Read gen Ezayà 11 Bible Online

Ezayà 11 - gen bible

Ezayà 11

¹Àlɔ̀zɛ̃ ɖe la to so Jesè be xòmèa mè sìgbè àlekè àlɔ̀zɛ̃ yeye mìɔ̃ nà so àti be ègũnu xoxo mèa nène. Àlɔ̀zɛ̃ yeye la mìɔ̃ so ekèawo mè.

²Tɔhonɔ̀ be gbɔ̃gbɔ̃ la nɔ̀ e ji. E la na ɛ̀ nunya eye e la na ɛ̀ ŋusɛ̃ sɔ sò jɔ̀jɔɛ. E la nyi yebe ètopòɖotɔ kudo yebe ŋusɛ̃. E la na be la nya Tɔhonɔ̀ gbà ɖo sisi na ɛ̀.

³Nène a, bùbu dodo Tɔhonɔ̀ ŋuti la nyi jìjɔɛ be ènu na ɛ̀. E la ɖokòjo àmè ŋùkumè màkpɔtɔ̀. Eye mu la nɔ sè tomè tome ò.

⁴E la ɖokòjo jɔ̀jɔɛ na wɔ̀amènɔ̀wo, e la xɔ̀ ènyà ɖo àmè gbɔjɔgbɔjɔwo ta lè ànyigbã ji. Yebe ènyà la lɔ àmèwo sìgbè sɔba nène. Eye yebe ènyà gbɔ̃gblɔ̃ be ŋusɛ̃ la crɔ̃ àmè bàɖàwo.

⁵Jɔ̀jɔɛsòso kudo ànùkuawɔ̀wɔ la nyi yebe ègojiblanu gbè sia gbè tɔ̀.

⁶Nène a, gbète la nɔ̀ ànyi ku àlɛ̃, blèkpɔ̃ɛ la mlɔ̃ ànyi ɖo ègbɔvi gbɔ. Ènyìsuvi ku jãŋùtavi la ɖù ègbe ɖodu. Eye ɖèvi vifɛ̃ ɖe ye kpò la nɔ kplɔ̀ wo.

⁷Ènyìnɔ ku sisiblìsi la ɖù ènu lè àgblè ɖèka mè, eye woabe èviwo la ɖo nɔ̀pe ɖèka. Jãŋùta la ɖù ègbe pupu sìgbè ènyì ke nène.

⁸Vifɛ̃ la nɔ gble lè èdã be èdo nu eye ɖèvi la teŋu pò àlɔ̀ ɖo jàkpàtà be èdo mè fàa.

⁹Ènu bàɖà àlo èhlɔ̃dãnu ɖe mu la gbà nɔ̀ Tɔhonɔ̀ be èto kɔ̀kɔ̀ɛa ji ò. Nyàwoa, Tɔhonɔ̀ be nyanya la ɖɔ èdùa gbɛ̀lu sìgbè àlekè èsì ɖɔna àpùwoa nène.

¹⁰Àzã ŋua jia, Jesè be tɔgbeyɔvia la nɔ̀ sìgbè jèsìdo ɖe nène na ànyigbã ji be dùkɔ̃wo kpata. Wo la va ji ètopòɖo lè e gbɔ eye yebe nɔ̀pe la ɖɔ kudo Tɔhonɔ̀ be gogo.

¹¹Lè àzã ŋua gbèa, Tɔhonɔ̀ la gbà vlũ yebe àlɔ̀ ɖe sɔ hlùɛ̃ yebe dùkɔ̃mèvi kpɔ̀tɛawo gã: kèwo kãkã ɖo Àsirìa, Ejiptè, Pafɔ̀s ku Ètiopìa, kèwo yì sò ci Elàm, ci Babɛ̀l kudo Hamàt lè Sirìa, gbàkudo àpùdòmèkɔ̃ɛ̃wo ji.

¹²E la nyi jèsìdo ɖe na dùkɔ̃ ŋuawo. E la bɔ̀ Izràɛl be àhùalewo kudo Yudàvi kèwo kãkã ɖo xixea be àkpa ènèawo mèa.

¹³Nène a, Efràyim mu la gbà nɔ hùãnu ɖo Yudà ŋuti ɖe ò. Yudà be kɛ̃tɔwo la crɔ̃ eye mu la gbà nyi Izràɛl be kɛ̃tɔ ɖe ò.

¹⁴Eye wo la bɔ̀ ɖodu yì, zrò jè Filistìtɔwo be ètokɔ̃ɛwo ji lè èwèzɛ̃pe. Lè èwèɖoxɔ̀pea, wo la yì hlà zògbè ji be èdùkɔ̃wo. Edɔ̀m ku Mòab la nɔ̀ woabe ŋusɛ̃ gɔ̃mè eye Amɔ̀nviwo la jota na wo.

¹⁵Tɔhonɔ̀ la na Ejiptè be àpùsia kpata la pu. E la kɔ yebe àbɔ ɖo Efratà be ètɔ̀a ji eye e la hũhũ ì ku ŋusɛ̃. Ètɔ̀a la ma ɖo àlɔ̀zɛ̃ adrɛ̃ trɛlɛ kèwo wo la teŋu sò kudo àfɔ̀a, mè.

¹⁶E la ta èmɔ̃ ɖe na yebe dùkɔ̃mèvi kèwo la kpɔ̀tɔ̀ ci Àsirìa. E la nɔ̀ kpò sìgbè lekè be nɔ̀ lè blèmàmè na woa tɔgbe kèwo to lè Ejiptè a nène.