Read gen Sirasid 51 Bible Online

Sirasid 51 - gen bible

Sirasid 51

¹Siràk be èvia be kuefã Mù jro la do àkpe na wò, Tɔhonɔ Èfìɔ, eye mù le pò mlã wò, Mawu hlùɛ̃tɔ nyè. Mù le kafu àpo nyikɔ,

²ɖo wò nyi àmèta kpɔtɔ ku àlɔ̀dotɔ na mù eye wò hlùɛ̃ àpe ŋutilã lè bubu be èmɔ̃ ji, lè àɖe gbleàmè be èmɔ̃ tetre mè, le nuyi kèwo kpànà àjènya a simè. Lè àpe crìtɔwo be ŋùku mèa,

³wò nyi àlɔ̀do eye wò hlùɛ̃ mù, sɔ zɔ̃ ɖo àpo ŋuzĩzĩkuku ku nyikɔa be gãnyinyi ŋuti, lè àmè kèwo lè ègbèsɔ̀sɔɛ la mì mùa be ɖùɖuwo simè, lè àmè kèwo le ji vuɛ̃ na àpe àgbèa si, lè tètèkpɔ gbogbo kèwo kpe mùa simè,

⁴lè zòtikpo be àzìzɔ cipò kè trɔdo mùa si, kudo èzò kè nyè mu tɔ òa be dòdòmèa simè,

⁵wò lìɔ mù to lè èkuwode be ègũ titowo mè, lè àjè kudo ènyà gbegblewo simè,

⁶lè àɖe màye màye be àŋùtiwo simè. Mù gogo èku eye àgbè nyèa ɖiɖi va kaka èkuwode be èmɔ̃ a nu.

⁷Wo trɔ do mù so àgowo kpata mè eye àmè ɖekpe mu lè kè la xɔ̀ na mù ò. Mù kpɔ èmɔ̃ na àgbètɔwo be àlɔ̀do, vɔ̀a ɖekpe mu lè ò.

⁸Eŋua mù ɖoŋù àpo àdɔ̀mènyuɛ̃a, oò Tɔhonɔ̀, àpo nyuɛ̃ jiji na àmè tɛ̀gbɛ̀dòa, eye wò hlùɛ̃nà àmè kèwo kpɔna àpo àsinu ku àdòdò eye wò xɔ̀nà wo lè àmè vuɛ̃wo be àsi mè.

⁹Eye mù kɔ blìbɔ̀ blìbɔ nyèa so ànyigbã yì ji, eye mù tɔ wò yɔyɔ ne ma gã lè èku si.

¹⁰Mù fã yɔ Tɔhonɔ̀, àpetɔ nyè be ètɔ, ne mu gbà gble mù ɖɛ lè ènuxàxa be ŋùkèkewo mè ò, lè hèwùtɔwo be hùènu, gà kè mè àlɔ̀do dɛ̃ mùa.

¹¹Mù la nɔ pòmlã àpo nyikɔa ètè mà-tɔ, mù la nɔ jì àkpedodo be àyosòsowo be èhà. Eye wò sè àpe kuefã,

¹²ɖoa wò hlùɛ̃ mù lè bùbu mɔ ji eye wò gbĩ mù lè gbledo be hùènu kèa si. Eŋua ŋuti ye mù jro la do àkpe na wò eye mù la kafu wò, eye mù la pòɖɛ̀ na Tɔhonɔ̀ be nyikɔ. Ànyasã jiji veku veku

¹³Gà kè mè mù gbà kpɔ̀tɔ̀ lè ɖèkajɛ mèa, gbɔ̀xue mù la dãgbãa, mù ji ànyasã lè gàglàgbè lè kuefã mè.

¹⁴Lè mawuxɔa be ŋùkɔ̀a, mù fãkue ɖo e ŋuti eye kaka sɔyì vɔ̀vɔnua, mù la nɔ ji ì.

¹⁵So yebe sepòpo mèa, sìgbè vɛ̃ku be èkpo kè le ɖì nènea, e va nyi àpe èjì be jìjɔɛ. Àpe àfɔ̀ zɔ̃ lè èmɔ̃ jɔ̀jɔɛ ji, so àpe ɖèkajɛ mè, mù to yebe àfɔ̀tope.

¹⁶Kè mù ɖo èto è viɖe kpòa, mù xɔ̀ ɛ̀, eye mù kpɔ ènukpakpla susui na ɖokoe nyè xɔ̀.

¹⁷To e ya mè ye mù yì ŋùkɔ̀; àmè kè nana mù ànyasãa, mù la na ɛ̀ gogo.

¹⁸Ɖoa mù ɖo è ku kãkãɖoji be ma sɔ ɛ̀ ɖo èdɔ, mù do vevènu ɖo nyuɛ̃ ŋuti eye nyè mu la xà yebe ènu kpɔ gbèɖe ò.

¹⁹Àpe èkla pò àvũ kãlìtɔ̀ kudo è eye mù wɔ̀ ɖo Èsea ji ku kutrikuku. Mù kɔ àlɔ̀wo ɖoɖa jiŋùkusi eye mù sè veve ɖo àpe àgɔ̀jèje màjro wɔ̀ ɖoɖa e gbɔwo ta.

²⁰Mù jɔ̀ èkla nyèa ɖoɖa e gbɔ eye kɔ̀kɔɛ mè ye mù kpɔ ɛ̀ lè. Mù xɔ̀ nunyanya so gɔ̃mèjèje kudo è; eŋua ŋuti ye mu la gble mù ɖɛ gbèɖe ò.

²¹Mù ji la bla ɖo e ŋuti ŋutɔ, ekèa ŋuti mù kpɔ ɛ̀ xɔ̀ àdodoe.

²²Àlè kè Tɔhonɔ̀ na mùa ye nyi àɖe be zãzã nyuɛ̃ eye mù sɔ ɛ̀ le kafu ì.

²³Mì va gbɔ nyè, mìa àmè mànyanuwo, mì va kpla ènu lè gbɔ nyɛ̀.

²⁴Nukɛ ŋuti e xùe do mì dìdiɖe, ekè yebe sìkɔ le tì mì veku veku ò?

²⁵Mù le kè ènu eye mù le ɖè gblɔ̃ be: mì xɔ̀ ɛ̀ na mia ɖokoe, èfɛ̃ ɖe màtu.

²⁶Mì sɔ mìabe hũɖòmè ɖo yebe kɔ̀kùtia gɔ̃mè eye mìabe èkla ne xɔ̀ ènufiɔfiɔ. Kaka mìabe àkɔmè mì la kpɔ ɛ̀ lè.

²⁷Mìa ŋutɔ mì kpɔ ɛ̀ ku mìabe ŋùkuviwo, be nyè mu kpefũ sùgbɔ gbɔ̀xue kpɔ jɛ̃gbɔ̃gbɔ̃ bliboa ò.

²⁸Mì va xɔ̀ nufiɔfiɔ nyè lè ègà sùgbɔ zãzã mè, eye to e jia mì la ɖo sìka sùgbɔ.

²⁹Mìabe èkla ne kpɔ jìjɔɛ lè Tɔhonɔ̀ be ŋuzĩzĩ kuku a mè eye èŋù mu gbà kpɛ̃ mì ne mìa kafu ì ò.

³⁰Mì wɔ̀ mìabe èdɔ jè ŋùkɔ̀ na gàmè kè wo ɖoa eye e la na mì mìabe àjɔ̀a lè yebe hùènu.