Read gen Ezayà 35 Bible Online

Ezayà 35 - gen bible

Ezayà 35

¹Zògbè ku ànyigbã pupuiwo, mì kpɔ jìjɔɛ. Ànyigbã pupuia ne jɔ̀jì eye bèa to àmà gbà pò èse.

²Ne ɖɔ ku ègbemè be sepòpowo. Ànyigbã ne kpɔ jìjɔɛ eye bèa do jìjɔɛ ku jiɖùɖu be àpa. Tɔhonɔ̀ la na wò la ɖo nyiɖìɖi sìgbè Libàn be ètowo nène. E la ɖo àcɔ na wò sìgbè Karmèl be èto ku Sarɔ̀n be gbàjà ji nène. Nène a, wo la kpɔ Tɔhonɔ̀ be gogo, miabe Mawu a be àcɔ ɖoɖo.

³Mì trɔ do ŋusɛ̃ àlɔ̀ gbɔjɔwo eye mì na èklò kèwo le hũhũ sãawo ne woa sɛ̃ŋu.

⁴Mì gblɔ̃ na àmè kèwo ci jàjàjàa be: “Mì gbɔ̃jìɖɛ, mì mu gbà vɔ̃ ò. Mìabe Mawu ye kè. E la va biɔhlɔ̃ na mì eye e la ɖo e tèpe na mìabe kɛ̃tɔwo. Ye ŋutɔ ye la va hlùɛ̃ mì gã.”

⁵Nène a, ŋùkugbãgbãnɔ̀wo be ŋùku la gbà kpɔ ènu nyuɛ̃ ɖe, ètokunɔ̀wo be èto la gbà sè ènu.

⁶Nène a, kpòtɛ̃nɔ̀wo la tìkpo sìgbè èzĩ nène eye àmumuiwo la kè ènu sɔ gblɔ̃ woabe jìjɔɛ-nyawo. Èsì la wo gbòo lè zògbè ji, ètɔ̀wo la srà to ànyigbã pupuia ji.

⁷Èkɔ xɔ̀zòa la trɔ zũ tɔ̀gba, eye ànyigbã kè mu gbà kpɔ èsì kpɔ òa, la trɔ zũ èsìdowo be tèpe. Fikè ègbevũwo cɔ̃na àkɔ ɖo sãa, ye keti ku èkowo la mìɔ̃ ɖo.

⁸Wo la do èmɔ̃ to funu kè wo la yɔ be: “Èmɔ ɖè ɖo èvòa”. Àmè mà-kɔ̀ mà-kɔ ɖe mu la to funu ò. E la nɔ̀ ànyi na Tɔhonɔ̀ be dùkɔ̃a. Sùkunɔ̀ ɖekpe mu la bu èmɔ̃ to funu ò.

⁹Wo mu la kpɔ jãŋùta ɖekpe le e ji kaka jè èlã wɔ̀adã ɖe ji ò. Ɖekpe ŋutɔ cã mu la va ò. Ne gloa, àmè kèwo Tɔhonɔ̀ la na vòvoa wo kpò ye.

¹⁰Àmè kèwo Tɔhonɔ̀ la tu èkàwo ye la trɔ gbɔ̀. Wo la gbɔ̀ va Ziɔ̀n lè jìjɔɛ gã ɖe mè. Nyɔna mà gũ ɖe la kɔ̀ woabe ŋùkumè. Eye jìjɔɛ mànyagblɔ̃ ɖe ye la kplɔ̀ woa do, ɖo èhiãjèje ku àyàɖùɖuwo nu la ci lè woa dòmè.