Read gen Ezayà 21 Bible Online

Ezayà 21 - gen bible

Ezayà 21

¹Ènyà so Babɛ̀l ŋuti. Wo dà nyikɔ ɖo ji be “Zògbè kè lè àpù gbɔa”. Kɛ̃tɔa la va so zògbè ji, so èdù kè ɖo vɔ̃vɔ̃a mè, la to Nègevà be nutomè sìgbè àya sɛ̃sɛ̃ nène.

²Tɔhonɔ̀ na mù kpɔ ŋùdãnu jiŋɔ ɖe: àmè kè ye wo ca èha kudo sãa, ye la sà àmè fifì, àmècrɔ̃tɔa lè yebe èdɔ do àsia ji. Tɔhonɔ̀ gblɔ̃ be: “Elàmtɔwo, mì kpe àkɔ ku wo! Medìatɔwo, mì xa èdùa! Mù la na woabe ègòyiyia la bu.”

³Ekèa ŋuti ye àpe àyìkuwo hũhũ lè àdɔ̀mè na mù ɖo. Mù le sè vève sìgbè nyɔ̃nù kè le le èkua nène. Mù titɔ ŋutɔ ne ma gbà teŋu ɖoto, mù le vɔ̃ ŋutɔ ne ma gbà teŋu kpɔ ènu ɖe.

⁴Mù jo flù eye vɔ̃vɔ̃ le ɖo mù. Mù le nɔ̀tè kpɔ fìɛ̃si gbɔ ne ma fa àkɔ, vɔ̀ fifìa, èzã le do ŋɔji na mù.

⁵Nuɖùɖua sɔ̀gbè, wo tɛ èkplɔ̃ eye wo ɖo àvɔ kpɛ̃kpɛ̃wo ɖo ànyigbã. Àmèwo le ɖù ènu gbà le nù ènuwo. Zè ɖèka kpòa, àpa ɖì be: “Mì sitè kplà! Mìa àhùagawo, mì jrà mìabe àhùawɔ̀nuwo ɖo àlɔ̀ji!”

⁶Ɖo nyàwoa, ènu kè Tɔhonɔ̀ gblɔ̃ na mù a ye nyi ekèa be: “Ɖo bèkpɔɛ ɖoɖa ne bèa va gblɔ̃ ènu kè be yì kpɔa na wò.

⁷Ne e kpɔ àhùakèkevi kè èsɔ èvè le dɔ̃a, eye èsɔdotɔwo lè èsɔ àkɛtɛwo ji, èbuwo lè èsɔ èkpotɔnɔ̀wo jia, e ɖo la kpɔ nyuɛ̃ ɖe, ɛ̃ɛ e ɖo la kpɔ nyuɛ̃ ɖe.”

⁸Eye bèkpɔɛa do àpa be: “Àpetɔ, mù lè èmɔ̃jikpɔxɔa mè ŋùkèkèa kpata. Mù lè èdɔ nyèa gbɔ èzã bliboa kpata.

⁹Kpɔɖa! Ŋusù ɖe gbãnà. E lè àhùakèkevi kè èsɔ èvè le dɔ̃a mè. E do àpa be: “Babɛ̀l ci àsi, Babɛ̀l ci àsi! Wo kãkã yebe vòdu be legbawo kpata ɖo ànyigbã.”

¹⁰Èwò dùkɔ̃ nyè kè wo pò wù sìgbè lekè wo wùnà èlù lè àgblèa, sè ènu kè Tɔhonɔ̀ ŋusɛ̃ kpatatɔ, Izràɛl be Mawu a gblɔ̃a. Ènyà kèa ye mù hɛ̃ va na wò.

¹¹Ènyà so Dumà dùkɔ̃ ŋuti. Ègbè ɖe ɖì na mù so Sèyir be: “Èzãɖiatɔ nukɛ ye wò kpɔ so èzãa ŋuti ò? Ɛ̃ɛ, èzãɖiatɔ nukɛ ye wò kpɔ so èzãa ŋuti?”

¹²Èzãɖiatɔa ɖo e ŋuti be: “Èŋùa kè gbãnà eye zãɖea, èzã la gbà do ke. Ne mì jro la gbà biɔ ènyàa, mì biɔ eye mìa gbà trɔ va gà bu mè ke!”

¹³Ènyà so Àrabìa dùkɔ̃ ŋuti. Mì, Dedàn be èsɔ doàgbãwo, mì la ci Àrabìa be ègbe ji la dɔ̃ èzã blibo.

¹⁴Mì Tèmàtɔwo, mì yì na èsì àmè kèwo le ku èsìkua, mì yì na nuɖùɖu àmè kèwo sia.

¹⁵Àmèwo si lè àhùa be ŋùkɔ̀, lè èwui kèwo sɔ̀gbè la sì àmè, lè àŋùdàti kèwo wo sɔ ɖo woa jia, lè àvũwɔ̀wɔwo be èdrãa nu.

¹⁶Nyàwoa, ènu kè Tɔhonɔ̀ gblɔ̃ na mù a ye nyi be: “lè èpè ɖèka mè tututua, Kedàr be hùɛ̃yi dàda keŋu la bu.

¹⁷Àmè viɖe kpò ye la kpɔ̀tɔ̀ lè àŋùtidàtɔwo dòmè, lè Kedàr be àhùawɔ̀tɔwo dòmè.” Ekèa ye Tɔhonɔ̀, Izràɛl be Mawu a gblɔ̃.