Read gen Ezayà 27 Bible Online

Ezayà 27 - gen bible

Ezayà 27

¹Gbè ŋua gbèa Tɔhonɔ̀ la sɔ yebe èwui sɛ̃sɛ̃ kpɛ̃kpɛ̃a, eye kudo ŋusɛ̃a e la wɔ̀ àhùa kudo èhɔ̃ drìbà, èdã kè zrònà, èhɔ̃ drìbà, èdã kè ɖɔ kudo àyè gɛdɛa. Eye e la wù àpùmè be èhɔ̃ drìbà kèa.

²Gbè ŋua gbèa, mì la jì èhà na vɛ̃-gble kè nana vɛ̃ vivia.

³Ènyè Tɔhonɔ̀ ye nyi vɛ̃-gble kèa be jikpɔtɔ. Mù wuna ɛ̀ èsì ɖo àmèhùenu. Mù kpɔna e ji èzã kudo kedè ne àmè ɖekpe mu gbà wɔ̀ èvuɛ̃ kudo è ò.

⁴Nyè mu gbà le do àdɔ̀mèze ɖo e ŋuti ò. Vɔ̀ ne mù yì dogò àfɔ̀klɛ̃ ɖe a, mù la kpe àkɔ kudo è eye mù la crɔ̃ ɛ̀.

⁵Vɔ̀ àmè kè mù la nyi àkpoxɔ̀nu na a, la nɔ̀ ŋuti fàfa mè, ɛ̃ɛ, mù la wɔ̀ ŋuti fàfa kudo è.

⁶Lè ŋùkèkè kèwo gbãnà mèa, Yakɔb be àxuedo a la to èkè, Izràɛl la pò èse eye e la ɖè kusɛ̃sɛ̃ be ènuwo to. E la na yebe kusɛ̃sɛ̃wo la ɖɔ xixea gòdò.

⁷Tɔhonɔ̀ pò wo sìgbè lekè be pò àmè kèwo pò wo va yìa nènea? E wù wo sìgbè lekè be wù àmè kèwo wù wo sãa nènea?

⁸Gbèɖe, vɔ̀ e dɔ̃to na wo, nyà wo, ɖo wo ɖoɖa àmèjronugbe. E kplɔ̀ wo jo sìgbè èwèzɛ̃pe be àya sɛ̃sɛ̃ be ènu wɔ̀wɔ nène.

⁹Nène ye wo la tutu Yakɔb be àgɔ̀jèjea jo. E la nyi yebe vuɛ̃ a be sɔsɔkè be kusɛ̃sɛ̃ be: Wo la tùkù yebe vɔsakpewo gudu-gudu sìgbè àkalo be èwɔ nène. Wo la mù vòduti kudo woabe dàblawo pu ànyi. Wo mu la gbà nɔ̀ ètè gbèɖe ò.

¹⁰Àmè ɖekpe mu gbà la nɔ̀ àgbògbò be èdùa mè ò. Wo kã gble è ɖɛ eye e ci puplu sìgbè zògbè nène. Funu ye ènyì-suvi la ɖù ègbe lè. E la ɖì ɖo e mè lè funu eye be la ɖù ègbe do àmàwo.

¹¹Ne àlɔ̀zɛ̃awo pua, wo ŋɛ̃na eye nyɔ̃nùwo va tɔna wo èzò. Co dùkɔ̃ kèa mu le ŋɔjè ènu ɖe mè ò. Ekèa ŋuti ye yebe ɖotɔ a mu le kpɔ ɖo e mè na ɛ̀ ò. Àmè kè wɔ̀ ɛ̀a, mu ku ŋuzĩzĩ na ɛ̀ ò.

¹²Gbè ŋua gbèa, Tɔhonɔ̀ la klɛ̃ èlùwo lè woabe èlùtikpewo ŋuti so kaka Efratà be ètɔ̀a to yì kɔ̀ ɖo Ejiptè be ètɔ̀ gã to. Eye e la cã mì Izràɛlviwo ɖèka-ɖèka bɔ̀ sìgbè èlùtikpewo nène.

¹³Gbè ŋua gbèa, wo la ku èlãzo gã. Nène a, wo la trɔ gbɔ̀, wo àmè kèwo wo nyà lè Ejiptè-nyigbã jia. Eye wo la va jè èɖɛ̀ lè Tɔhonɔ̀ be ŋùkɔ̀ lè èto kɔ̀kɔ̀ɛa ji, lè Yèruzàlɛm.