Read gen Ezayà 32 Bible Online

Ezayà 32 - gen bible

Ezayà 32

¹Eye èfìɔ ɖe la va, kè la kplɔ̀ fìɔdua lè jɔ̀jɔɛsòso mè. Àgbònùglawo la kplɔ̀ àmèwo lè nyàwo tututu mè.

²Wo la nɔ̀ na àmèawo sìgbè àya be ŋùmèxenu nène, sìgbè wlape do èjijàja nène, sìgbè èsì kè le srà lè zògbè jia nène, sìgbè àkpã gã ɖe be fàfanapè lè zòzo be èdù ɖe mè nène.

³Àmè kèwo ɖo la kpɔ ènua be ŋùkuwo mu la gbà miɔ ke ò. Eye àmè kèwo ɖo la sèa be ètowo la sè ènu nyuɛ̃ ɖe.

⁴Àmè màxɔ̀ èjì gbɔ̃ɖɛwo la bù ètamè sɔ ŋɔjè ènu mè. Eye àmè kèwo kukuna àɖewo la pò nupo eye e mè la kɔ̀.

⁵Wo mu la gbà to na sùkunɔ̀ be e nyi ènunyatɔ ò. Eye wo mu la gbà to na àmè kè àyè gɛdɛ na a be e nyi àmè ɖìnyi ò.

⁶Nyàwo, sùkunɔ̀wo gblɔ̃nà sùkunɔ̀ be è nyàwo. Ènu bàɖà wɔ̀wɔ be sùsu kpò ye nɔ̀nà woa si, wo wɔ̀nà ènudrãwo. Eye wo zũnà Mawu. Wo mu nana nuɖùɖu àmè kè le ku àdɔ̀a ò, wo mu nana èsì àmè kè sìkɔ le tìa cã ò.

⁷Àyè gɛdɛtɔ ɖènà sùsu bàɖà. E blènà àmè gbɔjɔɛwo dona èku mè to àjèɖàɖawo mè. Co, àmè kèawo mu le ji ènu bu sɔ wu jɔ̀jɔɛ tututu ò.

⁸Vɔ̀, ènunyatɔ ɖènà sùsu tututu, eye yebe wɔ̀na jènàgà.

⁹Mìa nyɔ̃nù màsɔɖelèmèwo, mì sitè ne mìa ɖoto mù. Mìa tùgbɛ̀jɛ màsũ èzò ɖo ènu ŋutiwo, mì sè àpe ègbè.

¹⁰Ne èpè ɖèka va yìa, mì àmè màsũ èzò ɖo ènu ŋutiwo, mì la ci siayi. Ɖo vɛ̃kusɛ̃sɛ̃ gbãgbã nu la ci eye nukuyàya la sò.

¹¹Mì pò tìtìtì! Mìa nyɔ̃nù màsɔɖelèmèwo, mì àmè màsũ èzò ɖo ènu ŋutiwo, mì ci siayi. Mì ɖè mìabe àwùwo ne mìa sã èfũlòvɔwo ɖo àlì.

¹²Ne wɔ̀ ŋuzĩzĩ na mì ne mìa fã àvi ɖo àgblè nyuɛ̃wo kudo woabe vɛ̃ka kèwo sɛ̃ kplìnyàwo ta.

¹³Mì fã ɖo dùkɔ̃ nyèa be ànyigbã ji, fikè àŋùjawo le vũ ɖo, mì fã ɖo èdùa be àxue ɖìnyi kèwo lè jìjɔɛ mèa ji.

¹⁴Wo la hũ gble fìɔsaa ɖɛ, èdù kè mè hũnyà-hũnyà nɔ̀nàa, la ci gbalo. Ofɛ̀l be èkɔa kudo èjikpɔxɔ̀a, la ci puplu. Funu ye ègbemè be èsɔ àkɛtɛwo la jròwe lè eye èlãwo la sɔ wɔ̀ ènuɖùpe.

¹⁵Gbè ɖèka Tɔhonɔ̀ la ɖùɖù gbɔ̃gbɔ̃a so jiŋùkusi ɖoɖa mia ji. Nène a, zògbè la trɔ zũ àbɔ kè mè àtikusɛ̃sɛ̃wo la bɔ lè. Àtiwo la mìɔ̃ lè àbɔwo mè, la wɔ̀ àve.

¹⁶Jɔ̀jɔɛ la sò àxue ɖo zògbè ji eye jɔ̀jɔɛsòso la kpɔ nɔ̀pe lè àtikusɛ̃sɛ̃ be àbɔwo mè.

¹⁷Jɔ̀jɔɛsòso be kusɛ̃sɛ̃ la nyi ŋuti fàfa. E la hɛ̃ ètomè fàfa va eye èjìɖèɖe la nɔ̀ ànyi tɛ̀gbɛ̀.

¹⁸Dùkɔ̃ nyèa la sò nɔ̀pe ɖo èto cɔ̃ ànyi tèpe, lè àxue kèwo ŋuti kãkãɖo e ji lèa, lè jɛ̃gbɔ̃pewo.

¹⁹Vɔ̀ èsìkpe la jà kɔ̀ ɖo àvea ji eye èdùa la mù gblòo.

²⁰Sìtuɖèɖe ye e la nyi na mì. Ɖo mì la teŋu do ènu ɖo àfi ɖekpekpe kè èsì lèa. Mì la ɖè èkà mìabe ènyì kudo èsɔ-àkɛtɛwo lè èjìɖèɖɛ mè ne woa ɖìsà fàa.