Àsirìa be àsàɖa eye yebe àtikplɔtɔa crɔ̃ wo.

²²Ɖo Ezekìas wɔ̀ ènu kè jè ŋùmè na Tɔhonɔ̀; e likè goŋu lè ètɔa David be èmɔ̃ ji, kèwo gblɔ̃ɖɛtɔ gã Ezayà do àsi na ɛ̀a, lè nyàwo ku kãkã ɖoji be àvìmènuwo mèa.

²³Lè yebe hùènua, e na èwè jo àgɔ̀ yì ŋùgbe sɔ na èfìɔa be àgbènɔ̀zã yì ŋùkɔ̀.

²⁴To gbɔ̃gbɔ̃a be susu ɖè na àmè ɖe mèa, e kpɔ hùènuwo be nuwuwu eye e fa àkɔ na Ziɔ̀n be ŋuzĩzĩmɛwo.

²⁵E ɖè ènu kè la ɖɛ va gbɔ̀xue vɔ̀vɔnua la ɖoa gblɔ̃, kudo ènu wawlawo gbɔ̀xue wo la va jɔ̀.