Read gen Ezayà 18 Bible Online

Ezayà 18 - gen bible

Ezayà 18

¹Èfũ kɛ ye la nyi na ànyigbã kè ji àbaɖa-vè be àpùjihũwo lè, kè lè Ètiopìa be ètɔ̀ sàsrawo be àhà ji ò.

²E ɖo yebe àmèdɔ̃dɔ̃ kèwo sɔ keti be àpùjihũ le to Ejiptè be ètɔ̀ gã jia. Mì trɔ yì mìabe èdù mè, àmèdɔ̃dɔ̃ kèwo àfɔ̀ sɔ̀nawo. Mì trɔ yì mìabe dùkɔ̃ kè mè àmè jɔ̀ àsuwo lè, eye àgbàze mè klɛ̃ na woa; dùkɔ̃ kè dona vɔ̃vɔ̃ na àmè lè ègo ɖekpekpe mèa, dùkɔ̃ sɛ̃ŋu kè tùkùnà yebe kɛ̃tɔwoa. Mì trɔ yì mìabe èdù kè mè ètɔ̀ sàsra sùgbɔ toa.

³Mì ànyigbã ji nɔ̀tɔwo kpata, mì àmè kèwo lè xixea mèa, mì kpɔ ne wo ɖè jèsìdo ɖe fiɔ lè ètowo jia, mì ɖoto ne wo ku èlãzoa.

⁴Nyàwo Tɔhonɔ̀ gblɔ̃ na mù be: “So kaka fikè mù lèa, mù jro la kpɔ eye ma nɔ̀ kpoo sìgbè èzò bì ènu lè kɔ̀kɔ̀ɛ mè nène, sìgbè àhũ be lili lè nukuyàya be zòzo mè nène.”

⁵Gbɔ̀xue wo yà ènua, wàlɛbɛ kè vɛ̃ka la pò èse, wàlɛbɛ kè ye sepòpoawo la sɛ̃ èku kplìnyàa eye wo la ɖìa, wo la kɛ̃ àlɔ̀zɛ̃ kèwo mu gbà jè òa kudo àmàkpa kèwo mu hiã òa, jo.

⁶Nène a ke ye Ètiopìatɔwo la ci àsi na ètomè be àvàkòwo kudo èlãwɔ̀adãwo lè hùenu bàɖà mè.

⁷Eŋuã, wo la hɛ̃ ènunanawo so dùkɔ̃ ŋua mè va na xixea be Tɔhonɔ̀. Dùkɔ̃ kè be àmèwo jɔ̀ àsu eye àgbàze mè klɛ̃ na woa, dùkɔ̃ kè ɖona vɔ̃vɔ̃a, dùkɔ̃ sɛ̃ŋu kè tùkùnà yebe kɛ̃tɔwo eye ètɔ̀ sàsrawo to e mè va yì. Wo la hɛ̃ nunana kèawo so Ziɔ̀n be ètoa ji va, fikè Tɔhonɔ̀ sò nɔ̀pe ɖoa.