Read gen Ezayà 33 Bible Online

Ezayà 33 - gen bible

Ezayà 33

¹Bàbà na èwò kè le gble ènua co vɔ̀, wo mu gble wò ya ò. Bàbà na wò, èwò kè le hlà àmèwo be ènua eye wo mu kpɔ hlà tɔ̀ wò òa. Wàlɛbɛ kè wò la gble ènu vɔ̀a, wo la gble wò cã. Wàlɛbɛ kè wò hlà àmèwo be ènu vɔ̀a, wo la va hlà tɔ̀ wò cã.

²Tɔhonɔ̀ ku ŋuzĩzĩ na mi. Èwò ŋuti ye mi dojì ɖo. Nɔ do mi ŋusɛ̃ gbè sia gbè eye wòa hlùɛ̃ mi gã lè gbledo be hùenu.

³Ne dùkɔ̃wo sè àpo ègbèa, wo sina, ne wò sitèa, dùkɔ̃ pòpuwo kãnà hlɛ̃ gbɛ̀ɛ.

⁴Wo tɔ àmɔ̀nyɔ̀nuwo lɔlɔ bɔ̀ sìgbè hùesuviwo nène. Wo le jè àdɔ̀kùnuwo ji sìgbè lekè hùesuviwo jènà ɖo ègbewo ji vĩa nène.

⁵Tɔhonɔ̀ lòlò wu àmè sia àmè, ɖo e ɖo nɔ̀pe ɖo èji hũi. E na jɔ̀jɔɛ kudo jɔ̀jɔɛsòso sò àxue ɖo Yèruzàlɛm.

⁶Èwò Mawu be dùkɔ̃, nɔ̀ ànyi lè èjìɖèɖe mè. Ènunya kudo ènunyawo nyi àdɔ̀kùnɔ̀ kèwo hlùɛ̃nà àmè gãa. Bùbu ɖoɖo na Tɔhonɔ̀ nyi àdɔ̀kùnɔ̀ kè wo wla ɖɛa.

⁷Kpɔɖa àmè kèwo so Arìɛl be èdùa mèa, tɔ àpa dodo lè èmɔ̃wo to. Ŋuti fàfa be àmèdɔ̃dɔ̃wo le fã àvi blòblò.

⁸Èmɔwo ji pò àya. Àmè ɖekpe mu le to èmɔ̃wo ji ò. Wo mu wɔ̀ ɖo ènyà kèwo wo gblɔ̃a ji ò. Wo gbe ɖaseɖùtɔwo be ènyà. Eye wo crì àmè sia àmè.

⁹Èdù kè le lòfũa, mè pu kpakpla. Libàn be ètoa bu yebe ŋùmè jèjea eye àtiwo mu gbà lè Bàcam kudo Karmèl be ètowo ji ò.

¹⁰Tɔhonɔ̀ gblɔ̃ be: “Fifìa, mù la sitè, la sitè ɖo woa ŋuti, fifìa mù la ɖè gogo nyèa fiɔ.

¹¹Mìabe tamè susuwo lè kpò sìgbè ègbe pupu nène. Susu kèawo ji wɔ̀wɔ ɖo nɔ̀nà sìgbè èbèyɔɛ nène. Mìa ŋutɔ mìabe gbɔ̃gbɔ̃ be àya ye la nyi èzò kè la fiɔ̃ mìa.

¹²Dùkɔ̃ kpɔ̀tɛawo la fiɔ̃, trɔ zũ èzòka. Wo la nɔ̀ sìgbè àŋɔ̀ka-ti kè wo ŋɛ̃ ènu na eye be le bìa nène.

¹³Mì àmè kèwo lè dìdìpea, mì ɖoto sè ènu kè mù wɔ̀a. Eye mìa àmè kèwo lè kpòepea, mì do jèsì àpe ŋusɛ̃a.”

¹⁴Vɔ̃vɔ̃ gã ɖe jè vuɛ̃wɔ̀tɔwo ji lè Ziɔ̀n. Àmè bàɖàwo hũhũ ŋutɔ. Wo biɔ woa ɖokoewo sè be: “Àmè kɛ ye la teŋu dojì ò? Èzò hɛ̀hɛ̀ ɖe ŋutɔ ye. Àmè kɛ ye la teŋu nɔ̀tè lè èzò màci gbeɖe kèa be ŋùkɔ̀ ò?”

¹⁵Àmè kè le nɔ̀ àgbè lè jɔ̀jɔɛsòso mè, kè tona nyàwoa, mu jina àlè kè so tamèsɛ̃sɛ̃ mè ò, mu dona èha ku èzãnuɖùtɔ kaka la va ɖù èzãnu ò. E tuna èto do èhlɔ̃dãdã be ènyàwo eye mu jina la kpɔ ènu bàɖà ò.

¹⁶Àmè kèa kpɔna nɔ̀pe lè èji hũiwo mè lè èjì ɖèɖe mè. Yebe bèbèpe la nyi àkpãdowo mè, eye nuɖùɖu kudo èsì mu la hiã ɛ̀ kpɔ gbèɖe ò.

¹⁷Wò la kpɔ èfìɔa lè yebe nyiɖìɖi gogotɔ̀a mè. Wò la kpɔ ànyigbã a kpata ji kpedo.

¹⁸Wò la bù ètamè so ènu kè le do ŋɔji na wò sã a ŋuti eye wò la gblɔ̃ be: “Fikɛ ye èdɔjikpɔtɔ kèwo jɔ̀nà àmlɔ̀kɔɛa, wo lè ò? Fikɛ ye àmè kèwo le hlùɛ̃ àgbògbòa, wo lè ò?

¹⁹Wò mu la gbà kpɔ dùkɔ̃ kè yinagò kèa ò. Wò mu la gbà kpɔ àmè kèwo le do ègbè bàɖà bàɖà, àmèjro be ègbè mà-ɖo gɔ̃mèsèse kèa ò.

²⁰Glò Ziɔ̀n kpɔ, kpɔ Yèruzàlɛm èdù kè mè mi va ɖùnà àzãwo lè. E la ze na wò sìgbè àgbɔ̃jèpò be tèpe nène. E lè sìgbè gòxɔ kè wo mu la gbà ɖè jo òa nène. Wo mu la gbà hɔ̃ yebe èkpatiwo ò, nènea ke ye wo mu la gbà ŋlɔ̀ yebe èkàwo jo ò.

²¹Funu ye Tɔhonɔ̀ la ɖè yebe nyiɖìɖia fiɔ lè. Èsìdowo kudo ètɔ̀-sàsrawo la bɔ lè funua. Àpùjihũ gãgãwo kudo àhùa be èsì-jihũwo mu la gbà zɔ̃ to funu va yì ò.

²²Tɔhonɔ̀ ye nyi miabe àpetɔ, e ye le kplɔ̀ mi. Tɔhonɔ̀ ye nyi miabe Èfìɔa, e ye le hlùɛ̃ mi gã.

²³Àpo kɛ̃tɔ be èkàwo la gbɔjɔ. Wo mu la gbà teŋu bla àbaɖa ke ò, eye wo la gbà teŋu do àplãŋuga ò. Eŋuã, wo la kpɔ èmɔ̃ sɔ ma àmɔ̀nyɔ̀nu gbogbo kè wo lɔa. Eye kpòtɛ̃wo ŋutɔ cã la kpɔ woa tɔ̀.

²⁴Àmè ɖekpe mu la gbà gblɔ̃ be: “Lãmè mu le kɔ̀ na mi ò.” Wo la sɔ Yèruzàlɛm be dùkɔ̃a be vuɛ̃ sɔ kè è.