Read gen Sirasid 7 Bible Online

Sirasid 7 - gen bible

Sirasid 7

¹Gbe sia gbe be etopoɖowo Ne wò mù wɔna vuɛ̃ oa, evuɛ̃ ma va ji wò ò.

²Nɔ azɔge boò ne majɔ̀majɔ̀ eye ela na wò asà.

³Ne wò le do majɔmajɔ be ènùkua, wò la va xɛ̀ zegbɔ ze adrɛ̃.

⁴Mù gbà biɔ ŋusɛ̃ Tɔhonɔ̀ eye mù gba ji tepe gãa le efiɔ gbɔ ò.

⁵Mù gbà kpɔ ɖokoe wò ame jɔjɔɛ le Tɔhonɔ̀ be ŋukumè ò eye mù gba wɔ ɖokoe wò anyàsã tɔ le efiɔ be ŋùmè ò.

⁶Mù gbà wɔ ɖokɔe wò kojoɖotɔ walɛbɛ ke wò mù sù la sò jɔjɔɛ ò, ne mù nyi nene o woa efiɔvi sɛ̃ŋu ɖe a do ŋuklɛ̃ na wo ne woa va yi dovlo apo anukua mɛ nyinyia.

⁷Mù gbà wɔ̀ vuɛ̃ do èhabɔ̀bɔ kè mè wò lèa, ne woa va ɖìgbɔ ɖokoe wò lè àmèha be ŋùku mè ò.

⁸Mù gbà jè àgɔ̀ ɖee, a gbà jè zè èvè gɔ̃ã ò, ɖo cucugbɔ̃tɔ̀a sù a do wò àgɔ̀jètɔ.

⁹Mù gbà gblɔ̃ be: “Tɔhonɔ̀ èjihuitɔa la kpɔ àpe ènu nanawo be gbɔ susua; eye gà ke mè yèe mù lasɔɛ ɖo Ejihuitɔa be ŋùkumèa, e la xɔ wo.”

¹⁰Mù gbà wɔ̀ kuefã wòà lè màkãma mè ò eye mù gbà ŋlɔ̃ àdòmè nyuɛ̃ wɔ̀wɔ ɖoɖa wɔ̀amènɔ̀ wo gbɔ ò.

¹¹Mù gbà nɔ̃ kò àmekè lè ènu xàxa mè à ò, ɖo ame ɖe lè, kè ɖiɖi na àmè eye be gbà kɔna àmè ɖo ji.

¹²Mù gbà kpà àjè nyãwo ɖo nɔ̀vi wò ŋuti kaka la va blè èhlɔ̃ wò cã ò.

¹³Lè huènù ɖekpekpe mèà mù gbà ji be yea ɖà àjè ò, ɖo nene be nɔ̀nɔmè mù hɛ̃na ènu nyuɛ̃ ɖekpe va na ò.

¹⁴Ne wò lè àmè sisĩwo dòmèa, mù gba pò nupo trãmà ò, eye ne wò le fãkue a, mù gbà nɔ càka ènyà ò.

¹⁵Mù gbà crì èdɔ sɛ̃sɛ̃ wɔ̀wɔ kaka a yì gble èdɔ wɔ̀wɔ kè Tɔhonɔ̀ èjihuitɔa ŋutɔ ɖo ɖɛ na mi ò.

¹⁶Mù gbà cà èha kudo èvuɛ̃ wɔ̀tɔwo be èha bɔbɔ ne woa ɖo ŋùku be Tɔhonɔ̀ be àdɔmèzea mù lè dìdìpe ò.

¹⁷Gbe ènu lè ègòyiyi gbɔ ɖo ènukè le nɔ̀tè kpɔ àgbètɔa ye nyi be, èŋɔ̃viwo la ɖùi. Èhlɔ̃ wò, Homè

¹⁸Mù gbà sà èhlɔ̃ wò ɖo ègà ŋuti kaka la va sɔ nɔ̃vi wò na ɖo Ofir be sìka ŋuti ò.

¹⁹Mù gbà gble nyɔnù nyuɛ̃ kè ɖo anyàsã ɖɛ ò ɖo ènu nyuɛ̃ kè lè emèà hɔ̀ àsi wù sìka.

²⁰Mù gbà do àyà ne sumɔ̃vi ànùkua wɔ̀tɔa àlo àpo èdɔwɔ̀tɔ kè sɔ yebe èjì kù ɖo èdɔ wɔ̀wɔa ŋuti ò.

²¹Na àpo èji ne lɔ̃ sumɔ̃vi ènu nyãtɔa eye mù gbà gbe yebe vòvo na naɛ ò.

²²Àlɛ̃hawo lè àsi wò à? Kpɔ woa ji. Ne wò le kpɔ àlè lè èmèa, jrɛ ɖo.

²³Ne èviwò lè àsi wòà, kpla wò, eye so woabe ɖèvi mèa fiɔ wò àmè bubu.

²⁴Èvi nyɔ̃nùviwo lè àsi wòa? Kpɔ woa ji ne woa nɔ̃ ègbè ji, eye mù gbà bɔ̀bɔ̀ ŋùkumè na wò wù ŋu ò.

²⁵Ɖe èsrɔ̃ na èvi wò nyɔ̃nùvia, e nyi èmɔ̃ nu nyuɛ̃ ɖe na wò, vɔa kpɔ e gbɔ be woa sɔ ɛ na ŋusù nyãnu.

²⁶Ne wò ɖè nyɔ̃nù sɔ zɔ̃ ɖo àpo jiji ji a, mù gbà ɖè àsi lè yè ŋuti ò, vɔ̀à mù gbà sɔ àpo èjì kù ɖo ekè wò mù le ja teŋu lɔ̃ wòà ŋuti ò.

²⁷Do bùbu ètɔ wò ŋuti so kaka àpo èjì mè eye mù gbà ŋlɔ̃ ènɔ̃ wò be àyà kè bè ɖù ɖo ŋuti wò à be ò.

²⁸Ɖo ŋùku be wòa woe na yè àgbè, eye nukɛ wò la teŋũ sɔ ɖo etèpe na wò ɖo ènù kè wo wɔ̀ na wòà ta ò. Ɖɔ do àsi ɖoɖa Mawunɔ̃wo gbɔ

²⁹Sumɔ̃ Tɔhonɔ̀ ku àpo èji keŋu eye ado bùbu yebe Mawunɔ̃wo ŋuti.

³⁰Lɔ̃ àpo ɖotɔa kudo àpo èjì keŋu eye mù gbà ɖè èkɔ̀ lè àmè kewo xɔ̀ yebe èdɔ do àsi a ŋuti ò.

³¹Vɔ̃ Tɔhonɔ̀ eye a do bùbu Mawunɔ̃wo ŋuti eye àsɔ yebe gome kpɔkpɔ be ènuwo naɛ, sìgbè àlekè wo ŋlɔ̃ɛ na wò à nene: ènuku cucugbɔ̃awo, ènu jraɖo be vɔsawo, vɔsa lãwo, ɖokoe sɔsɔna be vɔsa kudo ènu kɔkɔɛwo be ta ɖeɖe. Wòamenɔ̀wo ku èhiãfonɔ̀wo

³²Na ènu èhiãfonɔ̀a ne Tɔhonɔ̀ bèa tusì na wò sùgbɔ.

³³Na àpo ènu nanawo ne sù àmè àgbèàgbèwo kpata si eye ekè jè ne àmè kukù a, wɔ̀ eŋuti dɔ.

³⁴Mù gbà ɖè èkɔ̀ lè ènu xà tɔwo ŋuti ò, vɔa ma woabe ŋuzizĩ mè nɔ̀nɔa kudo wò.

³⁵Mù gbà do kpò dɔ̀nɔ̃wo jiji kpɔ ɖo lè eŋùã be wɔ̀wɔ mèa wò la lɔ̃ àpo ènyà gbɔ.

³⁶Lè ènu sia ènu be wɔ̀wɔ mèa, ɖo ŋùku àpo vɔ̀vɔnua ji kè la na be wò ma jè èvuɛ̃ mè ò.