Read gen Sirasid 5 Bible Online

Sirasid 5 - gen bible

Sirasid 5

¹Ènu kè àdɔ̀kùnɔ̀ susuna a Mù gbà ziɔ̃ ɖo àpo àdɔ̀kùnuwo ŋuti ò, eye mù gbà nɔ gblɔ̃ be: “Wo sù na mù vɔ̀!” ò.

²Mù gbà ɖè àsi lè ɖokoe wò ŋuti, ne àpo àyè ne sɔ àpo ŋusɛ̃ nɔ xɔ̀ ènu kè àpo èjì jro a ò.

³Mù gbà gblɔ̃ be: “Àmè kɛ ye kpà àcɛ̀ na mù ò?” ò. Ɖo a, Tɔhonɔ̀ la dɔ̃ èto na wò godo.

⁴Mù gbà gblɔ̃ be: “Mù wɔ̀ èvuɛ̃, eye ènu ɖekpe mu jɔ̀ ɖo ji nyè ò!” Ɖo a, Tɔhonɔ̀ gbɔ̃nà èjì ɖɛ blɛ̀wù.

⁵Mù gbà ɖo kãkã ɖo e ji, be yè la xɔ̀ sɔsɔ kè, ne wò a nɔ bɔ̀ èvùɛ̃ ɖo èvùɛ̃ ji ò.

⁶Mù gbà gblɔ̃ be: “Yebe ŋuzĩzĩkuku a lòlò, e la sɔ àpe èvùɛ̃ gbogboawo kè mù!” ò. Ɖo a, ŋuzĩzĩkuku ku àdɔ̀mèze a, yetɔ̀ wo nyi, eye èvùɛ̃wɔ̀tɔwo ji ye yebe àdɔ̀mèze a la jè.

⁷Trɔ va Tɔhonɔ̀ gbɔ kaba; mù gbà nɔ sɔ ɛ̀, so ŋùkèkè ɖe ji, nɔ yì ŋùkèkè bu ji ò, ɖo a, Tɔhonɔ̀ be àdɔ̀mèze ŋua la va sò wò do lè àvò mè, eye wò la crɔ̃, lè ètodɔ̃-zã a gbè.

⁸Mù gbà ziɔ̃ ɖo èfĩ be àdɔ̀kùnuwo ŋuti ò, wo mu la ɖè àlè ɖekpe na wò, lè jɔ̀gbèvuɛ̃-zã gbè ò.

⁹Mù gbà fu ènu, lè àya ɖekpekpe nu ò, eye mù gbà jè àfɔ̀-mɔ̃wo domètɔ ɖekpekpe kpò ji, sìgbè leke èvùɛ̃wɔ̀tɔ àɖe èvè-nɔ̀ wɔnà a nène ò.

¹⁰Tù àfɔ̀ tè, lè àpo kãkã ɖo e ji mè, eye nyi ènyà ɖèka tɔ.

¹¹Nɔ̀ gbèsɔ̀sɔ̀ɛ na ènyà sèse, vɔ̀ a, wɔ̀ blɛ̀wù, ne wò a sɔ ɖo ènyà ŋuti.

¹²Ne wò nyã ènyà ɖe a, ɖo e ŋuti na èha wòvi: ne mu nyi nène ò a, sɔ àlɔ̀ cɔ̃ ènù.

¹³Gogo ku èvlododo lè àmè be ènu mè, eye àgbètɔ be àɖe teŋu trɔ zũ cɔcrɔ̃ na ɛ̀.

¹⁴Mù gbà na, wo a yɔ wò be àmè nyikɔ gbletɔ ò; eye mù gbà sɔ àɖe tre èmɔ̃ na àmè ò. Ɖo a, ne ŋùkpɛ̃ɖùɖu nyi fìãfĩtɔ tɔ̀ a, Wo la dohùɛ̃ do àɖe èvè-nɔ̀ veve ɖe ŋutɔ.

¹⁵Na àsà dàdà viwo ku dàdà gãwo cã.