Read gen Sirasid 9 Bible Online

Sirasid 9 - gen bible

Sirasid 9

¹Nyã wɔ̀wɔ ku nyɔ̃nùwo Mù gbà nɔ̃ huãŋu nyɔ̃nu kè be ènyà gbɔ wò lɔ̃ nà ò, ne bè a va trɔ glãsã ɖo ŋuti wò ò.

²Mù gbà ɖè àsi lè ɖokoe wò ŋuti ne nyɔ̃nù ne bè a ɖù ji wò ò.

³Mù gbà jè ŋùkɔ̀ ne gbòlò nyɔ̃nù ɖekpe ne wòa va yì gɛ̃ jè yebe èmɔ̃ tretrewo mè ò.

⁴Nyɔ̃nù àyè gɛdɛtɔ ɖekpe mu gbà flù wò, ne yebe nyɔ̃nyɔ̃ bè a gbã ŋùku na wò ò.

⁵Mù gbà dà ŋùkuvi wòwo ɖò tùgbɛ̀jɛvi ɖe ji, ne bè a dɔ̃ wò ɖo yebe cɔ̃crɔ̃ be èmɔ̃ me ò.

⁶Mù gbà ɖè àsi ɖokoe wò na gbòlò ɖekpe, ne mù nyi nène ò a àdɔ̀kùnu wòwo kpata la crɔ̃.

⁷Mù gbà sã ŋuku gòdò lè èdùa be èmɔ̃wo ji, ne be a va dɔ̃ wò yì zogbè ɖewo ji ò.

⁸Ɖe ŋùku jo lè nyɔ̃nù be nyɔ̃nyɔ̃ ji eye mù gbà klɛ̃ ŋùku ɖo nyɔ̃nù be àcɔ ɖoɖo kè mu nyi tɔ̀ wò òa ji ò. Nyɔ̃nù be nyɔ̃nyɔ̃a gble ŋusù sùgbɔ be dòmè, ɖoa e sũ nà yebe lãmè jrojròa sìgbè èzò nène.

⁹Mù gbà nɔ̃ ànyi ku nyɔ̃nù èsrɔ̃tɔ lè èkplɔ ŋuti ò, mù gbà ɖù àgɔ kui to vɛ̃ nùnu mè ò, ne àpo èjì mu gbà va trɔ ɖo e ŋuti eye to ekèa mèa wò la teŋu va gɛ̃ jè cɔ̃crɔ̃ mè. Nya wɔwɔ kudo ŋusuwo

¹⁰Mù gbà gble èhlɔ̃ xoxoa ɖɛ ò, ɖo yeyea ma teŋu sɔ̀ kui ò. Èhlɔ̃ yeyea lè sìgbè vɛ̃ yeye nène: ela do xo gbɔ̀xùe wò la nyã yebe àsì xɔ̀xɔ.

¹¹Mù gbà bìà ŋùku ɖo èvũɛ wɔ̀tɔ be ŋùkɔ̀ yìyi ŋuti o, ɖoa wò mù nyã vɔ̀vɔ̀nu ŋuzĩzĩ tɔ kè le nɔtè kpɔ ɛ ò.

¹²Mù gbà dɔ̃ àmè bàɖàwo be èji ɖùɖu ji ò, vɔ̀à ɖo ŋùku eji be wò mù la nɔ̀ ànyi èto màdɔ̃ kaka la sɔ yì èku mè ò.

¹³Nɔ àzɔ̀ge na ŋusù kè ɖo ŋusɛ̃ la wù àmèà, eye eye èku be vɔ̃vɔ̃ ma sò àɖìka na ò. Vɔa ne wò tètè gogoe à mù gbà ɖè àfɔ̀ bàɖa ò, ne mu nyi nène ò a, ela ɖè àpo àgbè jò. Ɖo ŋùku eji be wò le zɔ̃ lè èmɔ̃ tretrewo mè eye wò le ɖì sà to èdùa be àgbo sɛ̃sɛ̃wo mè.

¹⁴Ne ela hiã, ji èmɔ̃ na èha wò vi veveɖe ne wòa nɔ̃ àɖàŋù ɖèɖè mè ku àmèkèwo si ànyasã lè à.

¹⁵Ne mia ɖè ènyã mèà, ji ènu nyãtɔwo eye Mawu èjihuitɔa be èsèa la nɔ̃ ta na miabe ɖoɖoawo.

¹⁶Na be àmè jɔ̀jɔɛwo ne nyi àpo èkplɔ̃ ŋuti nɔ̀tɔwo, eye wòa sɔ àpo àmè nyinyia ɖo Tɔhonɔ̀ be vɔ̃vɔ̃ gɔmè.

¹⁷Lè àlɔ̀nudɔ wɔ̀tɔwo gbɔa, wo kafuna woabe àlɔ̀nudɔwo, vɔa, lè dùkɔ̃ be ŋkɔnɔ̃tɔ gbɔa, wo kafu na woabe ènya gbɔ̃gblɔ̃ ku ànyàsã.

¹⁸Àmè ke pò nupo sùgbɔ lè èdu mèa, mù ɖo na bùbu ò eye àmè kè ci na èjia crì nà yebe ènyã gbɔ̃gblɔ̃wo gbɔ.