Read gen Ezayà 36 Bible Online

Ezayà 36 - gen bible

Ezayà 36

¹Lè èfìɔ Èzekìas be fìɔɖùɖu be èpè woènègɔ̃a mèa, Àsirìa be èfìɔ Senakerib sɔ àhùa ɖo Yudà be àgbògbò-dùawo ŋuti eye e xɔ̀ wo do èse.

²So Làkis be èdùa mè ye Àsirìa be èfìɔ dɔ̃ yebe àhùaga ɖoɖa èfìɔ Èzekìas gbɔ lè Yèruzàlɛm kudo àhùakɔ̃ gbogbo ɖe. E yì nɔ̀tè ɖo èsìdo gã kè le èkɔ̃ jia be gɔtà gbɔ, lè Fulɔ̀n be àgblè-mɔa to.

³Eye èfìɔsa be ga Èliakim, Hilkìa be vi ŋusù to yì dogò è lè èdùa be àgbonu. Ènuŋlɔ̀tɔ Cebnà ku Àsaf be vi Yoàh, bɔ̀ ɖo e ŋuti yì.

⁴Àhùaga gblɔ̃ na wo be: “Mì yì gblɔ̃ na Èzekìas be: “Èfìɔ gãa, Àsirìa be èfìɔa gblɔ̃ be: Nukɛ ŋuti ye wò le dojì ɖo ò?

⁵Wò sùsu be ènyà gbalo sù la nɔ̀ àhùawɔ̀wɔ be àɖàŋùwo tèpe eye e la gbà do ŋusɛ̃ àmè na àhùawɔ̀wɔa? Àmè kɛ ji ŋutɔ ye wò le kãɖo sɔ le lìa ɖo ji nyè ò?

⁶E le dojì ɖo Ejiptè, àplati fɛ̃fɛ̃ kè dona àbì àmè kè gba ɖo e ŋutia. Ɛ̃ɛ, Faraɔ̀n, Ejiptè be èfìɔ lè nène be èbònu na àmè kèwo le dojì ɖo e ŋutia.

⁷Wò la teŋu gblɔ̃ be Tɔhonɔ̀ Mawu ŋuti yè dojì ɖo. Co èwò Èzekìas ye na wo gbã vɔsakpewo kudo tèpe kɔ̀kɔ̀ɛwo kpata va yì. Eye wò do èse na Yudà ku Yèruzàlɛmviwo be wo mu kpɔ èmɔ̃ la sɛ̃ Tɔhonɔ̀ lè tèpe bu tovò lè Yèruzàlɛm ŋuti ò.”

⁸Enyɔ, eŋuã sògbe kudo àpetɔ nyè Àsirìa be èfìɔa. Mù sɔ̀gbè la na wò èsɔ àkpe èvè ne wò la teŋu kpɔ èsɔdotɔwo kpòa.

⁹Wò mu sù la nya àpetɔ nyè be àhùaga ɖèka tètè do ègbe ò! Co wò le sɔ àpo jìdo ɖo Ejiptè ji ne woa na wò àhùakèkevi ku èsɔwo.

¹⁰Gbà wua, àpetɔ nyè ŋutɔ mu so kpò sɔ àhùa ɖo èdù kèa ŋuti ò. Tɔhonɔ̀ ŋutɔ ye na ɛ̀ ègbè be bèa wɔ̀ ɛ̀.”

¹¹Nène a ye Èliakim, Cebnà kudo Yoàh gblɔ̃ na Àsirìa be àhùaga be: “Pò nupo na mi lè Aràmgbe mè. Mi sènà e mè. Mù gbà nɔ pò nupo lè Hebrùgbe mè na mi ò, ɖo àmè kèwo lè èdùa be èglìwo ta mèa, le ɖo èto mi.”

¹²Àhùaga ɖo e ŋuti gblɔ̃ be: “Àpetɔ nyè be àŋɛ̀a mu nyi èwò ku èfìɔ wòa tɔ̀ kpò ò. Vɔ̀a, e nyi àmè kèwo lè èdùa be èglìwo jia cã tɔ̀. Ɖo zãɖe kèa, wo la ɖù woa ŋutɔwo be èmi eye wo la nù woabe àɖìɖɔ sìgbè mìawo ke nène.”

¹³Eye àhùaga nɔ̀tè do àpa gblɔ̃ lè Hebrùgbe mè be: “Mì ɖo èto Àsirìa be èfìɔ gã be àŋɛ̀a:

¹⁴“Mì mu gbà na ne Èzekìas bèa blè mì ò. Ɖo mu la teŋu xɔ̀ na mì ò.

¹⁵E le blè mì be mìa sɔ mìabe jìdo ɖo Mawu ji, be e la hlùɛ̃ mì godoo! E le kãɖoji na mì be èdù kèa mu la ci àsi na Àsirìa be èfìɔa gbèɖe ò.

¹⁶Mì mu gbà ɖo èto Èzekìas ò, Àsirìa be èfìɔa gblɔ̃ be: Mì wɔ̀ ŋuti fàfa ku mù ne mìa trɔ va gbɔ nyè. Nène a, àmè sia àmè la ɖù yebe vɛ̃-gble ku vòti be kusɛ̃sɛ̃wo eye e la nù lè yebe èsìdo mè.

¹⁷E yomè a, mù la va kplɔ̀ mì yì èdù ɖe kè ɖì mìa tɔ̀a mè, èlù ku vɛ̃-gble be èdù, fikè kpɔ̃nɔ kudo vɛ̃ yeye bɔ lèa.

¹⁸Èfìɔ Èzekìas mu gbà blè mì nɔ gblɔ̃ be Tɔhonɔ̀ la hlùɛ̃ mì gã ò. Dùkɔ̃ kpɔ̀tɛawo be vòduwo teŋu hlùɛ̃ wo lè Àsirìa be èfìɔa sia?

¹⁹Nukɛ Hàmatè kudo Àrpadè be vòduwo teŋu wɔ̀ ò? Fikɛ Sèfarvìm be vòduwo lè ò? Wo teŋu xe èmɔ̃ na mù ne nyè mu gbà yì xɔ̀ Sàmarì òa?

²⁰Vòdu kɛ ye teŋu xe èmɔ̃ na mù lè woa kpata dòmè ò? Eŋuã Tɔhonɔ̀ la teŋu xe èmɔ̃ na mù be nyè mu gbà yì xɔ̀ Yèruzàlɛm òa?”

²¹Dùkɔ̃a bɔ̀ ènu eye mu ɖo ènyà ɖe ŋuti ò. Ɖo èfìɔ Èzekìas do ègbè àsi na wo be wo mu gbà gblɔ̃ ènyà ɖe ò.

²²Lè eŋuã yomè a, èfìɔsa be ga Èliakim, Hilkìa be via kudo ènuŋlɔ̀tɔ Cebnà gbàkudo cãmì Yoàh, Àsaf be via wo trɔ gbɔ̀ va Èzekìas gbɔ. Wo zɛ̃ woabe àwùwo eye wo va ɖo àhùagaa be ègbèa na ɛ̀.