Read gen Ezayà 16 Bible Online

Ezayà 16 - gen bible

Ezayà 16

¹Mòab be gawo gblɔ̃ be: “Mì ɖo ènyì-suwo so kaka zògbè ji be àkpã gbɔ ɖoɖa èdùa be àpetɔ, ɖoɖa Yudà be èfìɔa lè Ziɔ̀n be ètoa ji!”

²Mòab be nyɔ̃nùwo si yì fikè ye Arnɔ̀n be èsìa do ènu àpù mè lèa. Wo lè sìgbè xèvi kèwo wo nyà ɖo ènu boo lè woabe nɔ̀pewo nène.

³Mòabtɔwo biɔ so Yèruzàlɛm gbɔ be: “Mì kpe ɖo mia ŋuti ne mia ɖokpe ènyà ɖèka ji. Mì cɔ̃ mia ji lè ŋùkèkè mè sìgbè àlekè èzã cɔ̃na xixea ji kudo yebe vìvìtia nène. Mì wla àmè kèwo wo nyà ɖo ègbea, mì mu gbà ɖèha àmè kèwo sia ò.

⁴Mì na miabe àmè nyà ɖo ègbewo ne nɔ̀ mìa gbɔ. Mì na wo nɔ̀pe lè ènugbletɔwo gbɔ. Àmè kè le ɖiki àmèwo mu la nɔ̀ àgbè kaka yì ò, ènucɔ̃crɔ̃wo nu la sò. Eye ènucrɔ̃tɔa la jo lè miabe ànyigbã ji.

⁵Nène ye to àdɔ̀mè nyuɛ̃ mèa, èfìɔ be èfìɔɖùɖua la likè. E la kplɔ̀ David be fìɔdua kudo ànùkua. E la nyi kòjoɖotɔ kè la nɔ wɔ̀ ɖo èsea ji gbà le jɔ̀jɔɛsòso ɖotè.”

⁶Mi sè Mòab be hùɛ̃yiwɔ̀wɔ ku jajraa. Ànyakoko kɛ, àmè ɖokoe kpɔkpɔ kɛ ye nyi ekèa! Mi kpɔ yebe kãkãɖoji kudo yebe àmènya hɛ̃hɛ̃. Co yebe ènyàwo mu ɖona kpɛ̃kpɛ̃ ò.

⁷Fifìa, Mòabtɔwo le fã Mòab be èdùa, àmè sia àmè le do hèhè. Wo le ŋɛ̃ sɔ le ɖoŋùku vɛ̃ku be kekè kè wo wɔ̀nà lè Kir-Herɛ̀s. Àgbɔ̃ kpe wo keŋu-keŋu.

⁸Hɛsbɔ̀n be àgblèwo ci gbalo sìgbè Sibmà be vɛ̃-gblewo cã nène. Sãa, vɛ̃ kèa ye muna dùkɔ̃wo be àpetɔwo. Vɛ̃gble kèawo yì kaka Jàzɛr, wo mìɔ̃ ɖo àfi sia àfi lè zògbè ji. Woabe àlɔ̀zɛ̃wo yì kaka èjè be àpùa godo.

⁹Ekèa ŋuti mù le fã àvi ku Jàzɛr-viwo ɖo Sibmà be vɛ̃-gblewo ŋuti. Mù la kɔ̀ àvi nyèa ɖo ji wò Hɛsbɔ̀n kudo èwò Elalè ji. Nyàwo, àhùa-pa ɖì ɖo mìabe vɛ̃ku kudo mìabe nukuyàyawo ji.

¹⁰Jìjɔɛ ku àyosòso bu lè mìabe àtikusɛ̃sɛ̃ be àgblèwo mè. Wo mu gbà sènà èhà ku nukòkoe lè vɛ̃-gblewo mè ò. Àmè ɖekpe mu gbà le fiɔ̃ vɛ̃kusɛ̃sɛ̃ lè vɛ̃fiɔ̃nu mè ò. Eye mù ci jìjɔɛ be àpawo nu.

¹¹Eŋuã ŋuti ye èjì nyè le fã Mòab. Ènuxàxa nyè lè sìgbè èkàsãŋùgu be ɖìɖi nène. Mù le ŋɛ̃ ɖo Kir-Hɛrɛ̀s nu.

¹²Wo kpɔ Mòabviwo le jè àgbàgba la lia tèpe yìjiwo.

¹³Ekèa ye Tɔhonɔ̀ gblɔ̃ so Mòab ŋuti so blèmà.

¹⁴Eye fifìa, Tɔhonɔ̀ ɖè gblɔ̃ be: “Lè èpè ètɔ̃ yomè tututua, Mòab be àmègãwo kudo dùamètɔwo mu la gbà ɖo àsìxɔ̀xɔ ɖekpe ò. Àmè kèwo la kpɔ̀tɔ̀a cã mu la sù ne ènu ɖe ò, vitukui ɖe kpò wo la nyi.”