Read gen Ezayà 15 Bible Online

Ezayà 15 - gen bible

Ezayà 15

¹Àŋɛ̀dodo so Mòab ŋuti. Ɛ̃ɛ, lè èzã ɖèka mè ke wo xa Arò-Mòab eye wo crɔ̃ ɛ̀. Ɛ̃ɛ, lè èzã ɖèka mè ke wo xa Kirò-Mòab eye wo crɔ̃ ɛ̀.

²Dibɔ̀ntɔwo yì tèpe kɔ̀kɔ̀ɛa yì fã àvi. Mòabtɔwo jì àviha lè Nebò kudo Mèdebà. Wo plɔ èta na àmè sia àmè eye wo sò ègɛ̃ na wo keŋu.

³Wo do ècɔwɔ̀wuwo lè èdùa mè eye wo le jì àvihawo gbà le fã àvi le do hèhè.

⁴Lè Hɛsbɔ̀n kudo Èlalèa, wo le ji àlɔ̀dotɔ kudo àpa. Wo le sè woabe nyikɔ lè kaka Yahàs. Ekèa ye na be Mòab be àhùakɔ̃a lè àpa ji. Eye àgbɔ̃ kpe wo.

⁵Mù le biɔ àlɔ̀do sɔ kpe ɖo Mòab ŋuti. Wo si keŋu-keŋu yì Soàr, yì kaka Ègla-Sèlisìa. Wo lia Lùhitò be èkpoa kudo àvi. Wo le do àpa lè Horonayìm be èmɔ̃a ji lelele gblɔ̃ be: “Ènu sia ènu crɔ̃. Gbledo vuɛ̃ kɛ ye nyi ekèa ò!”

⁶Nimrìm be sìdoa to trɔ zũ ŋuzĩzĩ be zògbè ɖe. Àtiwo pu eye àmàwo bu keŋu-keŋu. Eye àmà mumu ɖekpe mu gbà lè ò.

⁷Ekèa ŋuti ye àmèwo lɔ woabe ènu kèwo kpɔ̀tɔ̀ na wo kudo kèwo wo teŋu wlawo cã. Wo lɔ wo yì kaka àti lɔ̀bɔ̀wo be ètɔ̀ sàsra godo.

⁸Mi sè wo le do xɔ̀namè be àpa trɔ do Mòab nyigbã kpata. Mi le sè ècɔ be àpa kèa kaka yì Èglayìm, kaka yì Elìm be vudoa to.

⁹Ètɔ̀ kè to Dimɔ̀n va yìa, trɔ zũ èhũ ɖèɖe. Tɔhonɔ̀ gblɔ̃ be: “Mù la ɖo gbledo àlo jɔ̀gbè vuɛ̃ buwo ɖoɖa Dimɔ̀n: Jãŋùta la xa Mòab-tɔ kèwo kpɔ̀tɔ̀ lè àgbèa, kèwo ci woabe ànyigbã jia!”