Read gen Sirasid 50 Bible Online

Sirasid 50 - gen bible

Sirasid 50

¹Hũbonɔ gã Simɔ̀n Simɔ̀n, Onìas be èvia ya ye nyi hũbonɔ gã kè jrà Mawuxɔa ɖo lè yebe àgbènɔ̀nɔ mè eye lè yebe ŋùkèkewo mèa e do likè kɔ̀kɔ̀ɛpea.

²E ye na wo ɖo dodoe na èkpa èvè caa, kèwo trɔdo mawuxɔa be èkpaa.

³Lè yebe hùènua wo ɖè èsìdo ɖe, e nyi tãku kè be lipò rìɖìɖì trɔ doa lè sìgbè àdàwa mè be èsìa nène.

⁴E jè àgbàgba hlùɛ̃ yebe dùkɔ̃a lè cɔ̃crɔ̃ mè, tɔ̃ àgbògbò trɔdo èdùa ne wo mu gbà va xa ɛ̀ ò.

⁵E nɔ̀nà nyiɖìɖi tɔ̀xɛ ɖe mè wàlɛbɛ kè be le to so xɔ̀mèsòvɔa godo eye be le ɖìsà trɔ do mawuxɔa.

⁶E ɖìnà ŋùɖekɛ̃nyɛ be wètrivi kè le klɛ̃ lè lilikpo ɖe be dòdòmèa, sìgbè wètri lè ŋùkèke kèwo mè be ɖɔ lèa, nène,

⁷sìgbè èwè kè le klɛ̃ ɖo Jihũitɔa be kɔ̀kɔ̀ɛpea ji nène, sìgbè ànyiɖohùɛɖo kè le dàzò lè gogo be lilikpowo mè nène,

⁸sìgbè sepòpo kè tɔ̀ rozà be àtiwo lè hùènu nyuɛ̃ be ŋùkèkewo mè nène, sìgbè ànya lè èsìjɔ̀pewo to nène, sìgbè Libàn be àve lè zòmè be ŋùkèkewo mè nène,

⁹sìgbè lifi kè le bì lè lififiɔ̃nu mè nène sìgbè sìka be èze kpɛ̃kpɛ̃ ɖe kè wo sɔ èkpe xɔ̀ci ɖe sia ɖe ɖo àcɔ naa nène,

¹⁰sìgbè àmìti kè le sɛ̃kua nène, sìgbè wawati kè kɔ yì ji kaka tɔ lilikpowo nène.

¹¹Gà kè mè e le sɔ gogo be sayà eye e le do yebe hùɛ̃yi be àcɔɖonu keŋu, gà kè mè e le lia vɔsakpe kɔ̀kɔ̀ɛa, e ɖɔ kɔ̀kɔɛpea be kpame ku yebe gogoa;

¹²gà kè mè e le xɔ̀ ènu mamawo so hũbonɔwo be àsiwo mè, ye ŋutɔ lè ètènu lè vɔsakpea be kpozoa gbɔ, nɔ̀viawo ya pòhla do è gòdòo, sìgbè logòti lè Libàn, eye wo trɔ do è sìgbè deti be èkpòwo nène,

¹³Arɔ̀n be èviwo kpata lè woabe gogo mè, ku Tɔhonɔ̀ be ènunana lè woabe àlɔ̀wo mè, lè Izràɛl be àmèha bliboa be ŋùkɔ̀;

¹⁴e wɔ èɖɛ̀pòpo be kɔ̀nuwo lè vɔsakpea ji eye e sɔ Tɔhonɔ̀, àhùadù Mawua be ènunanaa ɖɛ ɖo ɖoɖonu,

¹⁵e vlũ àlɔ̀ ɖo kɔpòa ji, kɔ̀ vɛ̃a ɖɛ, e kɔ̀ ɛ̀ ɖo vɔsakpea be àfɔ̀ nu, hɔ̃huɛ̃ àkɔfanatɔ na Jihũitɔa, xixe kplògòdòa be Èfìɔ.

¹⁶Eŋua Arɔ̀n be èviwo sò àyo, le ku woabe èkpɛ̃ kèwo wo wɔ̀ ku ègà tùtu eye wo na zigìdi gãɖe le tɔ̀ lè ŋùɖo mè na Jihũitɔa.

¹⁷Eŋua dùkɔ̃ bliboa, zè ɖèka troloa, sɔ ŋùmè cɔ̃ ànyi ɖo du, sɔ sɛ̃ yebe Tɔhonɔ̀, Ŋusɛ̃kpatatɔ, Mawu Jihũitɔa.

¹⁸Eye èhàjìtɔwo le kafu ì ku woabe ègbèwo; eye lè zigìdi gãɖe mèa èhàgbèa le ɖì mìɔ̃ ɖɔ mawuxɔa keŋu.

¹⁹Eye dùkɔ̃a blìbɔ̀ na Tɔhonɔ̀ Jihũitɔa, lè kuefãfã mè lè ŋùkɔ̀ na Ŋuzĩzĩkutɔ gã kaka sɔ na Tɔhonɔ̀ be sùmɔ̀ sumɔa be nuwuwu kudo yebe èkɔ̀nu be ɖoɖoa be vɔvɔnu.

²⁰Eŋua e gbìgbɔ̀ ɖìnà va eye e kɔna àlɔ̀ yì ji ɖo Izràɛlviwo be àmèha bliboa ji, ne bèa kè yebe ènu sɔ na Tɔhonɔ̀a be sìtu eye bèa wɔ̀glo sɔ yɔ yebe nyikɔ.

²¹Eye zè èvègɔ̃a, àmèwo kpata dona ènu gũ ne woa xɔ̀ sìtu so Jihũitɔa gbɔ. Ŋusɛ̃dodo

²²Eye fifìa mì pòɖɛ̀ na xixe kplògòdòa be Mawu, e ya kè le wɔ̀ ènu gãgãwo lè àfiwo kpata àmè kè do miabe ŋùkèkewo ɖo ji so kaka mia nɔ̀ be àdɔ̀ mè eye e wɔ̀nà ènu ku mi sɔ zɔ̃ ɖo yebe ŋuzĩzĩkuku ji.

²³Ne na mi èjìmè be jìjɔɛ eye ne wɔ̀ be ŋutifafa ne va lè miabe ŋùkèkewo ji lè Izràɛl sɔ na ŋùkèke màvɔwo.

²⁴Yebe ŋuzĩzĩkukua ne nɔ̀ ku mi ànùkua tɔ̀ eye lè miabe àgbè ŋùkèkewo mèa, bèa hlùɛ̃ mi.

²⁵Dùkɔ̃ èvè ye lè, kèwo mù crìa, eye ètɔ̃gɔ̃a ya mu nyi dùkɔ̃ tètè ò:

²⁶àmè kèwo lè Seir be èto jia, Filistìwo, ku hɔ̃vi be dùkɔ̃ kè lè Sikɛ̀m nyigbã jia. Xoma ku yebe ŋlɔ̀tɔa

²⁷Yesù, Siràk be èvi, Eleazàr be èvi so Yèruzàlɛm, ta nukpakpla ku nunyanya be pòpòfiɔ ɖe ɖo xoma kèa mè. E ɖùɖù ì so yebe èjì be ànyasã mè ɖoɖa sìgbè èjijàja nène.

²⁸Sìtumɛ ye nyi àmè kè la nɔ trɔ yì ènyàti kèawo ji ètèmàtɔ! Àmè kè la sɔ wo ɖo yebe èjì mèa, la ɖo ànyasã.

²⁹Ɖoa ne e le wɔ̀ ɖo woa jia, e la ɖo ŋusɛ̃ lè ènu sia ènu mè, ɖo Tɔhonɔ̀ sisia ye nyi yebe àfɔ̀tope.