Read gen Ezayà 29 Bible Online

Ezayà 29 - gen bible

Ezayà 29

¹Bàbà Arìɛl, Arìɛl, Yèruzàlɛm be èdù kè èfìɔ David sɔ àhùa va xaa! Wò teŋu nɔ le ŋùku ɖo àzãwo ŋuti nyuɛ̃ ɖe so èpè ɖe yì èpè bu.

²Vɔ̀, nya kpò be mù la ɖiɖi èwò Arìɛl. Wò la wo kudo àvi ku ènuhàha eye wò la trɔ zũ tɔ̀ nyè sìgbè vɔsakpea be fikè wo fiɔ̃na vɔ̀sawo lèa nène.

³Mù la ɖo àsàɖa nyèa trɔ do wò. Mù la do àhùa-wu la va wɔ̀ àvũ kudo wò. Mù la tre àvũwɔ̀wɔ be èmɔ̃ vòvòwo na wò.

⁴Wò la jè ànyi keŋu-keŋu kaka àpo ègbè la ɖì sìgbè, kaka ànyigbã be ètùmè be le so nène. E la sɛ̃sɛ̃ ŋutɔ ne woa sè ègbè kèa lè ɖiɖɔɛ mè. E la ɖì sìgbè ànyigbã be le ɖì so nène. E la ɖì ŋùãlì be ègbè blɛ̀wù so ɖiɖɔɛ mè.

⁵Àpo kɛ̃tɔwo la sùgbɔ sìgbè hũhũ be lilikpowo nène. Àmè kèwo le ji èku na wòawo lè sìgbè dekpa pupu kè àya kplɔ̀ le yìa nène. Eye zè ɖèkaa,

⁶Tɔhonɔ̀ ŋusɛ̃ kpatatɔa la va lè èji be ègbè ɖèɖe mè kudo ànyigbã hũhũ gã ɖe ku àya sɛ̃sɛ̃ pòpo mè, lè àya la sɔ yì èji sɛ̃ŋu ku èzò bì ènu hɛ̀hɛ̀ ɖe mè.

⁷Arìɛl, dùkɔ̃ kèwo kpata sɔ àhùa ɖo ŋuti wòa, la bu sìgbè èdrɔ̃kuku nène. Àmè kèwo le tre àhùa-mɔ̀ na wò eye wo le xa wò gbà le ɖiki wòa, la bu vĩi sìgbè èzã be àvìmènu kpɔkpɔ nène.

⁸E la nɔ̀ sìgbè àmè kè àdɔ̀ le wù eye be le ku èdrɔ̃ be yè le ɖù ènua nène. Ɖo ne e va fɔ̃a e la kpɔ be ènu ɖekpe mu lè pòdo mè na yè ò. Àlo àmè kè sìkɔ le tì eye be le ku èdrɔ̃ be yè le nù èsìa. Ne e va fɔ̃ ku gbɔ̀jɔ̀ gbɔjɔa, èhlò mè la pu na ɛ̀ kpakpla. Nène ye be la nɔ̀ na dùkɔ̃ kèwo ye le sɔ àhùa ɖo Ziɔ̀n be ètoa ŋutia yeŋu.

⁹Ne dãŋù do mì, ne mì mu gbà kè ènu ò. Ŋùku ne gbã na mì, ne mì mu gbà kpɔ ènu ɖekpe ò. Àhà ne mu mì, co mì mu nù vɛ̃ ɖekpe ò. Mì nɔ kplà sìgbè àhànùmunɔ̀ nène, vɔ̀ mì mu nù àhà ò.

¹⁰Nyàwo, Tɔhonɔ̀ na mìabe àyèwo dɔ̃ àlɔ̃, e miɔ̃ mìabe gblɔ̃ɖɛtɔwo be ŋùkuwo, ne wo mu gbà kpɔ ènu ɖe ò. E xe ŋùkumè na mìabe ènukpɔtɔwo ne wo mu gbà kpɔ ènu ɖe ò.

¹¹Ènyà kèawo be ɖèɖèfiɔ lè na mì sìgbè ènu kèwo wo ŋlɔ̀ ɖo xoma mè eye wo tre xoma a nu nène. Wo sɔ ɛ̀ na xomanyatɔ eye wo gblɔ̃ na ɛ̀ be: “Hlɛ̃ ɛ̀ na mi”. Vɔ̀ e ɖo e ŋuti be: “Nyè mu la teŋu hlɛ̃ ɛ̀ ò, ɖo wo tre xoma a.”

¹²Wo sɔ ɛ̀ na àmè kè mu nya xoma òa be ne hlɛ̃. Vɔ̀a, e ɖo e ŋuti be: “Nyè mu nya ènu hɛ̃hlɛ̃ ò.”

¹³Tɔhonɔ̀ gblɔ̃ be: “Dùkɔ̃ kèa tètè gogo na mù to ènyà mè kpò, ènuyiwo ji ye be nana mù gogo lè. Vɔ̀ yebe èjì lè boo lè gbɔ nyè. Bùbu kè be nana mù a, so àgbètɔ be nufiɔfiɔ mè kpò.

¹⁴Ekèa ŋuti mù la kpɔ̀tɔ̀ nɔ wɔ̀ ŋùdãnuwo na wo. Wo ŋɔjè ènuwo mè co, wo mu la sè ènu ɖe gɔ̃mè ò. Wo nya ènu co, woabe ènunyatɔwo mu la teŋu ɖè ènu ɖe gɔ̃mè ò.”

¹⁵Bàbàa! Wo le jè àgbàgba lè ènu gɔ̃mè sɔ wla woabe tamèsusuwo do Tɔhonɔ̀. Wo le wɔ̀ woabe jàjràɖowo lè wìmè, le gblɔ̃ ku èjì ɖèɖe be: “Àmè kɛ ye teŋu kpɔ mi ò? Àmè kɛ nya ènu kè mi le wɔ̀ ò?”

¹⁶Gãke mì le blè mìa ɖokoe ŋutɔ. Wo la teŋu sɔ èze ɖo èzemètɔ tèpea? Ènu wɔ̀wɔ ɖe teŋu gblɔ̃ so ènuwɔ̀tɔa ŋuti be: “Mu nyi e ye wɔ̀ mù òa?” Èze ɖe teŋu gblɔ̃ so èzemètɔa ŋuti be: “Mu nya àɖàŋù ɖèɖe òa?”

¹⁷Sɔ̀sɔɛɖe kèa, Libàn be àvea la trɔ àtikusɛ̃sɛ̃wo be àgblè eye àtikusɛ̃sɛ̃ be àgblè la trɔ zũ àve ɖèɖe.

¹⁸Gbè ŋua gbèa, ètokunɔ̀wo la sè xoma a be hɛ̃hlɛ̃ eye ŋùkugbãgbãnɔ̀wo la to lè vìvìtia mè, la kpɔ ènu.

¹⁹Àmè bɔ̀bɔɛwo la kpɔ jìjɔɛ gã ɖe lè Tɔhonɔ̀ mè. Wɔ̀amènɔ̀ kisɛ-kisɛwo la ɖu jìjɔɛ be èwè ɖo Izràɛl be àɖèsãa ŋuti.

²⁰Ɖo e la nyi àmè nyrãkuwo be vɔ̀vɔnu eye wo la crɔ̃ ègòyitɔwo. Wo la ɖè ènu bàɖàwɔ̀tɔwo jo,

²¹àmè kèwo dona èhùɛ do àmè ɖo àjè e ji eye wo tùtùnà kòjoɖotɔwo ne woa gblehùɛ do àmè mà-nyã ɖewo.

²²Ènu kèa ŋuti ye Tɔhonɔ̀, Yakɔb be àxuedo a be Mawu kè hlùɛ̃ Abràham gãa, gblɔ̃ be: “Gbèɖe, Yakɔb be àxuea mu la gbà ɖù ŋùkpɛ̃ ò, yebe ŋùmè mu la gbà ci kpɔ̃ ke ò.

²³Ɖo ne wo kpɔ ènu kè mù wɔ̀ lè woa kudo woabe viwo dòmèa, wo la na ŋutikɔ̀kɔ̀ɛ àpe nyikɔ. Wo la na ŋutikɔ̀kɔ̀ɛ Yakɔb be àɖèsãa eye wo la jèɖɛ̀ lè Izràɛl be Mawu a be ŋùkɔ̀.

²⁴Àmè kèwo be sùsumè titɔa, la sè ènu gɔ̃mè. Ènyàdɔ̃tɔwo la lɔ̃ be woa fiɔ yèwo ènu.”