Read gen Ezayà 25 Bible Online

Ezayà 25 - gen bible

Ezayà 25

¹Tɔhonɔ̀, èwò ye nyi àpe Mawu. Mù jèsi àpo gãnyinyi eye mù le mlã àpo nyikɔ. Ɛ̃ɛ wò wɔ̀ ènu jɔ̀ àsuwo. Wo kpɔ̀tɔ̀ lè so kaka blèmà eye wo likè goŋu màtrɔ màtrɔ.

²Wò trɔ èdù gãa sɔ wɔ̀ èglìkpowo ɖèɖe. Wò gbã àgbògbò-dùa gudu-gudu. Wò na be àmèjrowo be èdù sɛ̃sɛ̃a mu gbà ɖì èdù ò, eye wo mu la gbà teŋu tù ì gbèɖe ò.

³Ekèa ŋuti ye dùkɔ̃ sɛ̃ŋu ɖe le na wò gogo. Dùkɔ̃ nyrãkuwo be èdù ŋutɔ cã do bùbu ŋuti wò.

⁴Tutu, wò xɔ̀nà ènyà ɖo àmè gbɔjɔwo ta. Wò nyi àkpoxɔ̀nu na wɔ̀amènɔ̀wo lè gbledo hùenu. Àmè kè bè ɖo gbɔ wòa, èji mu pònà ɛ̀ kaka dɔ̃ŋùkusu la ɖù ì ò. Ɛ̃ɛ, àmè nyrãkuwo be àdɔ̀mèze lè sìgbè èji sɛ̃sɛ̃ kè le jà pò èglìa nène.

⁵E gbà lè sìgbè dɔ̃ŋùkusu jàse kè le ɖù ànyigbã kè pu kpakplaa nène. Wo cina àmèjrowo be hũnyà-hũnyà wɔ̀wɔ sìgbè lekè lilikpo be vɔ̃vɔ̃lì ɖènà zòzo kpɔ̀tɔ̀nàa nène. Wo cina àmè nyrãkuwo be jiɖùɖu be èhàjìji nu.

⁶Tɔhonɔ̀ ŋusɛ̃kpatatɔ la tɛ èkplɔ̃ na dùkɔ̃wo kpata lè èto kɔ̀kɔ̀ɛ kèa ji. Èlã doàmìwo kudo vɛ̃ sĩsĩwo la nɔ̀ ànyi, ɛ̃ɛ, èlã doàmì viviwo ku vɛ̃ sĩsĩ kèwo mè kɔ̀a, la nɔ̀ èkplɔ̃a ŋuti.

⁷Lè ètoa jia, e la ɖè èfũlòlo be ŋùmèxenua jo, èku be àvɔ kè cɔ̃ dùkɔ̃wo kpata jia jo.

⁸E la crɔ̃ èku tɛ̀gbɛ̀dò. Tɔhonɔ̀ la tutu àɖàsì lè ŋùkuwo kpata mè. E la ɖè ŋùkpɛ̃ na yebe dùkɔ̃a. Tɔhonɔ̀ ŋutɔ ye gblɔ̃ ɛ̀.

⁹Wo la gblɔ̃ lè àzã ŋua gbè be: “E ye nyi miabe Mawu. Mi dojì ɖo e ŋuti eye e hlùɛ̃ mi gã. Ɛ̃ɛ, Tɔhonɔ̀ ŋuti ye mi ɖoŋù ɖo. Mi kpɔ jìjɔɛ ne mia ɖuwè ɖo e hlùɛ̃ mi gã.

¹⁰Tɔhonɔ̀ be àlɔ̀ lè èto kèa ji.” Vɔ̀ Mòab la tùkù lè tèpe ɖèka, sìgbè lekè wo tùkùnà èbè lè kɔkɔli be èdo mèa nène.

¹¹Lè funua, e la ɖè àbɔ sìgbè èsìputɔtɔ̀ nène. Vɔ̀, togbɔ be e le jè àgbàgba ŋutɔ cã a, Tɔhonɔ̀ ɖiɖi yebe ègòyiyia.

¹²Eye Tɔhonɔ̀ mù àgbògbò kèwo ŋuti wò donajì ɖo sãa jo. E mù wo, gbidi wo ɖo ànyigbã be ɖiɖɔɛ mè.