Read gen Ezayà 37 Bible Online

Ezayà 37 - gen bible

Ezayà 37

¹Kè èfìɔ Èzekìas sè ègbè kè wo va ɖo na ɛ̀a, e zɛ̃ yebe àwù lè èkɔ̀. E sɔ kòtòku sɔ do eye e yì Tɔhonɔ̀ be àxuea mè.

²E yomè a, e dɔ̃ èfìɔsa be ga Èliakim, ènuŋlɔ̀tɔ Cebnà kudo hũbonɔ sĩsĩwo ɖoɖa gblɔ̃ɖɛtɔ Ezayà, Àmos be via gbɔ. Woa kpata, wo do kòtòku.

³Wo yì la yì ɖo èfìɔ Èzekìas be ègbè na ɛ̀ be: “Egbè le nyi ŋùkèkè jiŋɔ ɖe na mi. Ètodɔ̃dɔ̃ ku ŋùkpɛ̃ be ŋùkèkè ye. Wo gblɔ̃nà be èvia sɔ̀gbè la to va vɔ̀ sĩsĩ hùe do ènɔa kè be àdɔ̀mè be lèa.

⁴Àsirìa be èfìɔ dɔ̃ yebe àhùaga ɖoɖa va zũ Mawu àgbèagbèa. Ne Tɔhonɔ̀ Mawu wòa la sè e ye la dɔ̃ èto na ɛ̀ ɖo èzũ kèa ŋutia, e la nyɔ. Fifìa, èwò ya, blìbɔ̀ na Mawu ɖo àmè kèwo ci àgbè lè àpo dùkɔ̃a mèa ta.”

⁵Èfìɔ Èzekìas be àmèdɔ̃dɔ̃wo yì kpɔ Ezayà.

⁶E gblɔ̃ na wo be: “Mì yì gblɔ̃ na mìabe àpetɔa be Tɔhonɔ̀ gblɔ̃ be èzũ-nya kèwo wò sè kù ɖo ŋuti nyèawo mu gbà do vɔ̃vɔ̃ na wò ò.

⁷Woabe èfìɔa la sè ènyà ɖe so gbɔ nyè. Mù la do è sùsu mè na ɛ̀, ne bèa trɔ yì àxue. Eye mù la na e la yì ci èwui nu lè kaka ye ŋutɔ be èdù mè.”

⁸Àhùaga trɔ gbɔ̀ va kpɔ Àsirìa be èfìɔ kè gbà le wɔ̀ àhùa kudo Libnà be èdùa. Kè e sè be Àsirìa be èfìɔa jo lè Làkis vɔ̀a, àhùaga yì kpɔ ɛ̀ lè fikè e lèa.

⁹Vɔ̀, Àsirìa be èfìɔa sè wo gblɔ̃ be: “Tìrakà, Ètiopìa be èfìɔa ji la sɔ àhùa ɖo Àsirìa ŋuti.” Kè e sèa, Senakerib gbà dɔ̃ àmè ɖoɖa Èzekìas, Yudà be èfìɔ.

¹⁰Wo yì gblɔ̃ na ɛ̀ be: “Wò le dojì ɖo Mawu ŋuti eye wò le susu be e la xe èmɔ̃ na mù ne ma xɔ̀ Yèruzàlɛm. Mù gbà na ne bèa flù wò ò.

¹¹Wò ŋutɔ wò kpɔ ènu kè Àsirìa be èfìɔwo wɔ̀ kudo dùkɔ̃ kèwo wo gbãa. Eye èwò ya wò susu be wo la hɔ̀ wòa?

¹²Dùkɔ̃ kèwo ètɔ nyèwo crɔ̃a be vòduwo teŋu ɖè Gozàn, Haràn, Rèsɛf kudo Tèlasà kè nyi Edɛ̀n be èdùgãa?

¹³E nyɔ, fikɛ ye Hàmatè, Àrpadè, Làyir, Sèfarvìm, Henà kudo Ivà be èfìɔwo lè ò?”

¹⁴Èzekìas xɔ̀ xoma a lè àmèdɔ̃dɔ̃wo si hlɛ̃. E yì mawuxɔa mè eye e yì sɔ xoma a dà ɖo Tɔhonɔ̀ be ŋùkɔ̀.

¹⁵E yomè a, e wɔ̀ kuefã kèa be:

¹⁶“Àhùadù Tɔhonɔ̀, Izràɛl be Mawu, èwò kè nɔ̀ ànyi ɖo Kèrubimwo jia, èwò ye nyi Mawu ɖèka gɔ̃ na xixea be èfìɔduwo. Èwò ye wɔ̀ jiŋùkusi kudo ànyigbã.

¹⁷Tɔhonɔ̀, ɖoto mù ne wòa ɖèkɔ̀ kpɔ! Ɖo èto èzũ kèwo Senakerib be àmèdɔ̃dɔ̃wo le dà ɖoɖa wò Mawu àgbèagbèa.

¹⁸Tɔhonɔ̀, nyàwo be nyi be Àsirìa be èfìɔwo crɔ̃ dùkɔ̃ kpɔ̀tɛawo ku woabe ànyigbãwo.

¹⁹Wo tɔ èzò woabe vòduwo. Ɛ̃ɛ, mu nyi Mawu ye wo nyi ò, vɔ̀ àtikpàkpa ku èkpetata kèwo wo sɔ àlɔ̀ wɔ̀a, ye wo nyi.

²⁰Vɔ̀ èwò ye nyi Tɔhonɔ̀ miabe Mawu, hlùɛ̃ mi lè Senakerib si mè. Nène a, ànyigbã ji fìɔduwo kpata la nya ɛ̀ be èwò Tɔhonɔ̀ ɖèka kpò ye nyi Mawu.”

²¹Ezayà, Àmos be vi ŋusù dɔ̃ àmè ɖoɖa Èzekìas gblɔ̃ be: “Tɔhonɔ̀, Izràɛl be Mawu kè gbɔ wò dɔ̃ àmè ɖoɖa ku ɖo Senakerib ŋutia ye gblɔ̃ ènyà kèa.

²²E gblɔ̃ so e ŋuti be: Yèruzàlɛm jè tùgbɛ̀jɛa le crì wò, e le kò wò. Ɛ̃ɛ Ziɔ̀n be èdù jè tùgbɛ̀jɛa le kònu gbà le hũhũ èta lè ŋùgbe na wò.

²³Àmè kɛ ye wò zũ àlo do ŋùkpɛ̃ ò? Àmè kɛ ŋuti ye wò pò nupo ɖo ò? Eye àmè kɛ ye wò kpɔ lè àmaa ò? Izràɛl be àɖèsãa ye!

²⁴Wò to àmèdɔ̃dɔ̃ wòwo ji zũ Tɔhonɔ̀. Wò gblɔ̃ be: “Mù sɔ àpe àhùakèkevivi gbogbo sɔ lia ètowo ji boo, yì kaka Libàn be ètoa tamè. Mù yì sò yebe sedàti kudo èjèti nyuɛ̃wo, eye mù yì yebe èto yì ji hũia ji gbà ɖo yebe àve nyuɛ̃a mè.

²⁵Mù kù èsìdowo eye mù nù èsì. Ne mù ɖo àfɔ̀ Ejiptè a, mù la na yebe ètɔ̀ sàsrawo la pu kpakpla.”

²⁶Eŋuã Senakerib, wò mu kpɔ nya ekèa? So xoxoa, nyè ŋutɔ ye na ènu kèawo le va e mè. Mù jrà sùsu kèa ɖɛ xoxo eye fifìa, e va e mè. Mù ɖo è be wò la trɔ àgbògbò be èdùwo wɔ̀ èglìkpowo ɖèɖe.

²⁷Hɔ̃hlɔ̃ ɖe mu lè àbɔkã mè na woabe dùkɔ̃wo ò. Vɔ̃vɔ̃ jè woa ji eye wo ɖɔ kudo ŋùkpɛ̃. Wo trɔ sìgbè àgblè be ègbe mumu wɛwlɛ nène, sìgbè ègbe kèwo mìɔ̃ ɖo èxɔ̀taa eye èwèzɛ̃pe be àya la pu wo yùkpàa nène.

²⁸Ne wò nɔ̀ ànyi a, ne wò to àlo wò gbɔ̀a, mù nyana. Eye mù gbà nyana ne wò le do àdɔ̀mèze ɖo ŋuti nyèa.

²⁹Ɛ̃ɛ, wò le do àdɔ̀mèze ɖo ŋuti nyè. Mù sè èvlodonya kèwo wò gblɔ̃a. Ekèa ŋuti mù la do ègà ŋɔ̀ti na wò eye mù la sɔ èsɔga do ènu na wò. Mù la trɔ kplɔ̀ wò to èmɔ̃ kè ji wò to va yìa.

³⁰Ekèa ye la nyi jèsìdo na wò: Èpè kèa mèa, mì la ɖù ènu kèwo to lè woa ɖokoe sinuawo, èpè kè la jè e yomè a, mì la gbà wɔ̀ nènea ke. Vɔ̀ lè èpè ètɔ̃gɔ̃a mèa, mì la dè àgblè, la do ènuwo, la yà ènu, la dè vɛ̃-gble eye mì la ɖù woabe kusɛ̃sɛ̃wo.

³¹Àmè kèwo la ci àgbè lè Yudà be àxuedo a mèa, la nɔ̀ kpò sìgbè àti vi kè le jèa nène. E la vlũ yebe èkèa ɖo ànyigbã mè eye e la na èkusɛ̃sɛ̃wo.

³²Nyàwo, àmè ɖewo la kpɔ̀tɔ̀ lè Yèruzàlɛm, àmè kèwo la ci àgbèa la nɔ̀tè lè Ziɔ̀n-to a ji.” “Nène a ye àhùadù Tɔhonɔ̀ la wɔ̀ to yebe lɔ̃lɔ̃ màgblà mè.

³³Ekèa ŋuti ye Tɔhonɔ̀ gblɔ̃ so Àsirìa be èfìɔa ŋuti be: “Mu la ɖo èdù kèa mè ò, mu la va dà àŋùti ɖèka tètè ò. Mu la va wɔ̀ àvũ kudo è ò. Mu la wla ɖo yebe àkpoxɔ̀nuwo be ŋùgbedòmè sɔ va xa èdùa ò.

³⁴E la gbìgbɔ̀ gbà to èmɔ̃ kè e to vaa, trɔ sɔ jo. Mu la ɖo àfɔ̀ Yèruzàlɛm ò, Tɔhonɔ̀ ye gblɔ̃ ɛ̀.

³⁵Mù la xe èmɔ̃ na yebe fũtɔwo eye mù la hlùɛ̃ ɛ̀ gã ɖo àpe nyikɔ kudo David, àpe sumɔ̃via ŋuti.”

³⁶Tɔhonɔ̀ be àtikplɔtɔa to yì Àsirìtɔwo be àsàɖa mè. E wù àmè hotu èkà èvè ci woèvè èkà èwì vɔ àtɔ̃ (185.000). Ŋùdekɛ̃nyɛ mè èŋù kè gbèa, wo kè ɖo ŋutilã kukuawo ŋuti.

³⁷Eye Senakerib, Àsirìa be èfìɔa bla àgbã jo yì Ninivè. E yì sò kɔpe ɖo funu.

³⁸E va le sumɔ lè yebe vòdua be gòxɔ mè lè Nisèrɔk, gbè ɖèka. Èviawo dòmètɔ èvè, Àdràmèlɛk kudo Sàresɛ̀r va pò è kudo èwui sɔ wù. Eye wo si yì ci Àràratè-nyigbã ji. Èviawo dòmètɔ bu, Àsàradɔ̀n ye ɖùfìɔ ɖo e tèpe.