Read gen Ezayà 3 Bible Online

Ezayà 3 - gen bible

Ezayà 3

¹Tɔhonɔ̀ Mawu Ŋusɛ̃kpatatɔ la ɖè nuɖùɖu kudo èsì be èmɔ̃nuwo kpata jo lè Yèruzàlɛm ku Yudà be fìɔdua mè. E la tu àlɔ̀dowo kpata be èmɔ̃nu na wo:

²Ŋusùtia ku gbãdãgbã, kòjoɖotɔ ku gblɔ̃ɖɛtɔ, ènukãtɔ ku àmèsĩsĩa;

³àhùaga ku àgbònùgla, ètopòɖotɔ ku kpajijewɔ̀tɔ, kudo àzetɔ.

⁴Tɔhonɔ̀ gblɔ̃ be: “Mù la sɔ ɖèvi vifɛ̃wo ɖo èga ɖo woa nu ne woa kplɔ̀ wo kudo woabe àyè gɛdɛwo.”

⁵Àmèwo la wɔ̀ èlãnu kudo woa nɔ̀nɔwo eye wo la do àbì woa ɖokoewo ŋuti. Vifɛ̃wo la do àyà na àmèsĩsĩwo eye àmèkpòwo cã la do àyà na hùɛ̃yiwo.

⁶Àmè ɖe la kù ɖo nɔ̀via ŋuti lè woa tɔ xòmè gblɔ̃ na ɛ̀ be: “Wò gbà ɖo àwù nyuɛ̃wo. Eŋuã, nyi miabe kplɔ̀tɔ eye wòa le ŋùku ɖo ènu gbegble kèawo ŋuti!”

⁷Eye àmè ɖèa la ɖo e ŋuti gblɔ̃ be: “Nyè mu la teŋu wɔ̀ ènu ɖekpe na mì ò. Nuɖùɖu àlo àwù dodo ɖe mu lè àsi nyè ò. Mì mu la teŋu sɔ mù èga ɖo mìa nu ò.”

⁸Yèruzàlɛm ɖiɖi eye Yudà be fìɔdua klɛ̃ ènu. Wo sitè ɖo Tɔhonɔ̀ be ŋusɛ̃a ŋuti lè wɔ̀na ku ènupo pòpowo mè.

⁹Wo dona vòvòtoto àmèwo dòmè, eye ekèa donahùɛ do wo. Woabe nuvuɛ̃wo lè gàglàgbè sìgbè Sodɔ̀mtɔwo tɔ̀ ke nène. Wo sɔ kãna àdã. Bàbà, wo le do gbledo be àgbã na woa ɖokoewo.

¹⁰Mì teŋu gblɔ̃ be àmè kèwo sènàgbè na Mawu a, nyi sìtumewo. Wo la ɖù woabe wɔ̀na be àlè.

¹¹Vɔ̀a, gbledo kɛ ye la nyi na àmè bàɖàwo! Ɖo wo la wɔ̀ kudo wo ɖo woabe wɔ̀na ŋuti,

¹²Tɔhonɔ̀ gblɔ̃ be: “Dùkɔ̃ nyè! Àmè kèwo le ɖiki wòa, lè sìgbè ɖèviwo nène, eye nyɔ̃nùmewo ye le kplɔ̀ wò. Dùkɔ̃ nyè, àpo kplɔ̀tɔwo le blè wò. Wo kplɔ̀ wò le yì cɔ̃crɔ̃ mè.”

¹³Tɔhonɔ̀ sɔ̀gbè la ɖo kòjo. E sitè gbà la ɖo kòjo kudo dùkɔ̃wo.

¹⁴E la sãma yebe dùkɔ̃a be àgbònùglawo kudo woabe ègawo lè kòjo mè be: “Mìawo ye crɔ̃ vɛ̃-gble nyèa. Mì lɔ ènu kèwo mì fĩ lè wɔ̀amènɔ̀wo sia ɖɔ mìabe àxuewo.

¹⁵Nukɛ ŋuti ye mì le ɖiki dùkɔ̃ nyèa ɖo eye mì le wɔ̀ ènu dakà kudo wɔ̀amènɔ̀wo ò?” Tɔhonɔ̀ ŋusɛ̃ kpatatɔa ye gblɔ̃ ɛ̀!

¹⁶Tɔhonɔ̀ gblɔ̃ be: “Kè e nyi be Ziɔ̀n be nyɔ̃nùwo jènà woa ɖokoe nu eye ne wo va le yìa, wo ɖona èkɔ̀ gbà nɔ ɖo àzìã ŋùku, sɔ nɔ dɔ̃ àmèwo ne woa kpɔ woa; eye wo dona àyroloe àfɔ̀ ne bèa nɔ ɖègbè lè àfɔ̀ na wo ne wo zɔ̃ va le yìa.”

¹⁷Eŋuã, Tɔhonɔ̀ la na woabe ètawo la jè àkpà eye woabe ŋùgowo la ci gàglàgbè.

¹⁸Gbè ŋua gbèa, Tɔhonɔ̀ la ɖè woabe àcɔɖonuawo jo: àyroloe, kɔ̀mèwlɔ kudo sìkanu kè ɖo wètrifɛ̃fɛ̃ be nɔ̀nɔmèa;

¹⁹èkɔ̀ jònuwo, àlɔ̀tinugawo, bicɔf-kɔlà be àvɔvi;

²⁰dukùwo, àfɔ̀wlɔviwo, gojiblaka-totrowo, tilàwo kudo àtiblɛwo;

²¹àlɔ̀gàvi ku ŋɔ̀timè gàvi;

²²àwù yeyewo kudo àwù vlàyàwo, dukùwo, kɔ̀mèɖonuwo, àlɔ̀mè-kpɛtɛwo;

²³àpùpuiwo, flãlã be àwù èjitɔ̀wo, kɔ̀mèɖonu kudo àtrɛvi gã bla ètawo.

²⁴Ènu nyìnyɔ̀ be hɔ̃hũɛ ye la ɖɔ̀lì anùwɛtrɛ̀ be huɛ̃huɛ̃a. Èkà ɖe ye la ɖɔ̀lì ègojiblanu, wo la plɔ èta lè àcɔ be èɖà pòpo tèpe, ècɔvɔwo ye la nɔ̀ àwù ye yèwo tèpe, eye ŋùkpɛ̃ la ɖɔ̀lì àcɔɖoɖo.

²⁵Yèruzàlɛm, àpo ŋusùwo la crɔ̃ lè èwui nu. Àpo àhùakɔ̃a la ku ci àhùa.

²⁶Eye èdùa kpata la làmɔɛ̃ eye wo la lòfũ. Sìgbè nyɔ̃nù kè bu ènu sia ènu nènea, e la ɖiɖi nɔ̀ ànyigbã nɔ pu àsi ènu.