Read gen Ezayà 19 Bible Online

Ezayà 19 - gen bible

Ezayà 19

¹Ènyà so Ejiptè ŋuti. Kpɔ Tɔhonɔ̀ zɔ̃ lilikpo ɖèbla ɖe ji va ɖo Ejiptè. Ejiptè be àjè vòduwo hũhũ eye Ejiptètɔwo gbɔjɔ.

²Tɔhonɔ̀ gblɔ̃ be: “Mù la na Ejiptètɔwo la sitè ɖo woa nɔ̀nɔwo ŋuti, wo la dà èkɔ̃ lè woa nɔ̀nɔwo dòmè, nɔ̀vi kudo nɔ̀vi, èxlɔ̃ kudo èxlɔ̃, èdù gã kudo èdù gã, fìɔdu kudo fìɔdu.

³Ejiptètɔwo gbɔjɔ eye mù sɔ tìtɔ̀ titɔ do woabe ètamè susuwo mè. Wo yì biɔ ènyà gɔ̃mè woabe àjè vòduwo, àzetɔwo, ŋùãlìwo kudo èsɔ̀mèkpɔtɔwo.

⁴Mù la ɖè Ejiptè do àsi na àpetɔ màku ŋuzĩzĩ ɖe be ŋusɛ̃, èfìɔ nyrãku ɖe la kplɔ̀ ɛ̀.” Àhùadù Tɔhonɔ̀ ye gblɔ̃ ɛ̀.

⁵Ejiptè be ètɔ̀ gã be èsìa la pu kpakpla.

⁶Yebe ètɔ̀wo la pu, gɔtà be èsìwo la ɖè kpɔ̀tɔ̀ lè Ejiptè kaka wo la pu keŋu-keŋu. Keti kudo àɖakowo la yrɔ̀.

⁷Ègbe kèwo mìɔ̃ ɖo ètɔ̀ gã to mèa kudo kèwo lè fikè e jè àpù mè lèa; ègbe kè gbe mìɔ̃ ɖo ètɔ̀ to kpòa la pu. Àya la kplɔ̀ ɛ̀ eye ènu ɖekpe mu la kpɔ̀tɔ̀ lè funu ò.

⁸Ètɔ̀jiyìtɔwo kpata le na àle. Àmè kèwo kpata yìnà ètɔ̀ gã jia, lè ŋuzĩzĩ mè. Àgbɔ̃ kpe àmè kèwo dànà èɖɔ lè Ejiptè be ètɔ̀ gã jia.

⁹Àmè kèwo lɔ̃nà àlìŋudà-vɔa, gbɔjɔ. Nyɔ̃nù kèwo le jɔ̀ ɛ̀a kudo ŋusù kèwo le lɔ̃ ɛ̀a, ci kpɔ̃ sìgbè èdɔ̀ le le wo nène. Ɖo wo ci jojojoe.

¹⁰Ŋusɛ̃ vɔ̀ na àvɔlɔ̃tɔwo, èdɔwɔ̀tɔ kèwo kpɔna ènuɖùɖu to èdɔ kèa mèa, kpata bu ŋùɖo.

¹¹Soàn be dùmèmègãwo jè àɖàhùa. Ejiptè be èfìɔ be ètopòɖotɔwo be habɔ̀bɔa trɔ zũ ètagbɔgbegbletɔwo be èha. Wo gblɔ̃ be: “Mù nyi ènunyatɔwo be èvi, èfìɔ kèwo nɔ̀ ànyi sãa be viwo.” Èmɔ kɛ ye wo kpɔ la gblɔ̃ ènyà kèa na yè ò?

¹²Ejiptè be èfìɔ, fikɛ ye ènunyatɔ wòawo lè ò? Wo ne gblɔ̃ ènu kè àhùadù Tɔhonɔ̀a ɖo ɖo èdù wòa ŋuti na wò.

¹³Soàn be dùmèmègãwo trɔ zũ bòmècitɔwo. Mènfis be àmègãwo le flù woa ɖokoewo. Eye kɔpemè be ègawo ye le kplɔ̀ Ejiptè ɖo èmɔ̃ vuɛ̃ ji.

¹⁴Tɔhonɔ̀ na ètagbɔ flù na wo. Ɛ̃ɛ, àmègã kèawo ye le kplɔ̀ Ejiptè ɖo èmɔ̃ vuɛ̃ a ji lè woabe wɔ̀wɔwo mè. Ejiptè jo ɖì àhànùmunɔ̀ ɖe kè le kplà le yì eye be le trua.

¹⁵Àmè ɖekpe mu gbà le wɔ̀ ènu ɖe lè Ejiptè ò, so àmègãwo ji va jè èdùmèviwo ji ò, so cãmìwo ji va kɔ̀ ɖo àmè gbalowo ji ò.

¹⁶Gbè ɖèkaa, Ejiptètɔwo la trɔ sìgbè nyɔ̃nùwo nène. Wàlɛbɛ kè àhùadù Tɔhonɔ̀ la kɔ yebe ɖùsilɔ yì ji, la tɛ̃ ŋùku do woa, wo la vɔ̃ kaka la hũhũ.

¹⁷Yudà be ànyigbã la nyi ŋùkpɛ̃ be ŋùkuɖojinu na wo. Ne wo le gblɔ̃ èdù kèa be nyà lè woa gbɔa, wo la nɔ vɔ̃ ɖo ènyà kè àhùadù Tɔhonɔ̀ sɔ ɖo e ŋutia ŋuti.

¹⁸Gbè ɖèkaa, wo la do Hebrùgbe lè èdù àtɔ̃ mè lè Ejiptè, eye èwo la tà ènu sɔ trɔ zũ àhùadù Tɔhonɔ̀a tɔ̀. Wo la yɔ èdù ɖèka lè èdù àtɔ̃awo dòmè be “Dɔ̃ŋùkusu be èdù-gã”.

¹⁹Gbè ɖèkaa, Tɔhonɔ̀ be vɔsakpe ɖèka la nɔ̀ Ejiptè be dòdòmè tututu, eye wo la li ŋùkuɖoji-kpe ɖèka ɖo yebe lipòa gbɔ.

²⁰Ekèa la nyi jèsìdo be àhùadù Tɔhonɔ̀a xɔ̀ ànyi nɔ̀ ɖo Ejiptè. Ne Ejiptètɔwo do àpa yɔ Tɔhonɔ̀ ɖo wo le zĩ wo ɖo ànyi ŋutia, e la dɔ̃ hlùɛ̃tɔ kè la va xɔ̀ na wo eye be la tu wo èkàa ɖoɖa wo.

²¹Tɔhonɔ̀ la ɖè ye ɖokoe fiɔ Ejiptètɔwo, eye gbè ŋua gbèa, Ejiptètɔwo la nya Tɔhonɔ̀. Wo la sɛ̃ Tɔhonɔ̀a to vɔsa ku ènunanawo mè. Wo la fìã àjɔ̀gbè na Tɔhonɔ̀ eye wo la wɔ̀ ɖo e ji.

²²Tɔhonɔ̀ la pò Ejiptètɔwo eye e la gbà dà èdɔ̀ na wo ne wo trɔ va e gbɔa. E la sè woabe blìbɔ̀-blìbɔ̀ eye e la dà èdɔ̀ na wo.

²³Gbè ɖèkaa, wo la do èmɔ̃ so Aràm yì Ejiptè. Aràmtɔwo la yì Ejiptè, eye Ejiptètɔwo cã la yì Aràm nyigbã ji. Woa kpata la sumɔ Tɔhonɔ̀ ɖodu.

²⁴Gbè ɖèkaa, Tɔhonɔ̀ la tu sì na xixea: E la tu sì na Izràɛl zè ètɔ̃gɔ̃a, kudo Ejiptè gbàkudo Aràm.

²⁵Àhùadù Tɔhonɔ̀a la tu sì na xixea, gblɔ̃ be: “Mù tu sì na Ejiptè, àpe dùkɔ̃, Aràm kè mù sɔ àpe àlɔ̀wo wɔ̀a, kudo Izràɛl àkpa kè nyi tɔ̀ nyèa.”