Read gen Ezayà 38 Bible Online

Ezayà 38 - gen bible

Ezayà 38

¹Lè hùe ŋua nua, èdɔ̀ wù àmè ɖe jè èfìɔ Èzekìas ji. Eye gblɔ̃ɖɛtɔ Ezayà, Àmos be vi va e gbɔ, gblɔ̃ na ɛ̀ be: “Wò la ku. Jrà àpo àxuedo a ɖo, ɖo wò mu la gã ò.”

²Eye Èzekìas trɔ ŋùkumè ɖoɖa èglì ŋuti, fã yɔ Tɔhonɔ̀ gblɔ̃ be:

³“Oò! Tɔhonɔ̀ tɔ̀ wò jɔ̀, ɖo ŋùku ji nyè. Mù nɔ̀ àgbè lè ànùkua wɔ̀wɔ mè lè ŋùkɔ̀ na wò kudo èjìɖèɖe. Eye mù wɔ̀ ènu kè jèa lè àpo ŋùku mè.” Eye Èzekìas fã àvi, do hèhè.

⁴Mawu be ègbè ɖì na Ezayà gà ŋua mè be:

⁵“Gbà yì gblɔ̃ na Èzekìas be “Ènyè Tɔhonɔ̀, ètɔ wò David be Mawu gblɔ̃ be 'Mù sè àpo kuefã eye mù kpɔ àpo àɖàsìwo. Mù la dà èpè woeàtɔ̃ ɖo àpo àgbèzãwo ji.

⁶Mù la hlùɛ̃ mì lè Àsirìa be èfìɔa si. Mù la hlùɛ̃ Yèruzàlɛm be èdùa.

⁷Kpɔɖa, jèsìdo kè Tɔhonɔ̀ la wɔ̀ sɔ ɖo èkpe ènu kè e gblɔ̃a ji na wòa ye kè:

⁸Mù la na dɔ̃ŋùkusu la trɔ va Àkaz be àcrɔkpe kè lè fàfa mè vɔ̀a ji, kaka ɖo lìalia èwo gɔ̃a ji.” Eye dɔ̃ŋùkusua trɔ gbɔ̀ va lìalia èwoawo ji.

⁹Yudà be èfìɔ Èzekìas be ènyà gbɔ̃gblɔ̃ ye nyi ekèa, kè e le èdɔ̀ kaka na àsi èku eye e va gãa.

¹⁰Mù le gblɔ̃ sã be: 'Nyè mu kpɔ nɔ̀ àgbèa sùgbɔ ò, co mù ɖo la ku. Èkuwode ye mù la yì wɔ̀ èpè kpɔ̀tɛawo lè.

¹¹Mù gbà gblɔ̃ be: Nyè mu la gbà kpɔ Tɔhonɔ̀ be ŋùmè lè àgbètɔwo dòmè ɖe ò. Nyè mu la gbà kpɔ àmè be ŋùkumè gbèɖe lè ànyigbã ji, fikè àgbè nyèa nɔ̀tè lè ò.

¹²Wo xɔ̀ àgbè nyèa lè àsi nyè eye wo kplɔ̀ ɛ̀ yì àzɔ̀ge boo na mù sìgbè àlɛ̃kplɔ̀tɔ be gòxɔ nène. Mù va ɖo àgbè nyèa be vɔ̀vɔnu sìgbè àvɔlɔ̃tɔ nène eye èkàwo kpata sò. To ŋùkèkè kaka jè èzãa, Tɔhonɔ̀, wò ɖo àsitè ku mù.

¹³Kaka kè èŋù la kèa, mù la vɔ̀ keŋu-keŋu. Wo tùkù àpe èpuwo sìgbè lekè jãŋùta gbãnà èpu nène. To ŋùkèkè kaka jè èzãa, Tɔhonɔ̀, wò ɖo àsitè ku mù.

¹⁴Mù le fã sìgbè àwàwàvi nène. Hɔ̃hlɔ̃-gbè nyè lè sìgbè peplelu tɔ̀ nène. Mù ɖè èkɔ̀ le kpɔ kaka ènu tìkɔ̀ na ŋùkuvi nyèwo.

¹⁵Vɔ̀ nukɛ mù la teŋu gblɔ̃ na Mawu ò? E ye ŋutɔ ye pò nupo na mù eye e gbà le wɔ̀ ènu kèa. Nyè mu teŋu le dɔ̃ àlɔ̃ ò, ɖo àkpɔ̃ wɔ̀gũ ɖɔ mù.

¹⁶Tɔhonɔ̀, wò nya ènu kèkpe mù a eye wò na mù kpɔ àgbè. Wò gbà trɔ do ŋusɛ̃ lãmè na mù, wò le mù ɖo àgbè.

¹⁷Àkpɔ̃ wɔ̀gũ nyèa trɔ zũ nyɔna na mù. Dodo, lɔ̃lɔ̃ wòa na be mù glo èyɔ̀. Wò lɔ àpe èvuɛ̃wo jo boo lè gbɔ nyè.

¹⁸Ɖo àmè ɖekpe mu la teŋu jì kafu-ha na wò lè èkuwode kaka àmèkukuwo la va sɛ̃ wò ò. Àmè kèwo yì èyɔ̀mèa, mu gbà ɖo kãkã ɖo ji ɖe ɖo àpo ànùkua ji ò.

¹⁹Ne gloa, àmè kèwo lè àgbèa kpò ye teŋu na wò gogo sìgbè lekè mù le wɔ̀ ɛ̀ egbèa nène. Àjìtɔwo la ɖè àpo ànùkua fiɔ jìjimèawo.

²⁰Èwò Tɔhonɔ̀ ye hlùɛ̃ mù gã. Mi la sɔ èhàjìnuwo sɔ nɔ kafu wò gbè sia gbè lè àpo àxuea mè miabe àgbèzãwo keŋu.

²¹[5] E yomè a, Ezayà gblɔ̃ be: “Nɔ sɔ vòtikusɛ̃sɛ̃ tùtu va eye woa kã ɛ̀ ɖo èfìɔ be àbìawo be ŋùmè ne bèa gã!”

²²Eye Èzekìas biɔ be: “Jèsìdo kɛ ye la ɖèfiɔ mù be mù la gbà teŋu yì Tɔhonɔ̀ be àxuea mè ò?”