Read gen Ezayà 13 Bible Online

Ezayà 13 - gen bible

Ezayà 13

¹Mawu be ènyà ɖì na Ezayà, Amɔ̀t be vi ŋusù ɖo Babɛ̀l ŋuti.

²Tɔhonɔ̀ gblɔ̃ be: “Mì ɖì àplãŋuga ɖo èto puplua ji. Mì kpà àbòbo sɔ sìa àhùawɔ̀tɔwo. Mì wɔ̀ àsi na wo ne woa ɖo cãmìwo be àgbowo mè.

³Mù do ègbè àsi na àmè kèwo jo woa ɖokoe na mù a. Mù yɔ àpe kãlìsuwo bɔ̀, àmè kèwo kpɔna jìjɔɛ so àpe gãnyinyi ŋutia.

⁴Mì ɖoto hũnyà-hũnyà kè le ɖì lè ètowo jia. E lè sìgbè àmèha gã ɖe tɔ̀ nène. Mì ɖoto fìɔduwo be èzĩtɔ̀tɔ, dùkɔ̃ kèwo bɔ̀ ɖodua. Àhùadù Tɔhonɔ̀a ye le kpɔ yebe àhùakɔ̃wo ɖa.

⁵Àmè kèwo Tɔhonɔ̀ la zã sɔ ɖè yebe àdɔ̀mèzea fiɔa, wo so àzɔ̀ge boo gbãnà, so kaka xixea be vɔ̀vɔnu. Wo la crɔ̃ dùkɔ̃a keŋu.

⁶Mì làmɔɛ̃, ɖo Tɔhonɔ̀ be ŋùkèkèa gogo. E gbãnà sìgbè gbledo kè ŋusɛ̃ kpatatɔa ɖo ɖoɖa ne bèa crɔ̃ ènuwo kpataa nène.

⁷Ènu kèa ŋuti àmè sia àmè gbɔjɔ, ŋusɛ̃ vɔ̀ lè àmèwo be àbɔwo mè.

⁸Sùsumè caka na wo. Wo le sè vève kaka le sè ŋutilã mè tɔ̀ cã sìgbè lekè nyɔ̃nù lena èku nène. Wo le kpɔ woa nɔ̀nɔwo be ŋùmè ku ŋùdã. Woabe ŋùkumè ci jàjàjà.

⁹Kpɔɖa, Tɔhonɔ̀ be ŋùkèkèa gbãnà, ŋùkèkè jiŋɔa, e ɖɔ ku jìbi be àdã ŋutɔ. E la trɔ ànyigbã sɔ wɔ̀ zògbè pu kpakpla eye e la crɔ̃ àgɔ̀jètɔwo.

¹⁰Wètrivi kudo wètrivi pòpuwo mu la gbà na woabe kɛ̃klɛ̃wo ò. Eye so kaka èwè be zɛ̃zɛ̃ mè ke ye èwèa la ci vìgɔ̃, eye wètri cã mu la kɔ̀ ò.

¹¹Tɔhonɔ̀ gblɔ̃ be: “Mù la dɔ̃ èto na xixea ɖo yebe èku nyànyrã ŋuti, kudo àmèwo ɖo woabe èhlɔ̃dãdãwo ŋuti. Mù la ɖè ègòyitɔwo be jàjrawo jo. Eye mù la ɖiɖi àmè nyrãkuwo kpata.

¹²Mù la na àmèwo la dɛ̃ sìgbè sìka kè kɔ̀ ceŋu-ceŋuã nène; gbà wu Ɔ̀firò be sìka ŋutɔ cã.”

¹³Ekèa ŋuti ye jiŋùkusi la hũhũ eye ànyigbã be dodoewo cã la hũhũ. Ekèa la va e mè ɖo àhùadù Tɔhonɔ̀a be àdɔ̀mèze la bì sìgbè èzò nène.

¹⁴Nène a, wo la trɔ gbɔ̀ va woabe dùkɔ̃a dòmè sìgbè èzĩ kè wo le nyàa nène, sìgbè àlɛ̃ kèwo mu gbà ɖo kplɔ̀tɔ òa nène. Àmè sia àmè la si yì yebe ànyigbã ji.

¹⁵Eye wo la ŋɔ àmè kè ŋuti wo la kè ɖoa ku àŋùti. Gbà wua, wo la crɔ̃ àmè kèwo ji woabe àsi la jèa.

¹⁶Wo la kpɔ woabe èviwo be cɔ̃crɔ̃ tèpe, wo la hlà woabe àxuewo, eye wo la do àvũ na woa srɔ̃ nyɔ̃nùwo, sɔ dɔ̃ ku wo.

¹⁷Tɔhonɔ̀ gblɔ̃ be: “Mù la ɖo Medìatɔwo ɖo woa ŋuti. Wo mu jina klòsalò ò eye wo crì sìka cã.

¹⁸Woabe àŋùtiwo nana ɖèkajɛwo flina jè ànyi, wo mu kpɔna ɖo e mè na ɖèviwo cã ò, eye wo wɔ̀nà èhlɔ̃dãnu ku vifɛ̃wo.”

¹⁹Eye Babɛ̀l kè nyi èdùgã na fìɔdua la crɔ̃ sìgbè Sodɔ̀m kudo Gòmɔrà kèwo Mawu crɔ̃a nène.

²⁰Àmè be àfɔ̀ la sò lè èdù kèa mè eye e la ci toto (puplu) Màlɛ̀ ɖekpe mu la gbà do àzàva ɖo funu ò eye àlɛ̃kplɔ̀tɔ ɖekpe mu la gbà kplɔ̀ ègbɔ yì funu ò.

²¹Vɔ̀ ègbe-sewo ye la ɖo nɔ̀pe ɖo funu. Àzexewo kudo tatabòli gbàkudo gbɔgbɔɛwo la wɔ̀ nɔ̀pe ɖo funu sɔ nɔ jròwe.

²²Ègbe-vũwo la nɔ do àpa lè yebe àsãŋuwo ji eye gbètewo la bɔ lè yebe àzãɖùpewo. Babɛ̀l be vɔ̀vɔnua ye gogo, yebe ŋùkèkèwo nyi ènu hɛ̃hlɛ̃.