Read gen Ezayà 30 Bible Online

Ezayà 30 - gen bible

Ezayà 30

¹Tɔhonɔ̀ gblɔ̃ be bàbà na mì, èvi jèaglawo. Mì wɔ̀nà ɖoɖo kèwo mu so gbɔ nyè ò. Mì ɖona èkpe ènu kèwo mu jènà ŋùmè na mù a ji, sɔ le bɔ̀ èvuɛ̃ ɖo èvuɛ̃ ji.

²Mì jè èmɔ̃ tùtà Ejiptè ènyà ɖe mà biɔ mù. Mì ji be Ejiptè be èfìɔa bèa nyi àkpoxɔ̀nu na mì eye mì le ji bèbèpe lè e gbɔ.

³Yebe àkpoxɔ̀nua la trɔ zũ ŋùkpɛ̃nu na mì eye yebe bèbèpea la do tìtɔ̀ titɔ mìa dòmè.

⁴Mìabe ŋùkɔ̀nɔ̀tɔwo sùtè Tanìs xoxo vɔ̀. Mìabe àmèdɔ̃dɔ̃wo ɖo Hànes xoxo.

⁵Vɔ̀a, wo la ɖù ŋùkpɛ̃ ɖo dùkɔ̃ kèa mu la teŋu wɔ̀ àlɔ̀do ɖekpe na wo ò. Ejiptètɔwo mu wɔ̀ àlɔ̀do ɖe àlo la nɔ̀ èbò ɖe nu na wo ò. Ŋùkpɛ̃ kpò ye wo la sɔ cɔ̃ mì eye wo la ɖè mìabe bùbua jo.

⁶Wo do àgbã na èlã kèwo le zɔ̃ to Nègev be zògbè jia. E nyi gbledo be àgo ɖe kè dona ŋɔji gbà ɖona vɔ̃vɔ̃a. Funu ye jãŋùtasu kudo jãŋùtanɔwo, jàkpàtà kudo èhɔ̃ drìbàwo bɔ lè. Mìabe àmèdɔ̃dɔ̃wo lɔna sìkanu ku àdɔ̀kùnuwo ɖo èsɔ-àkɛtɛwo kudo èsɔ-èkponɔ̀wo ji. Ènu nana kèawo yìnà na dùkɔ̃ kè mu la teŋu wɔ̀ àlɔ̀do ɖekpe na wo ò.

⁷Ɛ̃ɛ, Ejiptè be àlɔ̀do lè sìgbè àya nène, mu ɖo àsìxɔ̀xɔ ɖe ò. Ekèa ŋuti mù le gblɔ̃ so e ŋuti be: “E wɔ̀nà hòcò hòcò kpò, vɔ̀a mu teŋu wɔ̀nà ènu ɖekpe ò.”

⁸Tɔhonɔ̀ gblɔ̃ na Ezayà be: “Fifìa, ŋlɔ̀ ènu kèawo ɖo ènuŋlɔ̀kpe ji; ŋlɔ̀ wo ɖo xoma bu cã mè lè Yèruzàlɛmviwo be ŋùkɔ̀. Eye èsɔ̀a, ekèa la nyi ɖase na wo kaka sɔyì.”

⁹Dùkɔ̃ màsè ètonu ye wo nyi. Àjèɖàtɔwo, wo mu jina la sè Tɔhonɔ̀ be ènufiɔàmè ò.

¹⁰Wo gblɔ̃ na gblɔ̃ɖɛtɔwo be: “Mì mu gbà kpɔ àvìmènu ɖe ò. Mì mu gbà to ènu kè nyi nyàwoa na mi ò. Mì gblɔ̃ ènyà viviwo na mi, ènyà kèwo la do jìjɔɛ na mia; ne wo mu gbà nyi nyàwo cã òa.

¹¹Mì na àsà àfɔ̀tope nyuɛ̃a boo, mì jo lè èmɔ̃ nyuɛ̃a ji. Mì mu gbà gblɔ̃ Mawu, Izràɛl be àɖèsãa be ènyà na mi gbèɖe ke ò.”

¹²Vɔ̀ ènu kè Izràɛl be àɖèsã Mawu a gblɔ̃a ye nyi be: “Eŋuã mì gbe àpe ènyàwo. Eye mì dojì ɖo àyègɛdɛtɔ kèwo le zĩ mì ɖo ànyi a ŋuti. Eye mì le ɖoŋùku ɖo woa ŋuti.

¹³Ne e lè nènea, àgɔ̀jèje kèa la nɔ̀ na mì sìgbè èglì zɛ̃ àbì kè zɛ̃ ɖo èglìkpa gã ɖe mèa nène. E la ɖo èkpo viɖe la fo, zãɖe kpòa, e la mù gblò.

¹⁴Èglìa la gbã gudu-gudu sìgbè èzemètɔ be èkɔgbã nène. Ŋùɖo ɖe mu lè ne woa kpɔ àgblɛkɛ kè lòlò lè gbãgbãwo mè teŋu sɔ yì ɖè èzò àlo sɔ kù èsì lè àvla mè ò.”

¹⁵Tɔhonɔ̀ Mawu, Izràɛl be àɖèsã gblɔ̃ be: “Mì la ɖo hlùɛ̃gã ne mì trɔ va gbɔ nyè eye mìa nɔ̀ jɛ̃gbɔ̃gbɔ̃ mè Mìabe ŋusɛ̃ ye nyi be mìa nɔ̀ kpoo eye mìa kãɖo ji nyè. Vɔ̀a, mì mu le ji ekèa ò.”

¹⁶Mì le gblɔ̃ be: “Gbèɖe, mi la si kudo èsɔwo.” Ɛ̃ɛ, eŋuã mì la si. Mì gbà gblɔ̃ be: “Miabe èsɔwo la sidù kaba kaba.” Eŋuã, àmè kèwo la jè mìa yomè a la ɖèbla wu mì.

¹⁷Àmè ɖèka la tɛ̃ŋùku do mì eye àmè àkpe ɖèka ku ejivɔwo lè mìa dòmè la hũhũ ku vɔ̃vɔ̃. Àmè àtɔ̃ la tɛ̃ŋùku do mì eye mì la si keŋu-keŋu. Vɔ̀vɔnua, mì la nɔ̀ sìgbè jèsìdo ɖe kpò lè èto tamè nène àlo àplãŋuga lè ètokɔ̃ɛ ji nène.

¹⁸Co Tɔhonɔ̀ le nɔ̀tè kpɔ hùenu kè be la ku ŋuzĩzĩ na mìa. E la sitè ɖè yebe àdɔ̀mè nyuɛ̃ fiɔ mì ɖo Tɔhonɔ̀ nyi Mawu jɔ̀jɔɛ: Sìtuɖèɖe na àmè kèwo keŋu dojì ɖo e ŋutia.

¹⁹Ɛ̃ɛ, èwò Ziɔ̀n be dùkɔ̃ kè lè Yèruzàlɛm nyigbã jia, wò mu la gbà fã àvi ò. Ne wò do àpa a, Tɔhonɔ̀ la kɔ̀ àdɔ̀mè ɖo ŋuti wò. Kaka kè be la sèa, e la ɖo e ŋuti na wò trolo.

²⁰E la na wò nuɖùɖu lè gbledo be hùenu, èsì lè yomètĩtĩ hùenu. Àmè kè la fiɔ wò ènua, mu la gbà bè ò eye wò ŋutɔ àpo ŋùkuviwo la kpɔ ɛ̀.

²¹Àpo ètowo la sè to ŋùgbedòmè wàlɛbɛ kè wò ji la yì ɖùsimè àlo èmìɔmèa be: “Èmɔa ye kè, zɔ̃ yì ŋùkɔ̀.”

²²Wò la kpɔ àtikpàkpa kudo vòdu jɔ̀jɔ kèwo wò wɔ̀ kudo ègà eye wò sɔ klòsalò ku sìka fã na sìgbè ènu mà-kɔ̀ mà-kɔ nène. Wò la lɔ wo sɔ kɔ̀ ŋùgbe sìgbè ènu pòɖi nène eye wò la gblɔ̃ be: “Ɖiɖɔɛwo, mì yì!”

²³Nène a ye Tɔhonɔ̀ la na èsì la jà kɔ̀ ɖo nuku kèwo wò do ègũa ji. Eye ànyigbã la na wò nuɖùɖu àdodoewo lè gbɔsùsu mè. Lè hùe ŋua nua, àpo èlãhawo la yì ɖù ènu lè ègbedo àmà gãgãwo mè.

²⁴Ènyì kudo èsɔ àkɛtɛ kèwo le ŋlɔ̀ ànyigbãwo la ɖù ègbe mumu nyuɛ̃wo. Ègbe kè wo la kãkã ɖo ànyigbã kudo sɔfì ku gàvia.

²⁵Gbè kè gbè ye wo la wù àmèwo kpata, wàlɛbɛ kè ye àgbògbòwo la mù a, ètɔ̀ sàsrawo la yì èto ku ètokɔ̃ɛwo kpata ji.

²⁶Gbè kè gbè ye Tɔhonɔ̀ la bla àbì na yebe dùkɔ̃a, wàlɛbɛ kè e la na woabe àbìwo la kua, wètri la kɔ̀ sìgbè èwè nène eye èwè la kɔ̀ ŋùkèkè ɖèka sìgbè ŋùkèkè adrɛ̃ tɔ̀ nène.

²⁷Kpɔɖa Tɔhonɔ̀ so dìdìpe gbãnà. Yebe jìbibi be àdã fɔ̃ ɖotè. Yebe ènyà ɖo ŋusɛ̃ sìgbè èzò fiɔ̃ ènu nène.

²⁸Yebe àya gbɔ̃gbɔ̃a lè sìgbè ètɔ̀ ɖɔɖɔ kè ɖɔ kaka le èhlòa nène. E va la sɔ hũhũ gã ɖe crɔ̃ dùkɔ̃wo. Eye e la do sɔga ènu na wo la kplɔ̀ wo yì fikè wo mu jro òa.

²⁹Mìa Yèruzàlɛmviwo, mì la jì èhà èzã sìgbè àzãɖùɖu gbè nène. Èjì la nɔ jɔ̀ mì sìgbè àmè kèwo le ɖuwè ɖo èkpɛ̃ be ègbè ɖìɖi ji, le yì Tɔhonɔ̀ be ètoa ji lè Mawu, Izràɛl be àkpãa gbɔ nène.

³⁰Tɔhonɔ̀ la na yebe ègbè sɛ̃sɛ̃a la ɖì eye wo la kpɔ yebe àlɔ̀a be wɔ̀na lè jìbibi be àdã mè, lè èzò fiɔ̃ ènua mè, lè èji-ya sɛ̃sɛ̃ kudo èsìkpe jàjaa mè.

³¹Mòab-nyigbã kpata la hũhũ ku vɔ̃vɔ̃ ne wo sè Tɔhonɔ̀ be ègbè to yebe èkpò dodo na àmèwo jia.

³²Àsihũvi kudo kàsãŋùguwo la nɔ ɖì kplɔ̀ Tɔhonɔ̀ be èkpò dodoawo do. Tɔhonɔ̀ la sitè ɖo Mòab ŋuti lè àlɔ̀ kɔ yì ji mè, eye e la wɔ̀ àhùa kudo è.

³³Wo do èzò ɖe ɖɛ xoxo. Wo jrà ɛ̀ ɖo na èfìɔ cã. Wo kù èdo gã ɖe eye wo ɖo ànakèwo ɖo e mè trɔdo gòdò va yì. Ànakèawo sùgbɔ na èzò kèa. Tɔhonɔ̀ be àya gbɔ̃gbɔ̃ kè lè sìgbè wèmi be èsì sàsra nènea ye la va do èzò e mè.