Read gen Ezayà 10 Bible Online

Ezayà 10 - gen bible

Ezayà 10

¹Bàbà na àmè kèwo wɔ̀nà èse bàɖàwo eye wo cinaji ŋlɔ̀nà ɖoɖo kèwo hɛ̃nà àyàɖùɖu va.

²Wo zĩna àmè mà-ɖo àmèwo be ènyà ɖɛ eye wo ŋɛ̃na ŋùku pu wɔ̀amènɔ̀wo be jènawo ji lè dùkɔ̃a mè. Wo hlànà àhòsìwo be ènu ɖùnà eye wo ɖènà cɔɛviwo ɖo àma.

³Leke ye mì la wɔ̀ lè ètodɔ̃dɔ̃ be ŋùkèkè ŋua ji ò? Ne Tɔhonɔ̀ va toa, ne èjiya sɛ̃sɛ̃ ɖe pò so àzɔ̀ge vaa, àmè kɛ gbɔ mì la si yì bè ɖo ò? Fikɛ ye mì la yì bɔ̀ mìabe àdɔ̀kùnuwo wla ɖo ò?

⁴Ɖe kpò mì la xa gòbà lè gàkpamètɔwo dòmè eye wo la jèanyi lè àmè kèwo wo wùa dòmè. Vɔ̀a, lè eŋuã kpata mèa, Tɔhonɔ̀ be àdɔ̀mèzea nu mu ci ò eye yebe àbɔ sɛ̃sɛ̃a gbà lè àdã ji kòkò.

⁵Bàbà na Àsirìa kè mù sɔ le ɖè àdɔ̀mèze nyèa fiɔa. E nyi kũdrù kè mù sɔ le ɖè jìbi be àdã nyèa fiɔ.

⁶Mù ɖo è ne bèa sitè ɖo dùkɔ̃ mà-wɔ̀ ànùkua ŋuti. Mù do èdɔ àsi na ɛ̀ be bèa wɔ̀ àhùa kudo dùkɔ̃ kè le do ŋùklɛ̃ na mù a, ne bèa gbã gbà crɔ̃ yebe ènuwo eye bèa nyàmà ɛ̀ sìgbè bàba lè èmɔ̃ to nène.

⁷Vɔ̀a, Àsirìa ŋutɔ mu le kpɔ ɛ̀ nène ò; sùsu bu lè e si. Yebe jiji kpò ye nyi be yèa crɔ̃ dùkɔ̃ sùgbɔ ne yè teŋu kpe e jia.

⁸E gblɔ̃nà ŋutɔ cã be: “Àhùaga nyèwo ŋutɔ xɔ̀asì sìgbè èfìɔwo nène.

⁹Mù nyi nène be nyi na Kalnɔ̀ sìgbè àlekè be nyi na Karkemìtɔwo nènea? Nyè mu wɔ̀ ku Hàmatè sìgbè àlekè mù wɔ̀ kudo Àrpadè, eye mù wɔ̀ ku Sàmarìa sìgbè Dàmaskò nènea?

¹⁰Nène a ke ye mù ɖo àlɔ̀ vòdu sùmɔ̀ sumɔ be èfìɔduwo ji, fikèwo ye legbaviwo sùgbɔ lè wu Yèruzàlɛm àlo Sàmarìa.

¹¹Èto kè mù dɔ̃ na Sàmarìa ku yebe vòduwoa, mù la wɔ̀ ɛ̀ na Yèruzàlɛm ku yebe legbaviwo cã. Nyè mu teŋu ɖo nène be ŋusɛ̃ ò a?”

¹²Vɔ̀ ne Tɔhonɔ̀ ɖo àsitè na yebe èdɔ lè Ziɔ̀n be ètoa ji kudo Yèruzàlɛm vɔ̀a, e la trɔ ɖo Àsirìa be èfìɔa ŋuti. Ɖo e le kɔ ye ɖokoe yì ji, gbà le kpɔ ye ɖokoe ègòyitɔ.

¹³E gblɔ̃ ŋutɔ cã be: “Àpe ŋusɛ̃ ye mù sɔ le wɔ̀ ènuwo, sùsu nyè mè kɔ̀ ye ŋuti mù nya ènu ɖo. Mù ɖè èdùwo be lipòwo jo, mù hlà woabe ènuwo eye mù ɖè èfìɔwo jo lè woabe fìɔzìkpewo ji.

¹⁴Mù yì lɔ woabe àdɔ̀kùnuwo sìgbè lekè wo ɖènà xèvi be àtɔ̃ɛ nène. Mù yì lɔ ènuwo kpata lè ànyigbã ji sìgbè àlekè wo lɔna àzì kèwo wo gble ɖɛa nène. Eye àmè ɖekpe ŋutɔ mu pò èmu lè ŋuti cã kaka la va pò nupo ò.”

¹⁵Èfìɔ la teŋu kã àdã be yè le sò ènu ŋutɔ sɔ wu àmè kè le zã ɛ̀a? Àlo sakà la teŋu yigò lè àmè kè sɔ ɛ̀ le sò ènua be ŋùkɔ̀a? E lè kpò sìgbè èkpò ye le dro àmè kè kɔ ɛ̀ yì jia nène, àlo sìgbè kũdrù ye dro àmè kè sɔ ɛ̀ le zãa nène.

¹⁶Ekèa ŋuti ye Tɔhonɔ̀, àhùadù Tɔhonɔ̀ la na yebe ànyigbã nyuɛ̃wo be ègbewo ku àtiwo la pu kpakpla. Woabe nyiɖìɖia nu ma kpɔ ci gbɔ̀xue èzò la gɛ̃ ɖo woa mè sɔ fiɔ̃ wo keŋu-keŋu ò.

¹⁷Tɔhonɔ̀, Izràɛl be kɔ̀kɔ̀ɛa la trɔ zũ èzò. Mawu ɖèka ŋua la trɔ zũ èzò bìnu kè la bì àŋùja kudo àklãtiwo sɔ fiɔ̃ wo ŋùkèkè ɖèka.

¹⁸Nène a ye wo crɔ̃ àve kudo àbɔ nyuɛ̃wo kpata. E lè kpò sìgbè ŋusù kè èdɔ̀ lebea nène.

¹⁹Àti vi ɖewo kpò ye la kpɔ̀tɔ̀ lè Àsirìa be àvea mè, ɖèvi ŋutɔ cã la teŋu hlɛ̃ wo.

²⁰Gbè ŋua gbèa, Izràɛlvi kèwo ci àgbèa wo mu la gbà gbaɖo àmè kè le pò woa ŋuti ɖe ò. Vɔ̀a, wo la ji àlɔ̀xɔ̀kpe lè Tɔhonɔ̀, Izràɛl be àɖèsãa gbɔ, zè ɖèka.

²¹Àmè kpɔ̀tɛawo la trɔ gbɔ̀. Ɛ̃ɛ, Izràɛlvi kpɔ̀tɛawo la trɔ va Mawu ŋusɛ̃tɔa gbɔ.

²²Oò Izràɛl, ne dùkɔ̃ wòa gbà sùgbɔ sìgbè àpùta kɔkuiwo nène ŋutɔ cã, àmè viɖewo kpò ye la trɔ gbɔ̀ va Tɔhonɔ̀ gbɔ. Àmèwo be cɔ̃crɔ̃ be ènyà lètè, jìjɔɛ sòsoa la yì yebe èdɔ ji.

²³Eye cɔ̃crɔ̃ kèa kè ji wo ɖo èkpe ɖoa, Tɔhonɔ̀, àhùadù Tɔhonɔ̀a la na e la va e mè lè ànyigbã kpata ji.

²⁴Ènu kèa ŋuti ye Tɔhonɔ̀, àhùadù Tɔhonɔ̀a gblɔ̃ be: “Dùkɔ̃ nyè kè lè Ziɔ̀n be ànyigbã jia, mù gbà vɔ̃ na Àsirìa ò. E sɔ èkpò le pò wò gbà le kɔ èba yìji ɖo ŋuti wò sìgbè àlekè Ejiptèviwo wɔ̀ ɛ̀a nène.

²⁵Ɖo zãɖe kèa, ètodɔ̃dɔ̃a la nɔ̀tè, e yomè a, àpe àdɔ̀mèzea la trɔ ɖo e ŋuti sɔ crɔ̃ ɛ̀.”

²⁶Nyàwo àhùadù Tɔhonɔ̀a la ɖè yebe èba to ɖo Àsirìa ŋuti, sìgbè àlekè be pò Madìantɔwo lè Òrɛb be àkpã gbɔa. E la kɔ yebe èkpòa yìji sìgbè àlekè be wɔ̀ ɛ̀ lè àpùa to ɖo Ejiptè ŋutia nène.

²⁷Gbè ŋua gbèa, e la fò àgbã kè le kpɛ̃ lè àbɔta na wòa eye e la ɖè kɔ̀kùti wòa jo.

²⁸Kɛ̃tɔa lè yì Sàmarìa. E gogo Àyatè gbɔ, e yì to Migrɔ̀n eye e gble yebe àgbãwo ɖo Mikmas.

²⁹E tɔ èdùwo gbãgbã, e yì ci Gebà dɔ̃. Eye àmèwo tɔ vɔ̃vɔ̃ lè Ramà. Àmèwo si lè Gibea, Saolò be èdù mè.

³⁰Gàlim be nyɔ̃nùwo, mì do àpa sɔ sìa àmèwo. Layicàtɔwo ne nɔ̀ ètoɖoɖo mè eye Ànàtɔtè ne ɖo e ŋuti.

³¹Màdemenà ne si kaba, ɖo Gebìmtɔwo yì bè.

³²Gbè ŋua gbè ke ye kɛ̃tɔa la yì xa Nɔb. E la ŋlɔ̃ èkɔ̃ sɔ do ŋùklɛ̃ na Ziɔ̀n, Yèruzàlɛm be ètokɔ̃ɛa.

³³Àpetɔ ɖèka, àhùadù Tɔhonɔ̀ na àti be àlɔ̀zɛ̃wo le ŋɛ̃ kudo àdã. Àti sɛ̃ŋu ku gãgãwo kudo àti yìjiwo mù gblòo.

³⁴Àvemè be àtisuwo le mù lè èfiɔ nu. Libàn be sedàti nyuɛ̃wo yì ànyigbã kaka.