Read gen Ezayà 23 Bible Online

Ezayà 23 - gen bible

Ezayà 23

¹Ènyà so Tirò ŋuti. Mìa àpùgãjihũwo, mì jì èfũlòlo be èhàwo. Ɖo wo crɔ̃ Tirò be èhũjèpea, àxue ɖekpe ŋutɔ mu kpɔ̀tɔ̀ ò. Mì sè ènyà kèa wàlɛbɛ kè mì trɔ gbɔ̀ so Kiprò be ètɔ̀dòmèkɔ̃ɛ̃a jia.

²Mì àmè kèwo lè àpùtaa, mì bɔ̀nu kpoo, mì àsìsàtɔ kèwo dɔ̃na àsì ɖoɖa èsì gãwo dòmèa, mì bɔ̀nu kpoo.

³Ènu kèwo wo le do lè Ejiptè tɔ̀ gã toa, ènu kèwo wo le yà lè ètɔ̀wo toa nyi àdɔ̀kùnu na Sidɔ̀n. Èdùgã kèa trɔ zũ dùkɔ̃wo be àsìsàpe.

⁴Èŋù ne kpɛ̃ wò Sidɔ̀n, èwò kè nyi bèbèpe na àpùa! Nyàwo, àpù sɔ ènyà gblɔ̃ be: “Nyè mu jro la sè vève kaka la va jì èvi ò. Nyè mu jro la hɛ̃ èvi ŋusùwo àlo nyɔ̃nùviwo kaka ne woa sĩ ò.”

⁵Ne Ejiptè sè ènyà kèa, e la hũhũ sìgbè lekè be hũhũ kè be sè Tirò tɔ̀a nène.

⁶Mì sò àpùa yì kaka Tarsò, mì jì èfũlòlo be èhà, mìa ètɔ̀ŋutitɔwo.

⁷Mìabe èdù kè mè àgbè lè sã, blèmà be èdù ŋua kè be àsìsàtɔwo yìnà èdùta va yì ɖona àjɔdopewoa ye ŋua?

⁸Tirò be èdùa ye ɖona èfìɔwo ànyi sãa. Yebe àsìsàtɔwo nɔ̀nà èfìɔviwo tèpe lè èdùwo mè. Yebe àjɔdotɔwo nyi àmègãwo lè xixea mè. Àmè kɛ ye jro la crɔ̃ èdù kèa ò?

⁹Tɔhonɔ̀ ŋusɛ̃ kpatatɔa ye, ne bèa sɔ gbã bùbumewo be ègòyiyia do, bèa gbà ɖiɖi xixe kèa be àmègãwo va èdò.

¹⁰Tirò dè àgblè bòhũ sìgbè lekè wo wɔ̀nà ɛ̀ lè Ejiptè-tɔ̀ gã ŋuti nène ɖo àpùjihũ jèpe mu gbà lè àsi wò ò.

¹¹Tɔhonɔ̀ ɖè yebe àlɔ̀ sɛ̃sɛ̃ ɖo àpùa ji, e hũhũ fìɔduwo. E ɖè ègbè be woa crɔ̃ Kanàn be àgbògbòwo.

¹²E gblɔ̃ be: “Sidɔ̀n dùkɔ̃, wò mu la gbà teŋu kpɔ jìjɔɛ ɖe ò, wò lè sìgbè tùgbɛ̀jɛvi kè gbɔ wo dɔ̃ ku àkpa sɛ̃sɛ̃a nène. Ne wò gbà si yì kaka Kiprò be tɔ̀dòmèkɔ̃ɛ̃a ji ŋutɔ cã a, wò mu la teŋu kpɔ jɛ̃gbɔ̃gbɔ̃ ò.

¹³Ɖoŋù Babɛ̀l nyigbã ji: dùkɔ̃ kèa mu gbà lè ò. Aràmtɔwo sɔ wɔ̀ èlã wɔ̀adãwo be nɔ̀pe. Wo tù mɔjikpɔxɔwo sɔ gbã woabe èfìɔsawo. Eye wo trɔ tèpea sɔ wɔ̀ èglìkpowo ɖèɖe.

¹⁴Mìa àpùgãjihũwo, mì jì èfũlòlo be èhà, ɖo wo gbã mìabe zɛ̃pe a.”

¹⁵Nène a ye wo la ŋlɔ̀be Tirò be èdùa èpè èkà takpoci èwo, èfìɔ be àgbènɔ̀zã. Lè èpè èkà takpoci èwo ŋuawo yomè a, ènu kè jɔ̀ ɖo àhasìwɔ̀tɔa ji lè èhà jìji kèa mèa ke la jɔ̀ ɖo Tirò ji be:

¹⁶Àhasìwɔ̀tɔ kè àmè sia àmè ŋlɔ̀bea, sɔ èkàsãŋùgu ne wòa pò è ɖìsà to èdùa kpata mè. Pò è ku jìjɔɛ ne wòa jì èhà viviwo ne àmèwo woa ɖo ŋùku ji wò.

¹⁷Lè èpè èkà takpo-ci-èwoa be vɔ̀vɔnu tutua, Tɔhonɔ̀ la ɖè yebe àbɔ sɛ̃sɛ̃a fiɔ lè Tirò. Èdùa la gbɔ̀ àgbè kudo àlèwo kpɔkpɔ. E la gbà yì sã to fìɔdu kèwo kpata lè ànyigbã jiawo ji.

¹⁸Vɔ̀ àlè kèwo la to so ènu kèa be wɔ̀wɔ mèa, la nyi Tɔhonɔ̀ tɔ̀. Wo mu la bɔ̀ ɛ̀ ò, wo mu la wla ɛ̀ ɖo tèpe ɖe cã ò. Ènu kè be la kpɔa, la nyi àmè kèwo lè Tɔhonɔ̀ be àxuea mèa, eye e la gbà na wo àwù ɖìnyiwo.