Read gen Ezayà 2 Bible Online

Ezayà 2 - gen bible

Ezayà 2

¹Àmos be vi, Ezayà be ènyà kè be xɔ̀ so Yudà be èfìɔdu ku Yèruzàlɛm be èdùa ŋutia ye nyi ekè.

²E la va e mè gbè ɖèka be Tɔhonɔ̀ be gòxɔ be ètoa la yì ji wu ètowo kpata eye e la to ètokɔ̃ɛwo kpata ŋuti. Dùkɔ̃wo kpata la tɔ̀zĩ va kɔ̀ ɖɛ.

³Dùkɔ̃ gbogbo ɖewo la so jè èmɔ̃ eye wo la gblɔ̃ be: “Mì va ne mia yì Tɔhonɔ̀ be ètoa ji, yì Yakɔb be Mawu a be àxuea mè. E la fiɔ mi yebe ɖoɖowo eye mi la wɔ̀ ɖo wo ji.” Ɛ̃ɛ, nyàwo ènufiɔfiɔ la so Ziɔ̀n eye Tɔhonɔ̀ be ènyà la so Yèruzàlɛm.

⁴E la nyi kòjoɖotɔwo lè dùkɔ̃wo dòmè, e la gbe ènyà na dùkɔ̃ sùgbɔ. Wo la trɔ woabe èwuiwo sɔ wɔ̀ àgblèkèkewo be gàha eye woabe èhuãwo la trɔ zũ àgɔ̃wo. Eye èdù ɖe mu la gbà sitè ɖo èdù bu ŋuti ò. Àhùakɔ̃wo mu la gbà nɔ wɔ̀ jàjràɖo na àhùawɔ̀wɔ ke ò.

⁵Mì va! Yakɔb be àxuedo a, ne mia zɔ̃ lè Tɔhonɔ̀ be kɛ̃klɛ̃a nu.

⁶Ɛ̃ɛ, wò ɖè èkɔ̀ lè Yakɔb, àpo dùkɔ̃a ŋuti. Nukɛ ŋuti ò? Ɖo yebe dùkɔ̃a ɖɔ ku èwèɖoxɔ̀pe be ènukãtɔwo (èsɔ̀mèkpɔtɔwo). Wo sùgbɔ sìgbè àlekè wo lè Filistìtɔwo gbɔ kea nène. Dùkɔ̃ wòa le do èha ku àmèjrowo.

⁷Èdù wòa ɖɔ kudo sìka ku klòsalò: àdɔ̀kùnuwo lè drì. Èsɔ kudo àhùakèkeviwo cã bɔ kè wo mu la teŋu hlɛ̃ òa.

⁸Ànyigbã ɖɔ kudo vòduwo. Wo dona ènugũ lè èkpe-tatawo be ŋùkɔ̀, ènu kè wo sɔ woabe àlɔ̀wo sɔ wɔ̀a.

⁹Wo ɖo la xa gòbà eye wo la ɖiɖi. Tɔhonɔ̀, mù gbà fɔ̃ wo ò!

¹⁰Mì yì wla ɖo àkpãwo mè. Mì ɖo ànyigbã mè ne mìa si lè Tɔhonɔ̀ kè dona ŋɔji na àmè ku vɔ̃vɔ̃a gbɔ, lè yebe gogo gãa gbɔ.

¹¹Àmè kèwo kpɔna àmè ku ŋùku bàɖàwo la do èta ègũ eye ègòyitɔwo be àdɔ̃ la jè ègũ[1]. Gbè ŋuã gbèa Tɔhonɔ̀ ɖèka be gogo kpò ye la ze.

¹²Ɖo àhùadù Tɔhonɔ̀ ɖo ŋùkèkè ɖe kè ji e la sitè ɖo ègòyitɔ ŋuti. E la ɖiɖi ɖo èdò.

¹³E la sitè ɖo Libàn be sedàtiwo kpata ŋuti, àti yì ji vùdù ŋuawo, kaka jè Bacàn be lokòti gãgãwo ji.

¹⁴E la sitè ɖo èto kudo ètokɔ̃ɛ yì jiwo kpata ŋuti.

¹⁵E la sitè ɖo mɔjikpɔxɔ̀ gãgãwo kudo àgbògbò sɛ̃sɛ̃wo ŋuti.

¹⁶E la sitè ɖo àpùjihũ gãgãwo kudo ekèwo dona àgbã àdodoewo ŋuti.

¹⁷Ègòyitɔwo be àdɔ̃ la jè ègũ, wo la ɖiɖi àmè kèwo kɔna woa ɖokoewo yì jia. Gbè ŋua gbèa, Tɔhonɔ̀ ɖèka be gogo kpò ye la ze.

¹⁸Eye vòduwo kpata la crɔ̃.

¹⁹Mì yì wla ɖo àkpãwo mè eye mì yì ɖo ànyigbã mè ne mìa si lè Tɔhonɔ̀ kè dona ŋɔji na àmè ku vɔ̃vɔ̃a gbɔ, lè yebe gogo gãa gbɔ. E la sitè eye e la hũhũ ànyigbã.

²⁰Ɖo gbèŋuãgbèa, àmèwo la lɔ sìka ku klòsalò be èkpetata kèwo wo wɔ̀ eye wo jènà èklò na a, àjè vòduwo na èzãtɔ ku àwàwàviwo.

²¹Wo la yì wla ɖo àkpãdowo kudo ànyigbã mè ne woa si lè Tɔhonɔ̀ kè dona ŋɔji na àmè, lè yebe gogo gãa gbɔ; wàlɛbɛ kè e la sitè sɔ hũhũ ànyigbã a.

²²Nukɛ àgbètɔ nyi ò? Àya gbɔ̃gbɔ̃ kpò be nyi! Mu ɖo ŋusɛ̃ ɖe ò.