Read gen Ezayà 14 Bible Online

Ezayà 14 - gen bible

Ezayà 14

¹Tɔhonɔ̀ la ku ŋuzĩzĩ na Yakɔb be àxuea. Ɛ̃ɛ, e la gbà cã Izràɛl ɖe. Eye e la trɔ kplɔ̀ Izràɛlviwo gbɔ̀ va woabe ànyigbã ji. Dùkɔ̃ buwo la va wɔ̀ ɖèka ku wo, eye wo la ca kudo Izràɛlviwo.

²Dùkɔ̃wo la so àzɔ̀ge va kplɔ̀ wo yì woabe èdù mè. Eye Izràɛlviwo la trɔ sɔ wo wɔ̀ kluviwo lè Tɔhonɔ̀ be ànyigbã ji, lè ŋusù mè, lè nyɔ̃nù mè. Nène a ye Izràɛl la sɔ wo wɔ̀ kluvi sìgbè àlekè woa cã wo wɔ̀ ɛ̀a nène.

³Izràɛl, gbè ɖèkaa, Tɔhonɔ̀ la na wò la gbɔ̃jɛ̃ lè àyàɖùɖu, vevesèse kudo kluvi nyinyi sɛ̃ŋu kèwo mè wò to va yìa mè.

⁴Wàlɛbɛ ŋua, wò la jì èhàlo kèa ɖo Babɛ̀l be èfìɔa ta: Ŋusɛ̃ vɔ̀ na àmè kè le zĩ mi ɖo ànyi sãa. Yebe hũnyànyrã nu sò, bàbà na ɛ̀ sè!

⁵Tɔhonɔ̀ gbã àmè bàɖàwo be ŋusɛ̃, e ŋɛ̃ àmè dèamènuwo be èkpò.

⁶Àmè kè pò dùkɔ̃wo lè yebe jìbi be àdã mè ètèmàtɔ. E gbà do àyà na wo sùsuiɖe.

⁷Fifìa, ànyigbã kpata kpɔ fàfa eye àmèwo le do jìjɔɛ be àpa.

⁸Àtisuwo ŋutɔ cã kpɔ jìjɔɛ ɖo ènu kè va na wòa ŋuti. Èjètiwo kudo Libàn be sedàtiwo gblɔ̃ be: “Kaka kè wò lè èyɔ̀do mèa, àmè ɖekpe mu gbà va ɖe, la mù mi ò.”

⁹Èkuwodetɔwo le jràɖo la xɔ̀ wò ku jìjɔɛ ne wò va ɖoa. Kù ɖo ŋuti wò ye èkuwode le fɔ̃ ŋùãlìwo kudo xixea be àmègãwo. E gbà na ànyigbã ji be èfìɔwo sitè lè woabe àzìkpewo ji.

¹⁰Àmèwo kpata le gblɔ̃ ku ègbè ɖèka be: “Wò cã, wò mu gbà ɖo ŋusɛ̃ sìgbè miawo ke nène ò. Wò ɖì mi fifì!”

¹¹Èhàwo ye wo sɔ kplɔ̀ àpo nyiɖìɖia yì èkuwode. Ɖiɖɔɛ ye nyi àpo àba eye è yèwo trɔ zũ àpo àbajivɔ.

¹²Kpɔ àlekè wò gɛ̃a ɖa! Èwò kè ɖì ŋùdekɛ̃nyɛ be wètrivia! Wo sɔ wò pu ànyi, èwò kè mùnà dùkɔ̃woa!

¹³Wò le susu sã be: “Mù la lia jiŋùkusi, mù la ɖo èfìɔzìkpe nyè ɖo funu lè Mawu be wètriviwo ji. Mù la ɖo nɔ̀pe ɖo èto kè ji vòduwo bɔ̀nà lèa, lè èvègo ɖaa ji.

¹⁴Mù la lia lilikpo be ètamè, eye mù la nɔ̀ sìgbè Mawu èjihũitɔa nène.”

¹⁵Vɔ̀, èwò ye wo ɖiɖi ɖo èkuwode ke, yì kaka ègũ titoa mè.

¹⁶Àmè kèwo la kè ɖo ŋuti wòa, la le ŋùku ɖo ŋuti wò nyuɛ̃ ɖe. Eye wo la nɔ gblɔ̃ be: “Àmè kè nana hũnyà-hũnyà lè èdùa mèa ye nyi àmè kèa tututua? E ye kè tɔ̀nàzi èfìɔduwoa!

¹⁷Àmè kè trɔ xixe-dùwo wɔ̀ zògbè, kè crɔ̃ èdùwo gbà gbe be yè mu la ɖègà ègàkpamè nɔ̀tɔwoa ye ŋua?”

¹⁸Ɛ̃ɛ, dùkɔ̃wo kpata be èfìɔwo yì gbɔ̃nàjɛ̃ lè bùbu tɔ̀xɛ mè, àmè sia àmè lè yebe èyɔ̀do mè.

¹⁹Vɔ̀ èwò ya, wo sɔ wò dàŋùgbe ɖo àzɔ̀ge boo lè bùbu-yɔ̀do wòa gbɔ. Wò lè sìgbè vifɛ̃ hũkɔ̃ɛ̃ kè trɔ ŋùgbe lè yebe jìjimè kèa nène. Wò lè sìgbè àmè kèwo wo flì lè èwui nu eye wo hlɛ̃ wo ɖo èkpewo ji lè èdo gã ɖe mèa nène.

²⁰Vɔ̀a, wo mu la ɖì wò kudo wo ò, ɖo wò crɔ̃ àpo èdùa, eye wò gbã dùkɔ̃ wòa. Wo la ŋlɔ̀be wò èhlɔ̃dãtɔ kèa kaka sɔyì.

²¹Mì jràɖo sɔ crɔ̃ ɖèviwo ɖo woa tɔwo be èvuɛ̃wo ŋuti. Ne wo mu gbà va sitè sɔ xɔ̀ ànyigbã ò, eye ne kɛ̃tɔwo ɖèɖe ne nɔ̀ xixea mè ò.

²²Àhùadù Tɔhonɔ̀a gblɔ̃ be: “Mù la sitè ɖo Babɛ̀lviwo ŋuti, mù la tutu yebe nyikɔ kudo fikè be nɔ̀a jo, eye yebe jìjimèvi ɖe mu la gbà nɔ̀ ànyi ò.

²³Mù la sɔ funua sɔ wɔ̀ bàbaji, fikè hlɔ̃màdɛ̃wo la kpɔ nɔ̀pe lè. Mù la kplɔ̀ ɛ̀ kudo èxa kè crɔ̃na ènua. Tɔhonɔ̀ ye gblɔ̃ ɛ̀.”

²⁴Àhùadù Tɔhonɔ̀a tànu gblɔ̃ be: “Ɛ̃ɛ, ènu kè mù fìã a, la va e mè; ènu kè mù ɖoa, la jɔ̀ godo godo!

²⁵Mù la gbã Àsirìatɔwo be ŋusɛ̃ lè àpe ànyigbã ji, mù la tùkù wo lè àpe ètowo ji. Eye mù la ɖè woabe kɔ̀kùtia jo, mù la ɖiɖi àgbã lè woabe àbɔta.”

²⁶Ɖoɖo kèa ye Tɔhonɔ̀ wɔ̀ ɖo xixea kpata ŋuti. Lekè yebe àbɔ sɛ̃sɛ̃a la sitè ɖo dùkɔ̃wo kpata ŋuti ɖoa yeŋu.

²⁷Ne Àhùadù Tɔhonɔ̀a ɖo ènu ɖe be yèa wɔ̀a, àmè kɛ ye la nɔ̀tè è ò? Ne e kɔ yebe ŋusɛ̃ bɔa yì jia, àmè kɛ la teŋu kpe e ji ò?

²⁸Ènyà kèa va e mè lè èpè kè mè èfìɔ Àkaz ku lèa.

²⁹Mìa Filistìtɔwo, mì mu gbà kpɔ jìjɔɛ be èkpò kè le pò mì sãa ŋɛ̃ ò. Ɖo nyàwoa, jàkpàtà teŋu to lè èdã kukua mè. Eye ekèa teŋu jì èhɔ̃ drìbà kè zrònà a.

³⁰Nène a, wɔ̀amènɔ̀wo la kpɔ ènu ɖù nyuɛ̃ ɖe, ènuwɔ̀donɔ̀wo la nɔ̀ àgbɔ̃jèpò mè. Vɔ̀ mìa Filistìtɔwo ya, mìabe kɛ̃tɔwo la na mì la ku àdɔ̀ ku eye wo la wù àmè kèwo la ci àgbèa.

³¹Àgbowo, mì ŋɛ̃! Mìa èdùgãwo mì fã àvi. Filistì be èdùa kpata titɔ, ɖo àhùakɔ̃ gã ɖe tɔ̀zĩ gbãnà so èvègo sìgbè lilikpo nène. Eye kɛ̃tɔwo dòmè tu kpi kpi kpi gbãnà.

³²Ènyà kɛ mi la gblɔ̃ na Filistìtɔwo be àmèdɔ̃dɔ̃a ò? Mì gblɔ̃ kpò be: “Tɔhonɔ̀ ŋutɔ ye ɖo Ziɔ̀n. Funu ye be na yebe dùkɔ̃a be wɔ̀amènɔ̀wo ne woa kpɔ àgbɔ̃jèpò lè.