Read gen Ezayà 17 Bible Online

Ezayà 17 - gen bible

Ezayà 17

¹Ènyà so Dàmaskò ŋuti. Zãɖe kèa, Dàmaskò mu la nyi èdù ò, ɖo e la trɔ zũ èglìkpo ɖèɖe.

²Wo la ɖè èkɔ̀ lè èdù kèwo lè gɔ̃mè na ɛ̀ sãwo ŋuti kaka sɔyì. Wo la trɔ zũ èlãhawo be èkpa eye wo la sò nɔ̀pe na wo ɖo funu eye àmè ɖe mu la do ŋɔji na wo ò.

³Àkpoxɔ̀nu be èglì mu gbà la nɔ̀ Dàmaskò ò eye Aràm be àmè kèwo la kpɔ̀tɔ̀a, la nɔ̀ kpò sìgbè Izràɛlviwo tɔ̀ nène. Tɔhonɔ̀ ŋusɛ̃ kpatatɔa ye gblɔ̃ ɛ̀.

⁴Gbè ŋua gbèa, Izràɛl be ŋusɛ̃ la ɖiɖi. Mu la gbà ɖo kpɛ̃kpɛ̃ mè kè lè e si sã ò.

⁵E la nɔ̀ kpò sìgbè nukuyàya hùenu yomè nène. Ne àgblèdètɔ yà nuku vɔ̀ eye e ɖo yebe àvà vɔ̀ nène. E la nɔ̀ kpò sìgbè Rèfayitè be bàlì mè ne wo yà nukuwo vɔ̀a nène.

⁶Izràɛl be àkpa viɖe kpò ye la kpɔ̀tɔ̀. E la ci sìgbè àmìti kè ji wo gbã àmìku sɛ̃sɛ̃wo lè vɔ̀a nène. E la kpɔ̀tɔ̀ kusɛ̃sɛ̃ ɖèka ku èvè lè àtia be àɖɔ̀ mè eye lè àlɔ̀zɛ̃ kè sɛ̃ sùgbɔa jia, wo mu la gbà kpɔ sɔ wu ènè àlo àtɔ̃ cã ò. Nène ye Tɔhonɔ̀, Izràɛl be Mawu a gblɔ̃.

⁷Gbè ŋua gbèa, àgbètɔwo la trɔ ɖoɖa woabe Ɖotɔ a gbɔ. Wo la kɔ ŋùmè yì ji ɖoɖa Mawu Izràɛl be àɖèsãa gbɔ.

⁸Wo mu la trɔ yì woabe vɔsakpe kèwo wo sɔ woabe àlɔ̀ sɔ wɔ̀a gbɔ ò. Wo mu la gbà dojì ɖo àtikpo-vòdu kudo lififiɔ̃nu kèwo wo wɔ̀a ŋuti ɖe ò.

⁹Gbè ŋua gbèa, Izràɛl be èdù sɛ̃sɛ̃wo la ci puplu, sìgbè Hivitè kudo Àmorìtɔwo nène wàlɛbɛ kè Izràɛlviwo va ɖoa.

¹⁰Izràɛl, wò ŋlɔ̀be Mawu kè hlùɛ̃ wòa. Wò mu gbà ɖoŋù àkpã kè nyi àkpo na wòa ò. Eŋuãti ye wò le do àti kèwo jè ŋùku mè na wòa kudo nuku kèwo so àmèjro-nyigbã jia.

¹¹Gà kè mè wò le do woa, wò le kpɔ wo le mìɔ̃ zè ɖèka. Ènu kè wò do ŋùdekɛ̃nyɛ̃a, to àmà kudo flawɔ̀a gbè ŋua gbè ke. Vɔ̀a, lè gbledo be gàmèa, nukuawo kpata bu eye gbledo kèa be èvè mu lè ò.

¹²Gbledo kɛ kèa ò! Dùkɔ̃ gbogbo le wo sìgbè àpù be ègbè ɖèɖe nène. Wo le wɔ̀ àdã sìgbè èsì kè jè àglaa nène.

¹³Dùkɔ̃wo be àdãwɔ̀wɔ le ɖì àpù gãgãwo be àgla jèje. Tɔhonɔ̀ wo do wo eye wo si yì àzɔ̀ge boo. Wo nyà wo sìgbè àlekè ètowo ji be àya kplɔ̀nà bèyɔɛ nène, sìgbè àlekè àya sɛ̃sɛ̃ kè soa, nyànà hũhũ kè bla kɔ̀tɔ̀a nène.

¹⁴Lè wètrɔ mèa, vɔ̃vɔ̃ gã ɖe jè ànyi. Gbɔ̀xue èŋù la kèa, wo bu keŋu-keŋu. Ekèa ye la jɔ̀ ɖo àmè kèwo hlà miabe ènuwo ji. Nène be la nyi na àmè kèwo lɔ miabe àlɔ̀nudɔwoa yeŋu.